HECHOS 9 - Nuevo Testamento en Quichua Cañar 1996

Jesucristota Saulo crishcamanta

¹ Sauloca Apunchic Jesusta criccunataca huañuchisha ninataca mana saquircachu. Chaimantami Israel*f** curacunata jatun mandac curapacman rirca.

² Chaiman rishpaca: “Damasco pueblopi tandanacuna huasicunapi yaicushpa, Jesusta c'aticcunata c'aricuna cachun, huarmicuna cachun, cai Jerusalenman prezu apamungapac quillcata cui” nirca.

³ Quillcata apashpa, Damasco puebloman ña chayacucpimi, cungailla jahua pachamanta relampa shina, jaguin nishpa, paipac muyundicta achicyachirca.

⁴ Chashna tucucpi, pambaman Saulo urmacpica: “Saulo, Saulo, ¿ima nishpatac ñucata p'iñashpa llaquichicungui?” nishcami uyarirca.

⁵ Shina nicta uyashpa Sauloca: —¿Pitac cangui Amito?— nirca. Shina nicpica: —Ñucaca can p'iñashpa llaquichicuc Jesusmi cani. Canca puya puntapi huagra jaitashpa chugriric shinami, canllatac llaquita apacungui— nirca.

⁶ Shina nicpi, Sauloca manchaihuan chucchushpami: —Cunanca, ¿imatatac ruhuachun ningui?— nirca. Shina nicpi, Apunchic Jesusca: —Jatari, Damasco pueblollamantac ri. Chaipimi can imata ruhuana cashcataca huillanga— nirca.

⁷ Saulohuan caccunaca pita mana ricushpa, rimashcallata uyashpami, munai mancharircacuna.

⁸ Pambamanta Saulo jatarishpa, ñahuita pascashpa ricusha nishpapish, imata mana ricui pudircachu. Chaimantami paihuan caccunaca maquimanta aisashpa, Damascoman pusharcacuna.

⁹ Chaipica quimsa punzhacunacaman ñahui mana ricucpi, imata mana micushpa, mana ubiashpami carca.

¹⁰ Damasco pueblopica Jesusta cric Ananías runami causarca. Paimanmi Apunchic Jesusca muscuipi shina ricurishpaca: —Ananías— nirca. Shina nicpi Ananiasca: —Caipimi cani, Apunchic Jesús— nirca.

¹¹ Shina nicpi, Apunchic Jesusca paitaca: —Jatari. Derecha shuti ñanman ri. Judaspac huasipi yaicushpa, Tarso pueblomanta Saulo runata tapui. Paica chai huasipimi Taita Diosman mañashpa shuyacun.

¹² Chai Saulo muscuipi shina ricushpaca, can paipacman yaicushpa ñahui cutin ricuchun, cambac maquita paipac uma jahuapi churactami ricurca— nirca.

¹³ Chashna nicpi Ananiasca: —Apunchic Jesús. ‘Chai Saulo runaca, Jerusalenpi causac Diospaclla cac criccunata p'iñashpa llaquichicun’ nishpa, taucacuna ninacuctami uyarcani.

¹⁴ Cunanpish canman mañaccunata huatashpa apangapacmari, curacunata mandac curacunaman quillcata mañashpa shamushca— nirca.

¹⁵ Chashna nicpipish, cutinmi Apunchic Jesusca: —Rilla. Ñami paitaca acllarcani. Paimi mana israelcunamanpish,*f** jatun mandaccunamanpish, israelcunamanpish*f** ñucamanta huillanga.

¹⁶ Pai ima shina ñucamanta llaquicunata apana cashcataca, ñucallatacmi ricuchisha— nirca.

¹⁷ Chashna nicpi, Ananiasca Saulo shuyacuc huasiman rishpa, Saulopac uma jahuapi maquita churashpaca: —Huauqui Saulo. Can caiman shamucucpi, ricuric Apunchic Jesusllatacmi, cambac ñahui cutin ricuchun, shinallatac Diospac Espíritu cambac shungupi junda cachunpish, ñucataca cambacman cacharca— nirca.

¹⁸ Chashna nicpica, Saulopac ñahui murumantaca pescado concha shina urmacpica, ñahuica ricurcallami. Chashna ñahui ricucpi, jatarishpaca bautizarircami.

¹⁹ Chashnami ña micushpa sinchiyarishca q'uipaca, tauca punzhacunata Damasco pueblopi caishuc criccunahuan causarca.

Damasco pueblopi Saulo huillai callarishcamanta

²⁰ Chaimanta Sauloca israelcuna*f** tandanacuna huasicunapi yaicushpami: “Jesusca Diospac Churimi” nishpa, huillai callarirca.

²¹ Chashna huillacucta uyaccunaca munai mancharinacushpami, paicunapura: —¿Manachu cai runaca Jesuspac shutipi tucui mañaccunata Jerusalenpi llaquichic carca? Cunanpish, curacunata mandac curacunapacman prezu apangapacmi, caimanca shamushca canga— ninacurcacuna.

²² Shina nicta uyashpacarin, Sauloca ashtahuanmi mana manchashpa huillai callarirca. Damasco pueblopi causac israelcunata upalla saquingacamanmi: “Jesusmari Quishpichic Cristoca” nishpa huillarca.

Israelcuna huañuchishun nicucpi, Saulo miticushcamanta

²³ Ña Saulo unaita huillashpa causacucpimi, israelcuna*f** tandanacushpa, huañuchinata yuyarircacuna.

²⁴ Chaimantami tutapish, punzhapish chai pueblomanta llucshina pungucunapica paita chapacurcacuna. Chashna huañuchishun nicuctaca, Sauloca yachac chayarcami.

²⁵ Chaimantami criccunaca Saulota shuc jatun canastapi churashpa, chai pueblota jarcashca pirca jahuata uricuchishpa, tuta cacharcacuna.

Jerusalenman Saulo cutishcamanta

²⁶ Jerusalenman Saulo ña chayashpaca, criccunahuanmi tandanacusha nirca. Ashtahuanpish criccunaca: “Manarac cricchu canga” nishpami, Saulotaca mancharcacuna.

²⁷ Chashna cacpipish, Bernabé runami Saulotaca Jesús acllashca huillaccunapacman pushamurca. Chaipimi Apunchic Jesús Sauloman ñanpi ricurishpa rimashcata, shinallatac Saulo Damascopi mana manchashpa Jesusmanta huillashcatapish, Bernabeca parlarca.

²⁸ Chaimantami Sauloca Jerusalenpi caishuc criccunahuan tandanacushpa, llucshin yaicun purirca.

²⁹ Sauloca Jerusalenpipish mana manchashpami, Apunchic Jesusmantaca huillarca. Griego*f** rimaita rimac israelcunahuanpish*f** parlanacuc, rimanacucmi carca. Chashna huillacpica, Saulotaca ima shinapish huañuchinatami yuyacurcacuna.

³⁰ Criccuna chaita yachashpami, Saulotaca Cesarea pueblocaman pushashpa, Tarso puebloman cacharcacuna.

³¹ Chaimantami Judea llactapi, Galilea llactapi, Samaria llactapi causac tucui criccunaca alli sumacta causarcacuna. Paicunaca Mandac Diosta manchashpa, ashtahuan sinchi criccunami tucurcacuna. Shinallatac Diospac Espíritu pushacushcamanta, ashtahuanmi achca criccuna tucurca.

Eneas runata alliyachishcamanta

³² Pedroca tucui criccunata ricushpa puricushpami, Lida pueblopi causac criccunapacman chayagrirca.

³³ Chai pueblopica, mana cuyuricta ruhuac ung:uihuan pusac huatata ungushca Eneas runatami ricurca.

³⁴ Chashna ungushcata ricushpami Pedroca: —Eneas, cantaca Quishpichic Jesucristomi alliyachin. Jatari, cambac camata tandachi— nicpica, Eneasca jatarishpa shayarircallami.

³⁵ Chashna alliyachishcata ricushpaca, Lida pueblopi causaccunapish, Sarón pueblopi causaccunapish tucuimi Apunchic Jesusta crircacuna.

Dorcas huarmita causachishcamanta

³⁶ Jope pueblopica, Tabita shuti cric huarmimi causarca. Tabita shutica, griego*f** rimaipica “Dorcas” nisha ninmi. (Dorcas nishpaca, “taruga” nisha ninmi). Paica mana chariccunata llaquishpa imallatapish cushpa, allita ruhuashpa causac huarmimi carca.

³⁷ Chashna allita ruhuashpa causacucpimi, shuc ung:ui japicpi huañurca. Pai huañucpica, armachishpa pilluchishpami, shuc ucupi churarcacuna.

³⁸ Pedro puricuc Lida puebloca, Jope pueblo cuchullapimi carca. Chaimantami criccunaca Lida pueblopi Pedro cacta yachashpa, Jope puebloman utca c'ayamuchun ishcai runacunata cacharcacuna.

³⁹ Chai runacuna “jacu” nicpica, Pedroca paicunahuan rircallami. Pai ña chaiman chayacpica, huañushca velaricuc ucumanmi pusharcacuna. Chai ucuman yaicucpica, viuda huarmicuna Pedrota muyushpami, Dorcas causacushparac ruhuashca churanacunata ricuchishpa huacarcacuna.

⁴⁰ Pedroca tucui chai ucupi caccunata canzhaman llucchishpaca, cungurishpami Taita Diosman mañarca. Chaimanta huañushca huarmita ricungapac tigrarishpaca: —Tabita, jatari— nicpi, chai huarmica ñahuita pascashpa, Pedrota ricushcahuan jatarishpa tiyarircallami.

⁴¹ Chashna tiyaricpi, Pedroca maquimanta japishpa jatarichishpaca, viuda huarmicunata caishuc criccunandic c'ayashpaca, ña causarishcatami ricuchirca.

⁴² Chashna ruhuashcata Jope pueblopi tucui causaccuna yachashpaca, achcacunami Apunchic Jesusta crircacuna.

⁴³ Pedroca Jope pueblopi carata ñutuyachic Simonpac huasipimi unaicaman carca.