SAN JUAN 10 - Nuevo Testamento en Quichua Cañar 1996

Ovejata michiccunamanta Jesús parlashcamanta

¹ Jesusca cashnami nirca: —Maijanpish chapashpa huañuchic shuhua cashpami, ovejacunapacmanca mana corral punguta yaicushpa, maitapish yaicun. Chaica chashnatacmi can.

² Ashtahuanpish punguta yaicucllami ovejata michicca can.

³ Corral punguta cuidacca chai michictami punguta pascashpa yaicuchin. Shina yaicuchicpica, paipac ovejacunataca shutipimi c'ayan. Chashna c'ayacpi, ovejacuna ricsicpica, corralmantami llucchin.

⁴ Ña tucui llucchishpaca, ovejacunapac ñaupatami paica rin. Ovejacunaca michicpac rimashcata ricsishpaca c'atinllami.

⁵ Ashtahuanpish mana ricsishca runapac rimashcata uyashpaca, mancharishpami mana c'atishpa maitapish rincunalla— nirca.

⁶ Cai chimbapurashca parlohuan Jesús huillacpica, imata nisha nishcataca mana entendircacunachu.

Jesús alli michic cashcamanta

⁷ Jesusca cutinllatacmi cashna nirca: —Ñucami ovejacuna yaicuna punguca cani. Chaica chashnatacmi can.

⁸ Ñucapac ñaupata tucui shamuccunaca shuhuacunami, huañuchiccunami carca, ashtahuanpish ovejacunaca mana c'atircacunachu.

⁹ Ñucami yaicuna punguca cani. Maijanpish ñucamanta yaicucca quishpiringami. Paica oveja llucshin yaicun micunata taric shinami canga.

¹⁰ Shuhuaca shuhuangapac, huañuchingapac, chingachingapacmi yaicun. Ñucaca causaita charichun, shinallatac yallita charichunmi shamurcani.

¹¹ Ñucami alli michicca cani. Chashna alli michic cashcamantami, ovejacunamanta huañuna cacpipish huañushalla.

¹² Ashtahuanpish cullquillamanta michicca mana alli michicchu. Mana paipac ovejacuna cashcamantaca atuc shamucta ricushpapish, shitashpa rinllami. Shina ruhuacpica, atucca ovejacunata manchachishpa, maitapish shiguashpa cachanllami.

¹³ Cullquillamanta michicca ovejacunata mana llaquishpa shitashpa rinllami. Paimanca ovejacunaca imapish mana curinchu.

^14-15 Ñucami alli michicca cani. Ima shinami ñuca Taita ñucata ricsin, shinallatacmi paitaca ricsini. Chashnallatacmi ñuca ovejacunaca ñucataca ricsincuna. Ñuca ovejacunamantaca huañuna cacpipish huañushallami.

¹⁶ Shinallatac mana cai corralpi cac ovejacunatapish charinimi. Paicunatapish pushamunami cani. Paicunaca ñuca ima nishcataca uyangacunami. Chashna uyashpa tandarishpaca, shuc shinallami tucunga, shinallatac shuc michicllami tiyanga.

¹⁷ Ñucaca huañuna cacpipish, q'uipaman causaringapacca huañushallami. Chaimantami ñuca Taitaca ñucata c'uyan.

¹⁸ Ñucataca pi mana huañuchingachu, ashtahuanpish ñucallatac huañusha nicpimi, ñucataca huañuchingacuna. Ñucaca huañunatapish, causarinatapish pudinimi. Chashna ruhuachunmi, ñuca Taitaca mandarca— nirca.

¹⁹ Israelcuna*f** chaita uyashpaca, paicunapurami cutinllatac ch'icanyarinacurca.

²⁰ Paicunapuramanta achcacunami: —¿Ima nishpatac paitaca uyanguichic? Paica supaihuan cashcamantaca mana juizhupichu— ninacurcacuna.

²¹ Ashtahuanpish maijancunaca: —Supaihuan cashpaca, mana chashna rimanmanchu. Maijanpish supaihuan cashpaca, ñahui mana ricuctaca mana alliyachinmanchu— ninacurcacunami.

Israelcuna Jesusta p'iñashcamanta

²² Chai punzhacunaca Taita Diosman mañana huasita paiman mingashcata yuyarishpami, israelcunaca*f** fiestata Jerusalenpi ruhuacurcacuna. Chai punzhacunaca tamia quillacunami carca.

²³ Jesusca Diosman mañana huasipi cashpami, ñaupa mandac Salomón ruhuashca pungu pambapi puricurca.

²⁴ Chaipi Jesús cacpimi israelcunaca: —Can Quishpichic Cristo cashpaca, cunanllatac alli alli huillaiyari. Ñucanchicca, ¿ima horascamantac can pi cashcata mana yachashpa puricushunyari?— nircacuna.

²⁵ Chashna nicpimi, Jesusca cashna nirca: —Ña cancunamanca nircanica. Chashna nicpipish, cancunaca mana crircanguichicchu. Ñuca Taita mandacpi ñuca imata ruhuashcallatacmi, ñuca pi cashcataca allita ricuchicun.

²⁶ Cancunaca mana ñuca ovejacuna cashpami, chaita ricushpapish mana cringuichicchu.

²⁷ Ñucaca ñuca ovejacunataca ricsinimi. Paicunapish ñuca rimashcataca ricsishpa c'atincunallami.

²⁸ Ñucaca huiñai causaitami paicunamanca cuni. Paicunaca mana chingaringachu, shinallatac pipish ñuca maquimantaca mana quichungachu.

²⁹ Ñuca Taita ñucaman cushcacunaca tucuimanta yallimi. Paipac maquimantaca pi mana quichungachu.

³⁰ Ñuca Taitahuanca shuc shinallami canchic— nirca.

³¹ Shina nicpi, israelcunaca cutinllatacmi Jesusta rumicunahuan shitashun nishpa rumita japircacuna.

³² Chashna cacpipish Jesusca: —Ñuca Taitapac imatapish ruhuaclla cashcahuanmi, cancunapac ñaupapica tauca allicunata ruhuarcani. Chashna cacpica, ¿maijan ruhuashcacunamantatac ñucataca rumihuan shitashun ninguichic?— nirca.

³³ Shina nicpi israelcunaca: —Ñucanchicca mana can ima allicunata ruhuashcamantachu rumicunahuanca shitashun ninchic, ashtahuanpish can rimashcahuan Taita Diosta p'iñachishcamantami shitashun ninchic. Canca ñucanchic shina runallami cangui. Chashna cashpapish Dios shina tucusha nishpami, chashnaca nicungui— nircacuna.

³⁴ Chashna nicpimi, Jesusca cashna nirca: —Cancunaman Taita Dios mandashpa quillcachishcapica: ‘Cancunami dioscuna canguichic’ nicunmi.

³⁵ Dios quillcachishcataca mana chashnachu ninataca mana pudinchicchu. Chaitaca yachanguichicmi. Taita Diosca pai rimashcata uyaccunataca ‘cancunami dioscuna canguichic’ nircami.

³⁶ Ashtahuanpish Taita Diosca ch'icanyachishpami, ñucataca cai pachaman cacharca. ¿Chashna cashca jahuachu ñucataca ‘Diospac Churimi cani’ nishcamanta cancunaca ‘Taita Diostami p'iñachicun’ ninguichic?

³⁷ Ñuca Taita imatapish ruhuashca shina ñuca mana ruhuashpa ricuchicpica, cancunaca ama cringuichicchu.

³⁸ Ñucaca ñuca Taita mandashcallatami ruhuani. Shina cashcamanta ñucata mana crishpapish, ñuca ruhuashcacunallatapish crichicyari. Chashna crishpami ñuca Taitaca ñucahuan cashcata, ñucaca paihuan cashcata alli yachanguichic— nirca.

³⁹ Shina nicpi, israelcunaca cutinllatacmi Jesustaca japishun nircacuna. Shina cacpipish paica paicunapac chaupimanta rircallami.

⁴⁰ Jesusca Jordán yacu chimbanicman cutinllatac cutishpami, chaipi saquirirca. Chaipica Bautizac Juanmi puntaman bautizac carca.

⁴¹ Chaipica achca gentecunami paipacman shamushpaca: —Juanca pi mana ruhuaipaccunataca mana ruhuarcachu. Shina cacpipish Juan cai runamanta huillashcaca chashnatacmi cashca— ninacurcacunami.

⁴² Chaipica achcacunami Jesustaca crircacuna.