SAN JUAN 15 - Nuevo Testamento en Quichua Cañar 1996

“Ñucaca uvas yura shinami cani” nishpa, Jesús huillashcamanta

¹ Jesusca cashna nishpami c'atirca: —Ñucaca allita p'ucuc uvas yura shinami cani. Ñuca Taitaca uvas chagrata cuidacmi.

² Ñucapi cac ramacuna mana p'ucucpica, tucui p'itishpami shitanga. Cutin alli p'ucuctaca ashtahuan alli p'ucuchunmi, mana allicunata anchuchishpa saquinga.

³ Shinallatac cancunaca ñuca yachachishcata uyashcamantaca, ñami chuyayashca canguichic.

⁴ Yurapi rama cac shinami, cancunaca ñucahuanca cana canguichic. Shina cacpimi, ñucapish cancunahuanca casha. Ramaca yurapi mana cashpaca, paillatacca mana p'ucunchu. Chashnallatacmi cancunapish ñucahuan mana cashpaca, mana p'ucuc rama shina tucunguichic.

⁵ Ñucaca uvas yura shinami cani. Cancunaca ramacuna shinami canguichic. Maijanpish ñucahuan cacpica, ñucapish paihuanmi cani. Chashna cacpimi, paica allita p'ucunga. Ñucahuan mana cashpaca, imatapish mana ruhuai pudinguichicchu.

⁶ Maijanpish ñucahuan mana cactaca, chagrata cuidacca mana p'ucuc ramata shinami p'itinga. Chashna p'itishca chaquicpica, tandachishpa ninapi shitashpa rupachingami.

⁷ Cancuna ñucahuan cashpa, shinallatac ñuca yachachishcacunata cazushpa c'atirashpaca, imatapish mañaichiclla, ñuca Taitaca cungallami.

⁸ Chashna alli p'ucuc ramacuna shina cacpimi, ñuca Taitaca sumac alli nishca canga. Shina cashpami, ñuca yachacuccunapish tucunguichic.

⁹ Ñucaca ñuca Taita ñucata c'uyac shinallatacmi, cancunataca c'uyani. Cancunaca chashna c'uyanacushpa c'atichiclla.

¹⁰ Ima shinami ñuca Taitapac mandashcacunata pactachishpa, paipac c'uyashca cani, chai shinallatacmi cancunapish ñuca mandashcacunata pactachishpa, ñuca c'uyashca canguichic.

¹¹ Ima shinami ñuca cushicuni, chai shinallatac cancunapish cushicushpa yallita cushicuita charichunmi, tucui caicunataca nini.

¹² Cancunapish ñuca cancunata c'uyashca shinallatac, caishuc chaishuchuan c'uyanacuichic. Caimi ñuca mandashcaca.

¹³ Maijanpish paihuan apanacucmanta huañucmi, yallita c'uyashcataca ricuchin.

¹⁴ Ñuca mandashcacunata pactachishpaca, ñucahuan apanacuccunami cancunaca canguichic.

¹⁵ Amopacta ruhuacca amo imata ruhuacushcata mana yachanchu. Chaimantami serviccunalla nishpaca, mana cancunataca c'ayani. Ñuca Taita tucui ima nishcacunata ñuca cancunaman huillashcamantami, ñucahuan apanacuccuna nishpa cancunataca c'ayani.

¹⁶ Cancunallatacca ñucataca mana acllarcanguichicchu, ashtahuanpish ñucami cancunataca acllarcani. Cancuna rishpaca, alli granota p'ucuc yura shina causaita ricuchichunpish, chai p'ucushcacuna ama chingarichunpish minganimi. Shina ruhuashpa, cancuna ñuca shutipi imata mañacpica, ñuca Taitaca cungallami.

¹⁷ Caishuc chaishuchuan c'uyanacuichic nishpami, caicunataca mandani.

Cai pachapaclla causaccunaca Jesustapish, paita c'aticcunatapish p'iñashcamanta

¹⁸ Cai pachapaclla causaccuna cancunata p'iñacpica, ñucatarac p'iñashcata yuyanguichic.

¹⁹ Cancuna cai pachapaclla causaccuna shina causacpica, cai pachapaclla causaccunaca paicuna c'uyanacuc shinami c'uyanmancuna. Shina cacpipish cancunataca paicunapuramantami ñucaca acllarcani. Ña mana cai pachapaclla causaccuna shina cashcamantami, cancunataca p'iñancuna.

²⁰ ‘Maijan servicpish amotaca mana yallichu’ nishpa, ñacaman huillashcataca yuyarichic. Ñucatapish mana ricunachishpa llaquichircacunami. Shinallatacmi cancunatapish llaquichingacuna. Ñuca ima nishcata cazushca cashpaca, cancuna nishcatapish cazungacunami.

²¹ Ñucata Cachacta mana ricsishcamantami, ñucata c'aticushcamanta cancunataca llaquichingacuna.

²² Ñuca caicunata mana imata rimangapac shamushca cacpica, paicunaca mana juchanchishcachu canman carcacuna. Ashtahuanpish ‘cunanca mana juchayucchu cani’ ninataca mana pudincunachu.

²³ Maijanpish ñucata p'iñaccunaca, ñuca Taitatapish p'iñanmi.

²⁴ Pi mana ruhuaipaccunata paicunapac ñaupapi ñuca mana ruhuashca cacpica, paicunaca mana juchanchishcachu canman carcacuna. Ashtahuanpish caicunataca ña ricurcacunami. Chashna cashca jahuami ñucatapish, ñuca Taitatapish p'iñancuna.

²⁵ Caica paicunaman mandashcapi quillcashca pactachunmi, chashnaca tucurca. Chaipica: ‘Manapish juchayuc cacpi, ñucataca p'iñarcacuna’ ninmi.

²⁶ Ashtahuanpish Taitamanta ñuca cachashca Cushichic Diospac Espíritu shamushpami, ñuca ima shina cashcataca huillanga. Paica cashcata nicmi.

²⁷ Cancunaca callarimanta pacha ñucahuan cashcamantami, cancunapish ñucamanta huillaccuna canguichic.