HECHOS 24 - Nuevo Testamento en Quichua Cañar 1996

Pablo pai ima shina cashcata mandac Felixman huillashcamanta

¹ Pichca punzha q'uipami, Pablota mandac Felixpac ñaupapi juchanchingapacca, Israel*f** curacunata jatun mandac Ananías curaca, maijan cunac yuyaccunandic, mandashcacunata yachac Tértulo runandic, Cesarea puebloman rircacuna.

² Pablota Felixpac ñaupaman apamucpica, chai Tértulo runaca Pablota juchanchingaraicumi, mandac Felixtaca: —Canca alli yachac cashpami, ñucanchictaca alli mandacungui. Canmantami ñucanchicca alli sumacta causacunchic.

³ Chashna sumacta causacushcamantami, tucui mashna alli nishca can mandac Felixtaca pagui nicunchiclla.

⁴ Cunanca mana ashtahuan p'iñachisha ninichu. Chaimanta cai nishcallata uyashpa cui:

⁵ Cai runaca puric ung:ui shinami, maipipish israelcunataca*f** pandata yachachishpa, macanacuipi churashpa puricushca. Paica Nazaret pueblomanta Jesús yachachishcata c'aticcunata pushacmi cashca.

⁶ Diosman mañana huasitapish mana Diospac cashca shinatami ruhuashpa puricushca. Chaimantami paitaca ñucanchicta mandashcacunapi nishca shina tapushun nishpa japircanchic.

⁷ Chashna japishpa charicucpimi, huaranga soldadocunata mandac Lisiasca p'iñarishpa, shamushpa quichurca.

⁸ Chashna quichushpami, paita juchanchiccunataca can mandac Felixpac ñaupapi tapuchun nirca. Cunanca canllatac ñucanchic imamanta juchanchicushcataca tapuilla— nirca.

⁹ Chaipi cac israelcunapish: —Ari, chashnatacmi— nircacuna.

¹⁰ Shina nicpi, chai mandacca Pablota maquihuan seña ruhuashpa ricuchicpica, Pabloca: —Canca tauca huatacunata cai llactata alli mandac cashcata yachanimi. Chaimantami ñuca ima shina cashcataca cushicushpa huillasha nini.

¹¹ Jerusalenpi Taita Diosman mañangapac ñuca rishcaca, cunan chunga ishcai punzhacunallami tucun. Chaitaca caipi caccunamanpish tapuilla.

¹² Chai pueblopica Diosman mañana huasipipish, tandanacuna huasicunapipish, maipi cashpapish ñuca pihuan p'iñanacuchishpa rimanacuctaca, pi mana japishcachu.

¹³ Shinallatac cunan ñucata juchanchicushcataca, ‘chaica chashnatacmi’ nishpaca, pi mana ningachu.

¹⁴ Caillatami canman huillagrini: ‘Mana allita c'aticcunapurami’ nicucpipish, ñucaca Jesusta c'atishpa, ñaupa taitacuna shinallatac Taita Diosman mañacmi cani. Moisés mandashcacunapi imalla quillcachishcatapish, shinallatac ñaupa huillaccunaman Dios quillcachishcatapish, tucuitami crini.

¹⁵ Huañushcacunataca allicunata mana allicunatapish, Taita Diosca causachina cashcatami cushicushpa shuyacuni. Ñucata juchanchiccunapish chashnallatacmi shuyacuncuna.

¹⁶ Chaimantami ñucaca Taita Diospac ñaupapipish, gentecunapac ñaupapipish mana juchanchishca alli causanallata munani.

¹⁷ Tauca huatacunata shuc llactacunapi puricushca q'uipami, Diosman cushca cullquita ñuca llactapi causac huacchacunaman cungapac, shinallatac Diosman cuna cashcata cungapac Jerusalenmanca rircani.

¹⁸ Ña chaita cushpa, Taita Diospac ñaupapi alli ricuringapac armarishca q'uipaca, Asia llactamanta maijan israelcunaca Diosman mañana huasi ucupi ricurircallami. Ñuca mana taucacunahuan cacpimi, ima p'iñanacuipish mana tiyarca.

¹⁹ Chaicunami ñucata imata juchanchishun nishpaca, cambacman shamunman carcacuna.

²⁰ Ashtahuanpish paicuna mana shamushcamantaca, caipi caccunallatac ñuca ima mana allita ruhuashcataca canman huillachun. Paicunami caishuc mandaccunahuan tandanacushpa, ñucataca juchanchircacuna.

²¹ Paicunapac ñaupapi: ‘Huañushcacuna causarinata crishcallamantami, cunan cancunaca tapucunguichic’ nishpami, sinchihuan nircani. Chashna nishcallamantami, cunan paicunaca juchanchicuncuna— nirca.

²² Chashna nicta mandac Felix uyashpaca, Jesusta criccuna ima shina c'aticushcata yachashpami: —Huaranga soldadocunata mandac Lisias shamucpimi, cancuna imata nisha nishcataca alli yachashpa, imatapish nisha— nishpami saquircalla.

²³ Chaimantami Felixca pasac soldadocunata mandactaca: —Pablotaca ricurangui. Maijan paita ricungapac shamuccunatapish, imata cusha niccunatapish ama jarcanguichu— nishpami mandarca.

²⁴ Asha punzhacuna q'uipami, Felixca israelcunapuramanta cac paipac huarmi Drusilandic shamushpa, Pablota c'ayachirca. Chashna c'ayachishpaca, Jesucristota ima shina crinamantami tapurca.

²⁵ Pabloca Dios munashca shina causanamanta, mana alli munaita jarcarinamanta, imalla ruhuashcata Taita Dios taripana cashcamantapish huillacpimi, Felixca mancharishpa Pablotaca: —Cunanca rilla. Cutin uyasha nishpaca, c'ayachishallami— nirca.

²⁶ “Cacharichun nishpaca, cullquita cungami” yuyashpami, mandac Felixca tauca cutin Pablohuan parlanacungapac c'ayachic carca.

²⁷ Ña ishcai huata tucucpica, Felixca pai mandacushcamanta llucshircami. Chashna llucshicpimi, Porcio Festo runaca mandac tucurca. Felixca israelcunahuan alli ricurisha nishpami, Pablotaca prezullatac saquirca.