SAN JUAN 11 - Nuevo Testamento en Quichua Cañar 1996

Lázaro huañushcamanta

¹ Chai punzhacunapica, Betania pueblomanta Lázaro runami ungushca cashca carca. Shinallatac paipac panicuna Mariapish, Martapish chai pueblollamantatacmi carca.

² Lazaropac pani chai Mariallatacmi q'uipamanca Jesuspac chaquicunapi mishquilla ashnacucta churashpa, paipac acchahuan chaquichirca.

³ Chai ishcai ñañandiccunami Jesuspacman cachashpaca: —Apunchic Jesús, canhuan mai apanacuc Lazaroca ungushcami— nichun cacharcacuna.

⁴ Jesús chaita uyashpaca: —Chai ung:uica mana huañuchic ung:uichu, ashtahuanpish Taita Diospish, paipac Churi ñucapish tucui imatapish ruhuaclla cashcataca ricuchingapacmi chai ung:uica— nirca.

⁵ Jesusca Mariatapish, Martatapish, paicunapac turi Lazarotapish mai c'uyacmi carca.

⁶ Ashtahuanpish Jesusca Lázaro ungushcata yachashpapish, ishcai punzhacamanmi chaillapitac saquirirca.

⁷ Chai q'uipami, Jesusca paipac yachacuccunataca: —Cutinllatac Judea llactaman jacuchic— nirca.

⁸ Shina nicpi yachacuccunaca: —Yachachic, sarunman israelcunaca*f** rumihuanmi shitashpa huañuchishun nircacuna. ¿Chashna cashca jahuachu cutin chaillamantac risha ningui?— nircacuna.

⁹ Shina nicpi Jesusca: —¿Manachu punzhaca chunga ishcai pachata charin? Maijanpish punzhapi puricca, cai pachata achicyachic luzta ricushcamantaca mana mitcarinchu.

¹⁰ Shina cashpapish maijanpish paipi luzta mana charishpaca, tuta purishpaca mitcarinmi— nirca.

¹¹ Chaita nishca q'uipaca Jesusca: —Ñucanchichuan apanacuc Lazaromi suiñushca. Paitami ricchachingapac rigrini— nirca.

¹² Yachacuccuna chaita uyashpaca: —Apunchic Jesús, shinashpaca Lázaro suiñucushpaca alliyangallami— nircacuna.

¹³ Jesús chashna nishpaca, Lázaro huañushcamantami nicurca. Cutin yachacuccunaca suiñuna cashcamantami nicurcacuna.

¹⁴ Chai q'uipaca, paicuna alli alli yachachun nishpami Jesusca: —Lazaroca huañushcami.

¹⁵ Ñucaca pai huañuc horas mana chaipi cashcamantaca cushicunimi. Paica cancuna ashtahuan ñucata crichunmi huañushca. Chaimi cancunamanca ashtahuan alli. Shina cacpipish jacuchic, ricushun— nirca.

¹⁶ Shina nicpi, ishcaipura huacharishca Tomasca caishuc yachacuccunataca: —Ñucanchicpish Jesushuan huañungapac jacuchic— nirca.

Jesusca causaita cucpish, huañushcacunata causachicpish cashcamanta

¹⁷ Jesús shamushpaca, Lázaro ña chuscu punzha huañushcata enterrashca cacpimi chayamurca.

¹⁸ Betania puebloca Jerusalenmanta quimsa kilómetro shinallapimi carca.

¹⁹ Martapac, Mariapac turi huañushcamantaca, tauca israelcunami*f** paicunata llaquinacushpa compañangapac shamushca carcacuna.

²⁰ Jesús shamucucta Marta yachac chayashpaca, tupangapacmi llucshirca. Ashtahuanpish Mariaca huasipimi saquirirca.

²¹ Chashna tupangapac llucshishpami Martaca: —Apunchic Jesús, can caipi cashca cacpica, ñuca turica mana huañunmanchu carca.

²² Shina cacpipish cunan Taita Diosman imatapish mañacpica, Dios cuna cashcataca yachanimi— nirca.

²³ Shina nicpi Jesusca: —Cambac turica causaringami— nirca.

²⁴ Shina nicpi Martaca: —Tucuri punzhapi huañushcacuna causaricpi causarina cashcataca, ari, yachanimi— nirca.

²⁵ Shina nicpi Jesusca: —Ñucami causaita cucpish, huañushcacunata causachicpish cani. Maijanpish ñucata cricca huañushpapish causaringami.

²⁶ Shinallatac maijanpish causacushparac ñucata cricca, huañushpapish huiñaitaca mana huañungachu. ¿Chaitaca cringuichu?— nirca.

²⁷ Shina nicpi paica: —Ari, Apunchic Jesús. Can Diospac Churi, shinallatac cai pachaman shamuna Quishpichic Cristo cashcataca crinimi— nirca.

Lazarota enterrashca ñaupapi Jesús huacashcamanta

²⁸ Chaita nishca q'uipami, Martaca paipac ñañan Mariapacman rishpaca: —Yachachicca caipimi. Cantaca c'ayacunmi— nishpa, pacalla huillagrirca.

²⁹ Mariaca chaita uyashcahuanmi, jatarishpa Jesushuan tupangapac rirca.

³⁰ Jesusca manarac chai puebloman yaicushcachu carca. Marta maipimi paihuan tupashca carca, chaillapitacmi cashca carca.

³¹ María jatarishcahuan callpashpa llucshicpica, paita compañashpa huasipi tiyacuc israelcunaca:*f** “Enterrashcapimi huacangapac ric yuyachin” nishpami, c'atishpa llucshishpa rircacuna.

³² Jesús maipi cashcaman María chayashpa Jesusta ricushpaca, paipac chaquipi cungurishpami: —Apunchic Jesús, can caipi cashca cacpica, ñuca turica mana huañunmanchu carca— nirca.

³³ Mariapish, paita compañac israelcunapish huacacucta ricushpami, shungumanta llaquirishpa Jesusca:

³⁴ —¿Maipitac paitaca enterrarcanguichic?— nishpa tapurca. Shina nicpi paicunaca: —Apunchic Jesús, maipi churashcata shamui, ricungui— nircacuna.

³⁵ Chaita ricushpaca, Jesuspish huacarcami.

³⁶ Pai huacacucpimi israelcunaca: —Riquichic, Lazarotaca ima shinami c'uyashca— ninacurcacuna.

³⁷ Shina cacpipish paicunapuramanta maijancunaca: —Paica ñahui mana ricuc huacharishca runataca alliyachircami. Shina cashpaca, ¿ima nishpatac Lázaro ama huañuchunca imallatapish mana ruhuarca?— nircacuna.

Lázaro causarishcamanta

³⁸ Cutinllatacmi Jesusca shungumanta llaquirishpa, chai enterrashca cuchuman rirca. Chai jutcuca shuc c'aca quinraipimi jatun rumihuan jarcashca carca.

³⁹ Chaipimi Jesusca: —Rumita cutichichic— nirca. Shina nicpi, chai huañushcapac pani Martaca: —Apunchic Jesús, pai huañushcaca ñami chuscu punzha tucun. Ñami ashnacunga— nirca.

⁴⁰ Shina nicpi Jesusca: —‘Can crishpaca, Taita Dios imatapish ruhuaclla cashcataca ricunguimi’ nishpa, ¿manachu nircani?— nirca.

⁴¹ Jesús shina nicpica, huañushca maipi cac jarcashca rumita cutichircacunami. Chai q'uipami, Jesusca jahua pachata huichailla ricushpaca: —Taitalla, ñuca mañashcata uyashcamantaca pagui ninimi.

⁴² Ñuca mañashcata can uyac cashcataca yachanimi. Ashtahuanpish caipi cac gentecuna ñucata can cachashca cashcata crichunmi, paicunapac allipac cashna nini— nirca.

⁴³ Chaita nishca q'uipaca: —¡Lázaro, chaimanta llucshi!— nishpami, sinchita caparirca.

⁴⁴ Chashna caparicpica, chai huañushcaca maquindic, chaquindic pillushca, shinallatac umapish ñahuindic liensohuan pillushcami llucshimurca. Shina llucshimucpimi Jesusca: —Pai purichunca chai pillushcata pascaichic— nirca.

Jesusta huañuchingapac yuyarinacushcamanta

⁴⁵ Mariata compañashpa shamuc tauca israelcunaca*f** Jesús ima ruhuashcata ricushpaca, paita crircacunami.

⁴⁶ Cutin maijancunaca fariseocunamanmi*f** Jesús ima ruhuashcataca huillangapac rircacuna.

⁴⁷ Shina huillacpimi curacunata mandac curacunapish, fariseocunapish*f** mandaccunapuralla tandanacurcacuna. Chashna tandanacushpaca: —Chai runataca, ¿imatatac ruhuanchic? Paica pi mana ruhuaipaccunatami taucacunata ruhuacun.

⁴⁸ Chashnalla saquicpica, tucuimi paita cringacuna. Shina cacpica, Roma*f** llacta gentecuna shamushpa Diosman mañana huasitapish, ñucanchic gentecunatapish tucuchingami— nircacuna.

⁴⁹ Shina nicpimi, paicunapuramanta chai huatapi curacunata jatun mandac Caifás curaca cashna nirca: —Cancunaca imatapish mana yachanguichicchu.

⁵⁰ Ñucanchic llactapi tucui gentecuna tucurinapac randica, shuc runalla tucui israelcunamanta huañunami ñucanchicmanca ashtahuan alli. ¿Chaitaca manachu yachanguichic?— nirca.

⁵¹ Mandac Caifasca mana paipac yuyaimantachu chashnaca nirca, ashtahuanpish chai huatapi curacunata jatun mandac cashcamantami, Dios yuyaita cucpi, israelcunamanta Jesús huañuna cashcata huillarca.

⁵² Mana chai llactapi causaccunallamantachu huañuna carca, ashtahuanpish caita chaita rishpa causacuc Diospac huahuacunaca tandarishpa, shuclla tucushpa causachunmi huañuna carca.

⁵³ Chashna ninacushca punzhamanta pachami, Jesusta ima shina huañuchinata yuyarinacurcacuna.

⁵⁴ Chaimantami Jesusca israelcunapurapica ña mana purirca, ashtahuanpish Judea llactamanta llucshishpaca, shitashca pamba cuchullapi cac Efraín pueblopimi paipac yachacuccunahuan cangapac rirca.

⁵⁵ Israelcuna pascua*f** fiestata ruhuangapacca asha punzhacunallami tiyarca. Chai llactapi causac achca gentecunami Diospac ñaupapi alli ricuringapac nishpa, allichiringapac Jerusalenmanca manarac pascua*f** punzha chayamucpi shamurcacuna.

⁵⁶ Chaipimi paicunaca Jesusta mashcashpa carcacuna. Paicunapurami Diosman mañana huasipica: —¿Imatatac ninguichic? ¿Manachu cai fiestamanca shamunga, imashi?— ninacurcacuna.

⁵⁷ Chai fariseocunapish, curacunata mandac curacunapish: “Jesús maipi cashcata maijan yachac chayashpaca, japigringapac huillanguichic” nishpami mandashca carca.