SAN JUAN 16 - Nuevo Testamento en Quichua Cañar 1996

¹ Cancuna ñucata crinata ama saquichunmi, caicunataca huillacuni.

² Cancunataca tandanacuna huasicunamanta llucchishpa cachangacunami. Shinallatac cancunata huañuchishpaca, Taita Diosmanmi alli ruhuanchic nina punzhaca chayamungami.

³ Ñucatapish, ñuca Taitatapish mana ricsishcamantami chai shinaca ruhuangacuna.

⁴ Chai punzhacunapi ñuca ña utcaman nishcata yuyarichunmi, cashnaca nicuni. Ñuca cancunahuan cashcamantami, callaripica caicunataca manarac huillarcani.

Diospac Espíritu imata ruhuac cashcamanta

⁵ Cunanca ñucata cachac Taitahuan cangapacmi rigrini. Shina cacpipish, ñuca maiman rinataca maijanllapish mana tapunguichicchu.

⁶ Ashtahuanpish caicunata nishcamantami, cancunaca munai llaquiricunguichic.

⁷ Shina cacpipish, ñuca rinami cancunamanca ashtahuan alli canga. Chashna ñuca mana ricpica, cancunata Cushichicca mana cancunahuan cangapac shamungachu. Ñuca rishpami, paitaca cachasha. Chaica chashnatacmi canga.

⁸ Pai shamushpami, cai pachapi causaccunamanca imami jucha cashcatapish, mana jucha cashcatapish, shinallatac Dios ima shina taripana cashcatapish ricuchinga.

⁹ Paicuna ñucata mana cricpimi, imami jucha cashcataca ricuchinga.

¹⁰ Ñuca Taitapacman rishpa, cancunaman ña mana ricuricpimi, imami mana jucha cashcataca ricuchinga.

¹¹ Shinallatac cai pachata mandacta Taita Dios ña juchanchishca cashcamantami, ima shina taripana cashcataca ricuchinga.

¹² Cancunaman imata ninataca chariniracmi. Shina cacpipish cancunaman yalli achca cacpimi, cunanca mana tucui huillani.

¹³ Cashcata nic Diospac Espíritu shamushpami, cancunamanca imapish cashcata yachachinga. Paica mana paipac munaillamantachu rimanga, ashtahuanpish ima uyashcallatami huillanga. Shinallatac tucui imalla tucugricushcatapish yachachingami.

¹⁴ Paica ñucamanta chasquishpa cancunaman yachachicushcamantaca, paimi ñuca sumaimana cashcataca ricuchinga.

¹⁵ Ñuca Taita tucui imalla charishcacunaca ñucapacmi. Chaimantami ‘Diospac Espirituca ñucamanta chasquishpa, cancunamanca yachachinga’ nircani.

¹⁶ Asha q'uipallaca ñucataca ña mana ricunguichicchu. Shina cacpipish cutin asha q'uipallamanca ricunguichicmi— nirca.

Llaquica cushiman tigrana cashcamanta

¹⁷ Chaimanta Jesuspac yachacuccunapuramanta maijancuna caishuc chaishuc tapunacushpaca: —‘Ñuca Taitapacmanmi rigrini, chaimanta asha q'uipallaca mana ricunguichicchu, shinallatac asha q'uipallami cutin ricunguichic’ nishpaca, ¿imatatac nisha nin?

¹⁸ Pai ‘asha q'uipalla’ nishpaca, ¿imatatac nisha nin? Chaitaca mana entendinchicchu— ninacurcacuna.

¹⁹ Paicuna tapunata munacucta yachashpami, Jesusca cashna nirca: —‘¿Ñucata asha q'uipallaca ña mana ricunguichicchu, cutin asha q'uipallatacmi ricunguichic’ nishcata yachanata munashpachu tapunacucunguichic?

²⁰ Cancuna llaquilla cacpipish, huacailla cacpipish, cai pachapaclla causaccunaca cushicungami. Shina cancuna llaquilla cacpipish, llaquica cushiman tigrangami.

²¹ Shuc huicsa junda huarmica sajuarina punzha chayacpica, nanaihuan llaquirinmi. Shina cacpipish ña huahuata charishca q'uipaca, shuc huahua cai pachaman shamushcamantaca, tucui nanaicunata cungarishpami cushicun.

²² Chai shinami cancunapish llaquiringuichic. Shina cashpapish ñuca cutin ricuricpica, cancunapac shunguca mai cushicungami. Chai cushicuitaca pi mana quichungachu.

²³ Chai punzhacunapica ña mana ashtahuan imata ñucamanca tapunguichicchu. Ñuca Taitallami tucui imatapish ñuca shutipi cancuna mañashcataca cunga. Chaica chashnatacmi canga.

²⁴ Cunancamanca, ñuca shutipica imata cancunaca mana mañashcanguichicchu. Cancunapac shungupi yallita cushicui tiyachunca mañaichic, chasquinguichicmi.

Jesús cai pachapi tiyac mana allicunata mishashcamanta

²⁵ Tucui caicunataca chimbapurashpallami parlarcani. Shina cacpipish, ña mana ashtahuan chimbapurashca parlohuan parlana punzha chayamucpica, ñuca Taita ima shina cashcatatacmi cancunamanca huillasha.

²⁶ Chai punzhacunapica cancunaca ñuca shutipimi mañanguichic. Shina cacpipish, mana ñucachu ñuca Taitamanca cancunamantaca mañasha,

²⁷ ashtahuanpish ñuca Taitallatacmi cancunataca c'uyan. Cancuna ñucata c'uyashcamantapish, ñuca Diosmanta shamushca cashcata crishcamantapish cancunataca c'uyanmi.

²⁸ Cai pachaman shamungapacmi ñuca Taitapacmanta llucshircani. Cunanca cai pachata saquishpami, ñuca Taitapacman cutigrini— nirca.

²⁹ Shina nicpi yachacuccunaca: —Cunanmi ña mana chimbapurashca parlocunahuan parlashpa, entendinallatac huillacungui.

³⁰ Cunanmi can tucui imatapish yachac cashcataca yachanchic. Pipish manarac tapucpimi, canca yachangui. Chaimantami cantaca Diosmanta shamushca cashcata crinchic— nircacuna.

³¹ Shina nicpi Jesusca: —¿Shinashpaca cringuichicchu?

³² Cunanca ñami chai punzhaca chayamun. Cunanllatacmi cancunaca ñucallata saquishpa, caita chaita ringuichic. Shina cacpipish mana ñucallachu cani, ashtahuanpish ñuca Taitaca ñucahuanmi.

³³ Tucui caicunataca cancuna ñucahuan shuc shinalla cashcata yachashpa, shungupi yallita cushicuita charichunmi nini. Cai pachapica cancunaca llaquita apanguichicmi. Shina cacpipish, cai pacha mana allicunata ñuca mishashcata yuyarishpa, ama manchashpa cushicuichiclla— nirca.