HECHOS 6 - Nuevo Testamento en Quichua Cañar 1996

Canchis ayudac runacunata acllashcamanta

¹ Chai punzhacunapica, achca gentecunami Jesusta crishpa mirarircacuna. Paicunapurapica, maijancunaca griego*f** rimaita, maijancunaca hebreo*f** rimaita rimaccunami carca. Chashna cashpami, griego rimaita rimaccunaca: “Ñucanchicpura viuda huarmicunamanca, punzhanta imalla illashcataca mana alli chaupicunguichicchu” nishpami, hebreo rimaccunataca juchanchi callarircacuna.

² Chashna ninacucta uyashpami, Jesús acllashca chunga ishcai huillaccunaca tucui criccunata tandachishpa: —Diosmanta huillanata saquishpa, cancunaman micunata ñucanchic servinaca, mana allichu.

³ Chaimanta huauquicuna: Cancunapuramanta alli yachac, alli causac, Diospac Espíritu shungupi junda, canchis runacunata acllaichic. Paicunamanmi micunata chaupichunca, mingashun ninchic.

⁴ Paicuna chaita ruhuacucpica, ñucanchicca Taita Diosman mañanatapish, paimanta huillanatapish mana saquishunchu— nircacuna.

⁵ Paicuna chashna nishcaca, tucui criccunapac yuyaipica allimi carca. Chaimantami Estebanta acllarcacuna. Paica Diospac Espirituhuan cashpami, alli cric carca. Chashnallatac Felipeta, Procorota, Nicanorta, Timonta, Parmenasta, israelcuna*f** yachachishcata c'atic, Antioquía pueblomanta Nicolastapish acllarcacuna.

⁶ Ña chashna acllashpaca, Jesús acllashca huillaccunapacmanmi pushamurcacuna. Paicunaca chai runacunapac uma jahuapi maquita churashpami, Taita Diosman mañarcacuna.

⁷ Jerusalenpica Diosmanta alli huillaita ashtahuan huillacpimi, achca gentecuna Jesusta crishpaca, achca criccuna tucurcacuna. Shinallatac Israel*f** curacunapish, achcacunami Jesusta crishpa cazurcacuna.

Estebanta prezu japishcamanta

⁸ Estebanca Dios c'uyashca cashcamantami, imatapish ruhuaclla carca. Chaimantami pi mana ruhuaipaccunatapish, pi mana ricushcacunatapish israelcunapurapica*f** ruhuac carca.

⁹ Chashna ruhuashpa puricucpimi, maijan runacunaca Estebanhuan rimarinacui callarircacuna. Paicuna tandanacuna huasica: “Servic cashcamanta cacharichishca” shutitami charirca. Paicunapurapica Cirene pueblomanta, Alejandría pueblomanta, Cilicia llactamanta, Asia llactamantapish carcacunami.

¹⁰ Ashtahuanpish Diospac Espíritu yuyaita cushpa Estebanta rimachicucpimi, chai runacunaca ashtahuan mana rimanacui pudircacuna.

¹¹ Chaimantami llullachun, shuc runacunaman cullquita cushpaca: “ ‘Ñucanchicca cai runataca Moisestapish, Diostapish c'amishpa rimactami uyarcanchic’ ninguichic” nircacunami.

¹² Paicuna chashna llullacpimi, israelcunata cunac yuyaccunapish, mandashcacunata yachachiccunapish, tucui chaipi caccunapish Estebanta p'iñai callarircacuna. Chaimantami paita japishpa, mandaccunapuralla tandanacushcapacman aparcacuna.

¹³ Shinallatac llullachun nishca runacunatapish pushamucpica, paicunaca: —Cai runaca Diospaclla cac huasitapish, Moisés mandashcacunatapish c'amishpa:

¹⁴ ‘Nazaret pueblomanta Jesusca Diosman mañana huasita urmachingami. Moisés ñucanchicta yachachishcatapish chingachishpa, shuc layatami yachachinga’ nictami uyarcanchic— nircacuna.

¹⁵ Chaipi tucui tiyacuc mandaccuna Estebanta ricushpaca, paipac ñahuica ángel shina cashcatami ricurcacuna.