HECHOS 13 - Nuevo Testamento en Quichua Cañar 1996

Bernabepish, Saulopish shuctac llactacunapi huillagrishcamanta

¹ Antioquía pueblopi causac tandanacushca criccunapurapica, Diosmanta huillaccunapish, yachachiccunapish tiyarcami. Paicunapurapica Bernabepish, Niger nishca Simonpish, Cirene pueblomanta Luciopish, Galilea llactata mandac Herodeshuan huiñac Manaenpish, Saulopish carcami.

² Shuc punzha paicuna ayunashpa, Taita Diosman mañashpa tiyacucpimi, Diospac Espirituca: “Bernabetapish, Saulotapish ñuca ruhuai nishcata ruhuachun cachaichic. Paicunataca ñami acllarcani” nirca.

³ Ña ayunashpa mañashca q'uipaca, Bernabepac, Saulopac uma jahuapi maquita churashpami: “Allilla ringuichic” nishpa cacharcacuna.

Chipre llactapi alli huillaita huillashcamanta

⁴ Chashna Diospac Espíritu paicunata cachacpica, Bernabeca Saulondicmi Seleucia puebloman chayarcacuna. Seleuciamantami, barcopi tiyarishpa Chipre llactaman rircacuna.

⁵ Chai llactapi cac Salamina puebloman chayashpaca, israelcuna*f** tandanacuna huasicunapimi Diosmanta alli huillaita huillarcacuna. Marcos nishca Juanpish, paicunata ayudashpami purirca.

⁶ Tucui chai Chipre llactapi huillashpa puricushpaca, Pafos pueblomanmi chayarcacuna. Chaiman chayashpaca, israelcunapuramanta Barjesús brujo runahuanmi tuparcacuna. Paica: “Diosmantami huillacuni” nishpa, llullac runallami carca.

⁷ Chai brujoca Chipre llactata mandac Sergio Paulo runahuanmi apanacuc carca. Chai mandacca alli yachac cashpami, Bernabetaca Saulondic shamushpa Diosmanta huillachun c'ayac cacharca.

⁸ Paicuna ña huillangapac shamucpica, chai brujoca ama crichunmi chai mandactaca jarcarca. Chai brujollatacmi griego*f** rimaipica Elimas shutipish carca.

⁹ Saulopish Pablo shutimi carca. Paipac shungupi Diospac Espíritu junda cacpimi, chai brujota ricurashpaca:

¹⁰ —Canca diablopac huahua cashpami, tucui mana allillata ruhuashpa allitaca p'iñashpa, llullashpalla causangui. Mandac Dios munashca shina alli causasha nicuccunataca, ¿maicamantac pandachicungui?

¹¹ Cunanca Mandac Dios canta llaquichicpimi, canca imata mana ricungui. Tauca punzhacunacamanmi, inti achicyachishcatapish mana ricungui— nirca. Chashna nincami, brujopac ñahui amsayacpi, imata mana ricui pudishpa, maquimanta maijan aisac shamuchun mañacurca.

¹² Mandac Sergioca Apunchic Jesusmanta yachachishcata uyashpa, shinallatac chashna tucushcata ricushpacarin, mana amirishpami crirca.

Pabloca Bernabendic, Pisidia llactapi cac Antioquía pueblopi huillashcamanta

¹³ Pabloca paihuan puriccunandic barcopi huichicushpa, Pafos pueblomanta ricpica, Marcos nishca Juanca Jerusalenmanmi cutirca. Paicunaca Panfilia llactapi cac Perge pueblomanmi chayarcacuna.

¹⁴ Pabloca Bernabendic Pergemanta llucshishpaca, Pisidia llactapi cac Antioquía pueblomanmi rircacuna. Chaiman chayashpaca, samana punzha*f** cacpimi, israelcuna*f** tandanacuna huasiman yaicushpa tiyarircacuna.

¹⁵ Chaipi cacpimi, mandashcacunata Dios quillcachishcatapish, ñaupa huillaccunaman Dios quillcachishcatapish uyashca q'uipaca, chai tandanacuna huasipi mandaccunaca: —Huauquicuna. Imata cunashun nishpaca, cunaichiclla— nichun cacharcacuna.

¹⁶ Shina nicpi Pabloca jatarishpa, maquihuan “upalla caichic” nishpami, paicunataca: —Tucui caipi cac Israel huauquicunalla, Taita Diosta manchac caishuccunapish, ñuca ima nishcata uyaichic.

¹⁷ Ñucanchic israelcunataca Taita Diosmi ñucanchic ñaupa taitacunamanta pacha ñaupaman acllarca. Egipto llactaman rishpa causacucpipish, pai acllashcacunataca mana saquishpami, ashtahuan mirachirca. Chai q'uipami, tucui imatapish ruhuaclla Taita Diosca paicunataca chai llactamanta llucchirca.

¹⁸ Chashna llucchishpaca, shitashca pambapi chuscu chunga huatata paicuna mana allicunata ruhuacpipish, Taita Diosca mana saquircachu.

¹⁹ Chaipimi Taita Diosca Canaán nishca canchis llactacunapi causaccunata huañuchichishpa, ñucanchic ñaupa taitacunamanca chai allpataca curca.

²⁰ Chai q'uipaca, chuscu pasac pichca chunga huata shinatami, alli mandaccuna mandashca causachun ñaupa huillac Samuel mandana punzhacunacaman churarca.

²¹ Samuel mandacui punzhacunapimi, israelcunaca: ‘Shuc jatun mandactami ninchic’ nishpa mañarcacuna. Chashna mañacpimi, Taita Diosca Cis runapac churi Saulta chuscu chunga huatata mandachun curca. Chai Saulca Benjamín aillumantami carca.

²² Chai q'uipami Saulta llucchishpa, paipac randica Davidta jatun mandac cachun churarca. Taita Diosca Davidmanta nishpaca: ‘Isaipac churi Davidllami ñuca tucui ima nishcata ruhuashpa, ñuca munashca shina mandanga’ nirca.

²³ Israelcunata quishpichichunca, Davidpac huahua huahuacunapuramantami Taita Dios cusha nishca shinallatac, Jesustaca curca.

²⁴ Jesús manarac shamucpimi, Juanca israelcunaman huillashpaca: ‘Juchayuc cashcamanta llaquirishpa, Taita Diosman cutirishpa bautizarichic’ nirca.

²⁵ Juan ña pai huillana cashcata pactachicushpaca: ‘Cancunaca ñucataca, ¿pi cashcatatac yuyanguichic? Ñucaca mana cancuna shuyacushcachu cani. Shucmi ñucapac q'uipa shamunga. Ñucaca paipac ushuta huatashcallatapish mana pascaipacmi cani’ nishpami huillarca.

²⁶ Ñucanchic taita Abrahammanta mirarishca huauquicunalla, shinallatac Taita Diosta manchac caishuccunapish, cai quishpirinamanta huillashcaca cancunamanmi.

²⁷ Jerusalenpi causaccunapish, paicunata mandaccunapish, Jesús pi cashcataca mana yacharcacunachu. Diosmanta ñaupa huillaccuna huillashcata samana punzhacunapi rizashcata uyashpapish, mana entendishpami Jesusta huañuchishpaca, paicunallatac chai huillaccuna huillashcataca pactachircacuna.

²⁸ Paicunaca Jesusta imamanta mana huañuchi pudishpaca, mandac Pilato huañuchichichunmi mañarcacuna.

²⁹ Jesusmanta Dios quillcachishcapi tucui nishcacunata pactachishca q'uipaca, chacatashcamanta uricuchishpami enterrarcacuna.

³⁰ Paicuna chashna ruhuacpipish, Taita Diosca huañushcacunapuramantami causachirca.

³¹ Chashna causachicpica, utcapi Galilea llactamanta Jerusalenman paihuan puriccunallamanmi, tauca punzhacunacaman ricurirca. Cunanca chaita ricuccunami, tucui ñucanchic israelcunamanca paimanta huillacun.

³² Ñucanchic ñaupa taitacunamanmi: ‘Cancunapac huahua huahuacunaman Quishpichicta cushami’ Taita Dios nishca carca. Chai Quishpichicmantami cunanca cancunaman huillacunchic.

³³ Jesusta causachishpa ñucanchicman cushpami, Taita Dios chai cusha nishcataca pactachishca. Chaimantami Taita Diosca q'uipa Salmopica: ‘Canca ñuca Churimi cangui. Cunanca ñuca Huahuatacmi cangui’ nin.

³⁴ Shinallatac Taita Diosca: ‘Davidta llaquishpa, allicunata cusha’ nishcamantami, Jesusta huañushcacunapuramanta causachishpaca, ña mana cutin huañushpa ismuchun paipac cuerpotaca mana saquircachu.

³⁵ Davidpish shuc Salmopica: ‘Cambaclla causactaca, cuerpo ismuchunpish mana saquinguichu’ ninmi.

³⁶ Davidca pai causai punzhacunapi causaccunataca, Dios munashca shinami servirca. Chashna cashpapish paica huañurcami. Chashna huañucpica, paipac ñaupa taitacuna enterrashcapimi enterrarcacuna. Paipac cuerpopish ismurcami.

³⁷ Ashtahuanpish Taita Dios causachishca Jesuspac cuerpoca, manatac cutin huañushpa ismurcachu.

³⁸ Caipi tandanacushca tucui huauquicunalla, cai ñuca huillashcata alli yachaichic: Cancuna Jesusta cricpimi, Taita Diosca cancunapac juchacunata perdonanga.

³⁹ Moisés mandashcacunata pactachishpaca, Taita Dioshuanca mana alli tucui pudishcanguichicchu, ashtahuanpish Jesusta cricpimi, Taita Diosca paihuan alli tucuchun pitapish chasquin.

⁴⁰ Chaimanta alli yuyarichic. Ñaupa huillaccunaman Taita Dios ima shina huillachishcaca, pacta cancuna chashna tucunguichicman. Paica cashnami nishca:

⁴¹ ‘Uyaichic, ñuca ima nishcata mana cazushpa burlaccuna. Mancharishpa, maipi miticuichic. Cancuna causacuc punzhacunapica, mancharinacunatami ruhuasha. Chaita pi huillacpipish, mana cringuichicchu’ nishcami— nirca.

⁴² Chashna yachachishpa Pablo, paihuan caccunandic tandanacuna huasimanta llucshicucpica, mana israelcunaca:*f** —Cunan shina samana punzhapish, caillamantatac yachachic shamunguichicyari— nircacuna.

⁴³ Ña tucui chaipi caccuna llucshicpica, tauca israelcunapish, israelcuna yachachishcata alli c'aticcunapish Pablota, Bernabetami c'aticurcacuna. Chai c'aticcunataca: —Taita Diosta tucui shunguhuan alli c'atinguichic. Taita Dios mai c'uyacushcatapish ama cungaringuichicchu— nishpami, cunashpa saquircacuna.

⁴⁴ Chai q'uipa, samana punzha chayamucpica, chai pueblopi causaccunaca maijancunalla saquirishpami, achcacuna Diosmanta alli huillaita uyangapacca tandanacurcacuna.

⁴⁵ Chashna mana israelcunapish achcacuna tandanacushcata israelcuna ricushpami, p'iñarishpa: “Pablo yachachishcaca yangallami” nishpa c'amircacuna.

⁴⁶ Chashna rimacucpipish, Pabloca Bernabendic mana manchashpami, cashna nishpa huillarcacuna: —Cancuna israelcunamanracmi, Diosmanta alli huillaita huillana carcanchic. Cai huillashcata cancuna mana uyashun nishpa, huiñai causaita mana chasquishun nircanguichicchu. Chaimanta cunanllatacmi, mana israelcunaman huillangapac rigrinchic.

⁴⁷ Mandac Diosca ñucanchicta mandashpaca: ‘Mana israelcunaman luz shina achicyachichunmi, cantaca churarcani. Tucui cai pachapi causaccunapish can huillashcamanta quishpirichunmi, chashna churarcani’ nishcami— nircacuna.

⁴⁸ Chashna nicta mana israelcuna uyashpaca: “¡Diosmanta alli huillaica sumacmari!” nishpami, munai cushicurcacuna. Huiñai causaita charichun Taita Dios acllashcacunaca, tucuimi crircacuna.

⁴⁹ Chashnami, Diosmanta alli huillaitaca tucui chai llactapi huillarcacuna.

⁵⁰ Ashtahuanpish: “Chai runacunata c'atishpa cachashunchic” nishpami, israelcunaca gentecunapac alli nishca, Diosta yuyaric huarmicunatapish, shinallatac chai pueblota mandaccunatapish cunarcacuna. Chaimantaca Pablotapish, Bernabetapish llaquichishpami, chai llactamantaca llucchishpa cacharcacuna.

⁵¹ Chashna ruhuacpica, mana chasquishun nishcata ricuchingapacmi, chaquipi c'atirishca allpatapish chaspishpa shitashpa, Iconio puebloman rircacuna.

⁵² Chai pueblopi causac criccunaca Diospac Espíritu shungupi junda cacpimi, munai cushicurcacuna.