HECHOS 11 - Nuevo Testamento en Quichua Cañar 1996

Jerusalenpi tandanacushca criccunaman imalla tucushcata Pedro huillashcamanta

¹ Diosmanta alli huillaita mana israelcunapish*f** crishcatami, Jesús acllashca huillaccunapish, Judea llactapi causac criccunapish yachac chayarcacuna.

² Chaimanta Jerusalenman Pedro cuticpica, circuncisionta*f** ruhuac criccunaca paita rimarcacuna.

³ Paicunaca: —¿Ima nishpatac canca chai manapish circuncisionta ruhuaccunapac huasiman rishpa, paicunahuan micurcangui?— nishpa rimarcacuna.

⁴ Shina rimacpimi, Pedroca tucui imalla tucushcata callarimanta alli parlashpa:

⁵ —Ñucaca Jope pueblopi Taita Diosman mañacushpami, muscuipi shina ricushpaca, jatun lienso chuscu puntapi huatashca shina, jahua pachamanta shamushpa ñucapacman cuchuyamuctami ricurcani.

⁶ Chaita alli ricushpaca, charina animalcuna, sachapi causac p'iña animalcuna, allpata aisarishpa puric animalcuna, shinallatac alasyuc animalcunapish chaipi cactami ricurcani.

⁷ Chaita ricucucpica: ‘Pedro, jatari. Caicunata huañuchishpa micui’ nishcami uyarirca.

⁸ Shina nicpi ñucaca: ‘Mana, Apunchic Jesús. Israelcuna*f** millashpa, mana micuna cashcataca jaicapi mana micushcanichu’ nircanimi.

⁹ Ñuca chashna nicpi, jahua pachamanta cutin rimashpaca: ‘Dios micunallami nishcataca, mana micunachu nishpaca, ama nichu’ nishcami uyarirca.

¹⁰ Chai lienso quimsa cutin ricurishpaca, jahua pachallamantac cutin chingarircallami.

¹¹ Shina cacpica, Cesarea pueblomanta cachashca quimsa runacuna ñuca maipi cac huasiman mashcashpa chayarcacunallami.

¹² Chashna paicuna shamucpica, Diospac Espiritumi ñucataca: ‘Ama caita chaita nirishpa, paicunahuan rilla’ nirca. Caipi cac sucta criccunandicmi, chai cachac runapac huasimanca rircani.

¹³ Chai runaca paipac huasipi ángel ricurishpa, cashna nishcatami parlashca carca: ‘Pedro nishca Simonta Jope pueblomanta pushamuchun cachai.

¹⁴ Canpish, cambac huasi familiacunandic ima shina quishpirina cashcataca paimi huillanga’ nishca carca.

¹⁵ Ña ñuca paicunaman huillai callaricpica, sarun ñucanchicman shamuc shinallatacmi, Diospac Espirituca paicunamanpish shamurca.

¹⁶ Chashna shamucpimi: ‘Juanca yacullahuanmi bautizarca. Ashtahuanpish cancunaca asha punzhacuna q'uipaca, Diospac Espirituhuanmi bautizashca canguichic’ nishpa, Apunchic Jesús huillashcataca yuyarircani.

¹⁷ Apunchic Jesucristota ñucanchic cricpi, Taita Dios paipac Espirituta cushca shinallatacmi, paicunamanpish curca. Taita Dios chashna ruhuacucta jarcangapacca ñucaca, ¿imatac caniyari?— nirca.

¹⁸ Chashna nicta paicuna uyashpaca, ña mana imata nircacunachu. Ashtahuanpish: —¡Mana israelcunapish Taita Diosman cutirishpa, huiñai causaita charichunmi saquishca!— nishpami, Taita Diostaca “allimari cangui” nircacuna.

Antioquía pueblopi causac tandanacushca criccunamanta

¹⁹ Estebanta huañuchishpaca, caishuc criccunatapish llaquichi callaricpimi, maijan criccunaca Fenicia llactamanpish, Chipre llactamanpish, Antioquía pueblomanpish urata janacta miticushpa rircacuna. Paicuna chai llactacunaman rishpaca, quishpirinamanta alli huillaitaca israelcunallamanmi*f** huillarcacuna.

²⁰ Chashna cacpipish Chipre llactamanta, Cirene pueblomanta, Antioquía puebloman shamuc maijan criccunaca, mana israelcunamanpish*f** Apunchic Jesusmanta alli huillaitaca huillarcacunallami.

²¹ Taita Dios paicunahuan cacpimi, achcacuna Apunchic Jesusta crishpa, ñaupa mana alli causaita saquircacuna.

²² Jerusalenpi tandanacushca criccuna chaita yachashpaca, Bernabetami Antioquía puebloman cacharcacuna.

²³ Bernabé chaiman chayashpaca, Taita Diosca mai c'uyashpa, quishpichishcata ricushpaca cushicurcami. Paica tucui criccunatami: “Apunchic Jesusllata tucui shunguhuan alli cazunguichic” nishpa cunarca.

²⁴ Bernabeca alli runa, alli cric, Diospac Espíritu paipac shungupi junda cacpimi, pai huillacpica achca gentecuna Apunchic Jesusta crircacuna.

²⁵ Chashna achcacuna cricpimi, Bernabeca Tarso pueblopi Saulota mashcangapac rirca. Chaipi tupashpaca, Antioquía pueblomanmi pushamurca.

²⁶ Chaipica huata jundatami achcacunaman yachachishpa, criccunahuan tandanacushpa causarcacuna. Chai pueblopimi criccunataca: “Cristota c'aticcunami” nishpa, punta c'ayai callarircacuna.

²⁷ Chai punzhacunapimi, Diosmanta huillaccunaca Jerusalenmanta Antioquía puebloman shamurcacuna.

²⁸ Chai huillaccunapuramantaca Agabo runa shayarishpami, Diospac Espíritu yuyaita cucpi: “Tucui llactacunapi ima mana p'ucucpi yarcaimi tiyanga” nishpa huillarca. Chaica jatun mandac Claudio mandacui punzhacunapimi, chashna tucurca.

²⁹ Chashna huillacpimi, Antioquía pueblopi causac criccunaca paicuna imallata cui pudishcataca, Judea llactapi causac criccunaman cuchun cachanata yuyarircacuna.

³⁰ Paicuna ña chashna ruhuashpaca, Judea llactapi causac criccunata pushaccunaman cuchunmi, Bernabeman, Sauloman mingashpa cacharcacuna.