HECHOS 7 - Nuevo Testamento en Quichua Cañar 1996

Mandaccunapuraman Esteban huillashcamanta

¹ Curacunata jatun mandac cura Estebanman tapushpaca: —Paicuna canmanta chashna huillashcaca, ¿chashnatacchu, imatacyari?— nirca.

² Chashna tapucpi Estebanca: —Caipi tandanacushca tucui Israel*f** huauquicuna, taitacuna, ñuca rimashcata uyaichic. Sumac Taita Diosca ñucanchic ñaupa taita Abrahammanca, manarac Harán pueblopi causangapac ricpimi, Mesopotamia llactapi ricurirca.

³ Chashna ricurishpami Taita Diosca: ‘Cambac llactatapish, cambac familiacunatapish saquishpa llucshi. Can maiman rina cashcataca, ñucami ricuchisha’ nirca.

⁴ Chaimantami Abrahamca Caldea llactamanta llucshishpa, Harán pueblopi causagrirca. Abrahampac taita huañushca q'uipami, Taita Diosca paitaca cunan cancuna causacuc llactaman pushamurca.

⁵ Chashna pushamushpapish paimanca cai llactapica, chaqui saruillatapish allpataca mana curcachu. Ashtahuanpish chai punzhacunapi Abraham huahua illaclla cacpiracmi, Taita Diosca: ‘Cambac huahua huahuacunaman cai allpata cushpami, canmanca cusha’ nirca.

⁶ Taita Diosca Abrahamtaca cashnapish nircami: ‘Cambac huahua huahuacunaca quiquin llactamanta rishpami, caru llactapi causangacuna. Chai llacta gentecunaca paicunataca chuscu pasac huatatami macashpa servichishpa causangacuna.

⁷ Chashna servichishpa chariccunataca ñucaca munaimi llaquichisha. Chai q'uipaca, cambac huahua huahuacunata chai llactamanta llucchishpa pushamucpica, cai llactapimi ñucata servingacuna’ nircami.

⁸ Shinallatac Taita Diosca Abrahamtaca, paihuan ari ninacushcata pactachingapacca, circuncisionta*f** ruhuashpa ricuchichun nishcami. Chaimantami Abrahamca paipac churi Isaactaca huacharishcamanta pusac punzhapica, circuncisionta ruhuarca. Chashnallatacmi Isaacpish paipac churi Jacobotaca ruhuarca. Jacobopish paipac chunga ishcai churicunataca chashnallatacmi ruhuarca. Chaicunaca ñucanchic ñaupa taitacunami carcacuna.

⁹ Chai Jacobopac churicunaca paicunapac huauqui Joseta p'iñashcallamantami, Egipto llactaman apachun c'atushpa cacharcacuna. Chashna ruhuacpipish, Taita Diosca Josetaca mana saquircachu.

¹⁰ José ima llaquihuan cacpipish, Taita Diosca paihuanmi carca. Shinallatac Egipto llactata jatun mandacpac ñaupapi alli cachunpish, alli yuyaicunatami curca. Chaimantami chai jatun mandacca paipac huasipipish, tucui Egipto llactapipish mandachun churarca.

¹¹ Chai punzhacunallatacmi Egipto llactapipish, cai Canaán llactapipish ima mana p'ucucpi yarcai tiyashcamanta, jatun llaquicuna tiyarca. Ñucanchic ñaupa taitacunapish cai llactapica, ima micunata mana charircacunachu.

¹² Chaimantami ñucanchic ñaupa taita Jacoboca, ‘Egipto llactapimi trigo tiyan’ nicta uyashpa, paipac churicunataca punta chai llactaman cacharca.

¹³ Josepac huauquicuna cutin Egiptoman ricpimi, Joseca paicunapac huauqui cashcataca huillarca. Chaimantami chai llactata jatun mandacpish, José maijan aillumanta cashcatapish yachac chayarca.

¹⁴ Chai q'uipami Joseca paipac taita Jacobota, paipac familiacunandic pushamuchun cacharca. Paicunaca canchis chunga pichcapurami carcacuna.

¹⁵ Chaimantami taita Jacoboca Egipto llactapi causangapac rirca. Chaipimi paipish, paipac churicunapish huañurcacuna. Paicunaca ñucanchic ñaupa taitacunami carcacuna.

¹⁶ Huañushca unai huatacunapica, paicunapac tullucunataca Siquem llactamanmi apamurcacuna. Chai Siquem llactapimi, Abrahamca Hamorpac churicunaman enterrana asha allpata randishca carca. Chaipimi chai tullucunataca enterrarcacuna.

¹⁷ Taita Dios Abrahamman ‘cai llactatami cusha’ nishpa, huillashca ña pactamugricpica, israelcunaca*f** Egipto llactapica mirarishpami, achca tucurcacuna.

¹⁸ Chai punzhacunallapitacmi, Joseta mana ricsic jatun mandac Faraonca Egiptopica ña mandai callarirca.

¹⁹ Chai mandacca ñucanchic ñaupa taitacunataca llullashpa llaquichishpami, paicuna ama ashtahuan mirarichun c'ari huahuacuna huacharicpica, maipi shitachun mandac carca.

²⁰ Chai punzhacunallapitacmi, c'ari huahua Moisespish huacharirca. Paica Taita Diospac alli nishcami carca. Quimsa quillatami paipac taita mamaca huasipi pacashpa charircacuna.

²¹ Chashna cashpapish shitachun mandashca cashcamantami, ña huañuchun shitashcata mandac Faraonpac ushi tarishpa, quiquin huahuata shina huiñachirca.

²² Shina cashpami, Moisesca Egipto llactapi ima yachanacunatapish alli yachachishca huiñarca. Chaimantami rimangapacpish, imata ruhuangapacpish, alli yachac carca.

²³ Moisés ña chuscu chunga huatata charishpaca, paicunapura cashcamanta israelcunata ricugrina munaitami charirca.

²⁴ Pai ricugricpica, shuc Egipto runami Israel runata macacushca carca. Israel runata macacushcamantami, paita misashpa Egipto runataca huañuchirca.

²⁵ ‘Ñuca aillu israelcunaca ñucataca Taita Diosmi millai runacunapac maquimanta cacharichichun cachashca canga yuyangapishchari’ nishpami, Moisesca chashna ruhuarca. Ashtahuanpish paicunaca mana chashna yuyarcacunachu.

²⁶ Cutin cayandic punzha ricungapac rishpaca, israelcunapurallatac macanacucucta ricushpami: ‘Riquichic. Cancunaca huauquindiccuna shinami canguichic. ¿Ima nishpatac cashna macanacucunguichic?’ nirca.

²⁷ Chashna nicpica, chai macacuc runaca Moisesta t'angashpa shitashpami: ‘¿Pitac cantaca ñucanchicta mandachun, ñucanchic juez cachunca churarca?

²⁸ ¿Caina Egipto runata huañuchishca shinallatacchu, ñucatapish huañuchisha ningui?’ nirca.

²⁹ Chashna nicta uyashpami, Moisesca Madián llactaman miticushpa rirca. Chai caru llactapi causacushpaca, ishcai churicunatami charirca.

³⁰ Ña chuscu chunga huatata chai llactapi causashca q'uipami, Moisesca Sinaí urcu cuchulla shitashca pambapi cashpa, shuc zarza yura rupacucta ricurca. Chai yura rupacuc nina chaupipica, shuc angelmi ricurirca.

³¹ Chashna ricuricpi Moisesca: ‘¿Imashi canga?’ nishpami, alli ricungapac chayagricucpi Mandac Dios rimashpaca:

³² ‘Ñucaca cambac taita Abrahampac, Isaacpac, Jacobopac Diosmi cani’ nishcatami uyarca. Chashna nicpimi, Moisesca manchaihuan chucchucushpa, ashtahuan ricungapac cuchuyanataca mana munarca.

³³ Mandac Diosca cashnapish nircami: ‘Can shayacuc pambaca ñucapaclla saruna allpami. Chaimanta cambac ushutata llucchi.

³⁴ Egiptopi ñuca acllashca israelcuna llaquihuan causacuctami ricuni. Paicuna llaquihuan huacacuctapish uyanimi. Cunanca paicunata llaquimanta llucchingapacmi shamurcani. Cunanca shamui, cantami Egiptoman cachagrini’ nirca.

³⁵ Israelcuna Egiptopica: ‘¿Pitac cantaca ñucanchicta mandac cachun, juez cachunca churarca?’ nishpami, Moisestaca p'iñarcacuna. Ashtahuanpish paicuna p'iñashca Moisesllatatacmi, Taita Diosca zarza yurapi ricuric angelman rimachishpaca, Egipto llactamanta llucchishpa, mandac cachun churarca.

³⁶ Chai Moisesmi ñucanchic ñaupa taitacunataca Egiptomanta llucchimurca. Chashna llucchimushpaca Egipto llactapipish, Puca Cuchapipish, shinallatac shitashca pambapipish chuscu chunga huatatami pi mana ruhuaipaccunatapish, pi mana ricushcacunatapish ruhuarca.

³⁷ Chai Moisesllatacmi israelcunamanca: ‘Cancunata Mandac Diosca ñucata cachashca shinallatacmi, cancunapuramanta shuc huillacta cachanga. Pai ima nishcata cazunguichic’ nirca.

³⁸ Chai Moisesllatacmi shitashca pambapi ñucanchic ñaupa taitacunapura tandanacushcapipish carca. Paillatacmi Sinaí urcupi ángel rimashcatapish, ñucanchic ñaupa taitacunaman huillangapac apamurca. Chai rimashcacunaca causaita cuc rimaicunami.

³⁹ Chashna cacpipish, ñucanchic ñaupa taitacunaca Moisés yachachishcataca mana cazushun nishpami, paita p'iñashpa, Egiptollamantac cutinata munarcacuna.

⁴⁰ Chashna yuyashpami, Moisespac huauqui Aarontaca: ‘Ñucanchicta Egipto llactamanta llucchimuc Moisés runaca mana uyarinchu. Cunanca ñucanchicta pushac dioscunata ruhuai’ nircacuna.

⁴¹ Chashna nishpami, biziman riccha diosta ruhuashpa, paicuna ruhuashcalla manapish diosmanmi animalcunata huañuchishpa rupachircacuna. Chashnami paicunaca munai cushicurcacuna.

⁴² Chaimantami Taita Diosca paicunamanta caruyarca. Shinallatac paicunapac quiquin munaita ruhuashpa, lucerocunata adorachunpish saquircalla. Shinallatacmi ñaupa huillaccunaman Taita Dios quillcachishpaca, cashna nishca: ‘Israelcuna, cancuna chuscu chunga huatata shitashca pambapi cashpa, animalcunata rupachishpaca, mana ñucamanchu curcanguichic.

⁴³ Ñucaman cushpa rupachinapac randica, Ruhuashcalla Moloc diostami adorashpa, pai tiyanandic huandushpa purircanguichic. Shinallatac Renfán nishca diospac lucerocunatapish, cancunallatac ruhuashpami adorarcanguichic. Chaimantami cancunataca cai llactamanta llucchishpa, Babilonia llactata pasachishpa, ashtahuan caruman cachasha’ nishcami.

⁴⁴ Ñucanchic ñaupa taitacuna shitashca pambapi cashpaca, Taita Dios paicunahuan cashcata ricuchingapac ruhuashca carpa huasita huandushpami, puric carcacuna. Chai huasica ima shinami Moisesman Taita Dios ricuchishca shinallatacmi ruhuashca carca.

⁴⁵ Ñucanchic ñaupa taitacunaca chai huasitaca paicunapac ñaupa taitacunamantami japircacuna. Tauca huatacuna q'uipami, Josué runa paicunata pushamucpi, chai shitashca pambamantaca cai cunan ñucanchic causacuc llactaman apashpa shamurcacuna. Ñucanchic taitacuna cai cusha nishca llactapi causachunmi, Taita Diosca chai mana israelcunataca llucchishpa cacharca. Chai huasitaca David mandac tucungacamanmi charircacuna.

⁴⁶ Mandac Davidca Taita Diospac c'uyashca cashpami, Taita Diostaca: ‘Ñaupa taita Jacobota Mandac Dioslla, ñucaca canman shuc huasita ruhuasha ninimi’ nishpa mañarca.

⁴⁷ Ashtahuanpish Taita Diosman mañana huasitaca, Davidpac churi Salomonmi ruhuachirca.

⁴⁸ Shina cacpipish, jahua pachapi causac Taita Diosca gentecuna ruhuashcalla huasicunapica mana causanchu. Ñaupa huillacman Taita Dios quillcachishpapish:

⁴⁹ ‘Jahua pachaca ñuca mandashpa tiyarinami. Cai allpaca ñuca chaqui sarunami. Shinashpaca ima laya huasita cancuna ruhuacpipish, chaipica mana samarishachu.

⁵⁰ Ñucallatacmari tucui ima tiyashcatapish ruhuarcani’ nishcami.

⁵¹ Ashtahuanpish cancunaca upa shina cashpami, Taita Dios ima nishcata mana uyashpa, shungucaman sinchiyashca canguichic. Cancunapac ñaupa taitacuna shinami, Diospac Espiritutapish mana cazuccuna canguichic.

⁵² Cancunapac ñaupa taitacunaca, Diosmanta ñaupa huillaccunata tucui mashnatami mana ricushun nishpa llaquichircacuna. Paicunami: ‘Jucha illac, imatapish cashcata ruhuacca shamungami’ nishpa huillaccunataca huañuchircacuna. Shinallatacmi cancunaca pai jucha illac ña shamucpica, millai runacunaman cushpa huañuchircanguichic.

⁵³ Dios mandashcacunata angelcuna cancunaman cucpipish, mana cazuccunami canguichic— nirca.

Estebanta huañuchishcamanta

⁵⁴ Esteban chashna nicta uyashpaca, tucui chaipi caccunami quirucuna mucurishpa, munai p'iñarircacuna.

⁵⁵ Ashtahuanpish Diospac Espíritu shungupi junda cashpami, Estebanca jahua pachata huichailla ricushpa, Taita Diospac sumaimana cashcatapish, shinallatac Apunchic Jesús paipac alli lado maquiman shayacuctapish ricurca.

⁵⁶ Chashna ricushpami, Estebanca: —Riquichic. Ñucaca jahua pacha pascarishpa, Runa Tucungapac shamushca*f** Jesusta Taita Diospac alli lado maquiman shayacuctami ricuni— nirca.

⁵⁷ Chashna nishcata mana uyashun nishpami, ringrita taparishpa munai caparircacuna. Chaimantaca huaicashpami, Estebantaca japircacuna.

⁵⁸ Chashna japishpaca, pueblomanta llucchishpami, Estebanta huañuchingapac rumicunahuan shitai callarircacuna. Shina shitacucpimi, Estebanta juchanchishpa huillaccunaca paicunapac jahualla churanacunata surcushpa, Saulo mosoman mingarcacuna.

⁵⁹ Paicuna rumicunahuan shitacucpimi, Estebanca: “Apunchic Jesús, ñuca almata pushaiyari” nishpa mañarca.

⁶⁰ Esteban cungurishpaca: “¡Apunchic Jesús, paicuna cashna mana allita ruhuacushcataca, ama yuyaringuichu!” nishpami, sinchita caparirca. Chashna nishpaca huañurcallami.