HECHOS 4 - Nuevo Testamento en Quichua Cañar 1996

Mandaccunapacman Pedrotapish, Juantapish apashcamanta

¹ Pedropish, Juanpish gentecunaman huillacucpiracmi, Israel*f** curacunapish, Diosman mañana huasita cuidaccunata mandacpish, shinallatac saduceocunapish*f** cungailla paicunapacman chayarcacuna.

² Pedropish Juanpish: “Jesús huañushcacunapuramanta causarishpa, tucui huañushcacuna causarina cashcatami ricuchin” nishpa, gentecunaman yachachicushcamantami p'iñarircacuna.

³ Chaimantami paicunata japishpa, ña chishi cashcamanta cayandic tutamantacaman carcelpi churarcacuna.

⁴ Chashna ruhuacpipish, paicuna huillashcata uyashpa criccunaca c'aricunallami pichca huaranga shina carca.

⁵ Cayandic punzhaca israelcunata*f** mandaccunapish, cunac yuyaccunapish, mandashcacunata yachachiccunapish Jerusalenpimi tandanacurcacuna.

⁶ Curacunata jatun mandac cura Anasca Caifasndic, Juandic, Alejandrondic, curacunata jatun mandac curapac tucui familiacunandicmi chaipi carcacuna.

⁷ Pedrotapish, Juantapish paicuna tandanacushca ñaupaman c'ayachishca chayamucpica: —Cancunaca, ¿pi mandacpitac, pihuan cashpatac chai mana puric runata chashna alliyachircanguichic?— nishpami tapurcacuna.

⁸ Chashna tapucpi, Pedroca Diospac Espirituhuan cashpami: —Israelcunata mandaccunalla, cunac yuyaccunalla,

⁹ cunan cancunaca shuc ungushca runata alliyachishpa allita ruhuashcamantami ‘¿ima shinatac alliyachircanguichic?’ nishpa tapunguichic.

¹⁰ Cancunapish, tucui israelcunapish alli yachachunca, cashnami nini: Nazaret pueblomanta Jesucristotaca, cancunami chacatashpa huañuchircanguichic. Cancuna huañuchicpipish, Taita Diosmi paitaca huañushcacunapuramanta causachirca. Chai Jesusllatac alliyachicpimi, cai runaca cancunapac ñaupapi alli tucushca shayacun.

¹¹ Jesusta chashna huañuchishpaca, cancunami huasita ruhuaccuna rumita mana nishpa shitac shina ruhuarcanguichic. Chai rumillatacmari, huasita ruhuangapac callaripi churana, tucuimanta yalli alli rumica tucushca.

¹² Cai pachapi causaccunata quishpichichunca, Jesusllatami Taita Diosca cacharca. Chaimanta ñucanchicta quishpichingapacca, pi shuctac Quishpichicca mana tiyanchu— nirca.

¹³ Pedropish Juanpish mana manchashpa, allita rimacta uyashpami, chai mandaccunaca: —¿Ima shinatac cai maipi yachacungapacllapish mana rishca, yanga runacunaca chashna rimancunayari?— nishpa, mana amirircacuna. Chaimantami paicunaca Jesushuan puriccuna cashcata yachac chayarcacuna.

¹⁴ Chai alliyashca runapish Pedrohuan, Juanhuan shayacucta ricushpami, paicunataca imata mana juchanchipac cacpi, upalla saquircacunalla.

¹⁵ Chaimanta paicunata canzhaman cachashpaca, mandaccunapurallami parlanacurcacuna.

¹⁶ Paicuna parlanacushpaca: —Cai runacunataca, ¿imatatac ruhuanchic? Paicuna pi mana ruhuaipacta ruhuashcataca, Jerusalenpi causaccunapish tucuimi alli yachancuna. Chaimanta ñucanchic ‘mana chashna ruhuarcachu’ nishpaca, mana ni pudinchicchu.

¹⁷ Chashna cacpipish, paicuna chashna alliyachishca maipipish ama yacharichunca, paicunataca: ‘Cunanmanta pacha pacta piman ashtahuan chai Jesusmanta huillanguichicman’ nishpa manchachishun— ninacurcacuna.

¹⁸ Chashna ninacushca q'uipami, paicunata c'ayashpaca: —Chai Jesusmantaca, ama ashtahuan piman huillashpa yachachinguichicchu— nircacuna.

¹⁹ Shina nicpipish Juanpish, Pedropish cutimushpaca: —Cancunallatac alli yuyarichic. Taita Diosmanca, paita cazunapac randica, ¿cancunata cazunachu ashtahuan alli canga?

²⁰ ¡Ñucanchicca ñucanchic imalla ricushcata, uyashcata huillanataca manatac saquishunchu!— nircacuna.

²¹ Chashna nicpica, ashtahuan manchachishun nishpami mandaccunaca: —¡Paimantaca pacta piman huillanguichicman!— nircacuna. Pedropish Juanpish chai runata alliyachishcamantami, tucui gentecuna Taita Diosta “allimari cangui” nircacuna. Chaimantami mandaccunaca mana macashpa cacharircacunalla.

²² Pi mana alliyachipacta alliyachishca runaca, chuscu chunga huata yallitami charirca.

Mana manchashpa huillachun, criccuna Taita Diosman mañashcamanta

²³ Mandaccuna paicunata ña cacharicpica, Pedroca Juandic caishuc criccunapacman shamushpaca, curacunata mandac curacunapish, cunac yuyaccunapish ima nishcataca paicunaman tucuimi parlarcacuna.

²⁴ Chashna parlacpica, tucuimi shuc yuyailla Taita Diosman cashna nishpa mañarcacuna: “Ñucanchicta Mandac Dioslla, canmi jahua pachatapish, cai pachatapish, mama cuchatapish, chaicunapi tucui ima tiyactapish ruhuarcangui.

²⁵ Canta cazuc Davidman yuyaita cucpimi, cashna nishca: ‘Mana israelcunaca,*f** ¿ima nishpatac chashna p'iñarincuna? ¿Ima nishpatac manapish caipaccunata ruhuashun nincuna?

²⁶ Cai pachapi jatun mandaccunapish, shinallatac llactata mandaccunapish Mandac Diosta p'iñashpa, pai cachashca Quishpichic Cristotapish p'iñashpami, macashun nishpa tandanacuncuna’ nishcami.

²⁷ Chashna nishca shinallatacmi, cai pueblopica mandac Herodesca Poncio Pilatohuan, israelcunandic*f** mana israelcunandic tandanacurcacuna. Chashna tandanacushpaca, can quishpichichun cachashca, manapish juchayuc Jesusta p'iñashpami, shuc yuyailla tucurcacuna.

²⁸ Chashna ruhuashpaca, can ñaupaman alli yachashpa, chashna tucuchun nishcatami paicunaca pactachircacuna.

²⁹ Cunanca Mandac Dioslla, paicuna manchachina yuyaihuan jarcashcata ricuiyari. Ñucanchic can mandashcata ruhuaccunataca, imatapish mana manchashpa, canmanta huillaccunata ruhuaiyari.

³⁰ Shinallatac can quishpichichun cachashca Jesushuanca, ungushcacunata alliyachiccuna cachun, pi mana ruhuaipaccunata ruhuaccuna cachunpish, ñucanchictaca ruhuaiyari. Canca imatapish ruhuacllami cangui” nishpami mañarcacuna.

³¹ Chashna mañashca q'uipaca, paicuna tandanacushca tiyacuc huasica chucchurcami. Diospac Espíritu tucui chaipi caccunapac shungupi junda cacpimi, paicunaca mana manchashpa, Diosmanta huillarcacuna.

Tucui ima charishcacunapish tucuipac cashcamanta

³² Criccunaca achca cashpapish, tucuimi shuc shungulla, shuc yuyailla carcacuna. Pi “caica ñucapacmi, chaica cambacmi” mana ninacucchu carca. Chaimantami ima charishcacunapish tucuipac carca.

³³ Jesús acllashca huillaccunaca: “Apunchic Jesusca causarircami” nishpa, shungupi yaicuctami huillarcacuna. Taita Diosca criccunata mai c'uyashcamantami, imapish allicunataca tucuiman yallita curca.

³⁴ Chashna cacpimi, paicunapurapica maijanpish ima illaclla mana causarcacuna. Maijanpish chariccunaca allpacunatapish, huasicunatapish c'atushpa,

³⁵ cullquitaca Jesús acllashca huillaccunamanmi cuccuna carca. Chashna cushcataca paicunaca mana chariccunamanmi imalla illashcata randichun cuccuna carca.

³⁶ Chipre llactamanta curacunata ayudac levita José runapish, criccunahuanmi carca. Paitaca Jesús acllashca huillaccunaca Bernabetami shutichircacuna. Bernabé shutica: “Cushichic runa” nisha ninmi.

³⁷ Chai runaca pai charishca allpata c'atushpami, chai cullquitaca Jesús acllashca huillaccunaman curca.