SAN JUAN 13 - Nuevo Testamento en Quichua Cañar 1996

Yachacuccunapac chaquita Jesús jahuashcamanta

¹ Pascua*f** punzhapac shuc punzha tiyacpiracmi, Jesusca cai pachata saquishpa paipac Taitahuan tandarigrina cashcataca yacharca. Cai pachapica paita c'aticcunataca yallitami Jesusca c'uyarca. Shina cashpami, tucuringacaman ima shina c'uyac cashcataca ricuchisha nirca.

² Jesusca paipac yachacuccunahuan micushpami tiyacurca. Shina cacpica, diabloca ñami Simonpac churi Judas Iscariotepac shungupica yaicushca carca. Chaimantami Judasca Jesusta japichina yuyailla puricurca.

³ Jesusca Taita Dios cachashca shamushcatapish, paipacman cutina cashcatapish, shinallatac pi mana ruhuaipaccunata Taita Dios ruhuachun cushcatapish yacharcami.

⁴ Micucushcamanta jatarishpami, Jesusca jahualla churanata anchuchishpa, shuc liensota chumbillishcapi churarca.

⁵ Chashna ruhuashpaca, yacuta batiapi churashpami, yachacuccunapac chaquita jahuai callarirca. Ña jahuashca q'uipaca, chumbillishcapi churashca liensota japishpami, chaquita chaquichirca.

⁶ Simón Pedropac chaquita jahuagricpimi paica: —Apunchic Jesús, ¿ñuca chaquitachu canca jahuagringui?— nirca.

⁷ Shina nicpi Jesusca: —Ñuca cashna ruhuacushcataca manarac entendinguichu, ashtahuanpish q'uipamanmi entendingui— nirca.

⁸ Shina nicpi Pedroca: —¡Ñuca chaquita jahuachunca, jaicapi mana saquishachu!— nirca. Shina nicpi Jesusca: —Cambac chaquita ñuca mana jahuacpica, canca mana ñucapacchu cangui— nirca.

⁹ Shina nicpi, Simón Pedroca: —Shinashpaca Apunchic Jesús, ama chaquillata jahuaichu. Umatapish, maquitapish jahuaiyari— nirca.

¹⁰ Shina nicpi Jesusca: —Maijanpish ña armarishca cashpaca, cutinca mana armarinchu, ashtahuanpish chaquillatami jahuana can. Cancunaca ña chuyanllami canguichic. Shina cashpapish, mana tucuichu chuyanlla canguichic— nirca.

¹¹ “Mana tucuichu chuyanlla” nishpaca, maijan paita japichigricushcata yachashcamantami chashnaca nirca.

¹² Chaquita ña jahuashca q'uipaca churanata churarishpami, cutin mizapi tiyarishpa Jesusca cashna nirca: —¿Cancunaca imamantatac chashna ruhuashcataca entendinguichic?

¹³ Cancuna ñucata ‘Yachachic’ shinallatac ‘Apunchic Jesús’ nishpaca, allitami ninguichic. Chaica chashnatacmi cani.

¹⁴ Ñucaca cancunata Mandac shinallatac cancunata Yachachic cashpapish, cancunapac chaquitaca jahuashcanimi. Chaimanta cancunapurapish, caishuc chaishuc chaquitaca jahuanacuna canguichic.

¹⁵ Cancunapish chashnallatac ruhuachunmi, ñucaca chashna jahuashpa ricuchini.

¹⁶ Amota servicca mana amota yallichu. Shinallatac maijan cashpapish, cachashca shamucca mana cachactaca yallichu. Chaica chashnatacmi can.

¹⁷ Cancuna cai ñuca nishcacunata chashnatac cashcata yachashpa pactachishpaca, mai cushicuimi canguichic.

¹⁸ Mana tucui cancunamantachu nicuni. Maijanlla ñuca acllashca cashcataca yachanimi. Dios quillcachishcapi nishcaca pactanatacmi can. Chaipica: ‘Ñucahuan micucucllatacmi ñucataca p'iñai callarirca’ ninmi.

¹⁹ Caicuna pactacpi, ñuca pi cashcata cancuna crichunmi, utcaman caicunataca huillacuni.

²⁰ Maijanpish ñuca cachashcata chasquicca, ñucatami chasquin. Shinallatac ñucata chasquicca, ñucata cachactami chasquin. Chaica chashnatacmi can— nirca.

Judas Iscariote japichina cashcata Jesús huillashcamanta

²¹ Chaita nishca q'uipami, shungupi munai llaquirishpa Jesusca: —Cancunapuramanta shucmi ñucataca japichigricun. Chaica chashnatacmi can— nirca.

²² Chashna nicpimi, yachacuccunaca Jesús maijanta nicushcatapish mana yachashpa, caishuc chaishuc ñahuipura ricunacurca.

²³ Yachacuccunapuramanta Jesuspac shuc c'uyashca yachacucmi paihuan quimirishpa tiyacurca.

²⁴ Paitami Simón Pedroca: “Chashna nishpaca, ¿pimantatac nicun?” nishpa tapuchun señata ruhuarca.

²⁵ Chashna señata ruhuacpimi, chai yachacucca Jesuspacman ashtahuan cuchuyashpaca: —Apunchic Jesús, ¿chai japichicca pitacyari?— nirca.

²⁶ Chashna nicpi Jesusca: —Maijanmanmi tandata jucuchishpa cugrini, chaimi— nirca. Chaita nishcahuanmi p'itilla tandata jucuchishpa, Simón Iscariotepac churi Judasman curca.

²⁷ Judas tandata japincami, Satanasca*f** paipac shungupi yaicurca. Chai q'uipami Jesusca: —Can imata ruhuagricushcataca utcashpa ruhuailla— nirca.

²⁸ Tucui chai mizapi tiyacuccunamantaca, pipish imamanta Jesús chaita nicushcataca mana entendircacunachu.

²⁹ Judasca cullquita tandacmi carca. Chaimantami maijancunaca: “Judastami fiestapac imallata randichun nicunga, mana cashpaca, huacchacunaman cullquita cuchunmi nicunga” nishpa yuyarcacuna.

³⁰ Judas ña tandata japishpaca, llucshishpa rircami. Chashna llucshicpica, ñami tuta carca.

Jesús mushucta mandashcamanta

³¹ Judas llucshishpa rishca q'uipami, Jesusca cashna nirca: —Cunanmi Runa Tucungapac shamushca*f** ñucaca sumacyachishca cagrini. Taita Diospish ñucamantami sumacyachishca cagrin.

³² Taita Diosca ñucamanta chashna sumacyachishca cashpaca, Runa Tucungapac shamushca ñucallapitacmi sumac cashcata ricuchinga. Chaitaca ñallami ruhuashpa ricuchinga.

³³ C'uyashca yachacuccuna, cancunahuanca ashacamanllami cagrini. Cancunaca ñucata mashcanguichicmi. Chashna cacpipish mandac israelcunaman*f** ima shinami nircani, shinallatacmi cancunamanca nini: Ñuca maiman rigricushcamanca, mana rinata pudinguichicchu.

³⁴ Mushuc mandashcatami cancunamanca saquini: Caishuc chaishuchuan c'uyanacuichic. Ñuca ima shinami cancunata c'uyani, chashnallatacmi cancunapish c'uyanacuna canguichic.

³⁵ Cancuna caishuc chaishuchuan c'uyanacucpica, tucui cai pachapi causaccunami ñucapac yachacuccuna cashcataca yachangacuna— nirca.

Jesusca Pedrota “mana ricsinichu ninguimi” nishcamanta

³⁶ Jesusman Simón Pedro tapushpaca: —Apunchic Jesús, ¿maimantac rigringui?— nirca. Chashna nicpi Jesusca: —Ñuca maiman rigricushcamanca cancunaca mana c'atinata pudinguichicchu, ashtahuanpish q'uipatami c'atinguichic— nirca.

³⁷ Chashna nicpi Pedroca: —Apunchic Jesús, ¿ima nishpatac cunanca mana c'atinata pudini? Ñucaca canmanta huañuna cacpipish huañushallami— nirca.

³⁸ Chashna nicpi Jesusca: —¿Ima shinatac ñucamanta ‘huañuna cacpipish huañushallami’ ningui? Manarac gallo cantacpimi, quimsa cutin ñucataca ‘mana ricsinichu’ ningui. Chaica chashnatacmi canga— nirca.