HECHOS 10 - Nuevo Testamento en Quichua Cañar 1996

Corneliomanpish, Pedromanpish Taita Dios huillashcamanta

¹ Cesarea pueblopica, Cornelio runami causarca. Paica Italia llactamanta pasac soldadocunata mandacmi carca.

² Chai runaca paipac tucui familiandicmi Diosta manchac, yuyaric, mañarac carca. Shinallatac israelcunapurapi*f** huacchacunaman cullquita cucmi carca.

³ Shuc punzha chaupi chishi shinata Taita Diosman mañacucpimi, Dios cachashca angelca muscuipi shina cungailla ricurishpaca: —Cornelio— nirca.

⁴ Chaita uyashpa, Cornelio manchailla saquirishpami, angelta ricushpaca: —Amito, ¿imatatac ningui?— nirca. Chashna nicpi angelca: —Huacchacunaman cushpa, can Taita Diosman mañashcataca, paica chasquishcami.

⁵ Cunanca Jope pueblomanta Pedro nishca Simonta pushamuchun cachai.

⁶ Paica carata ñutuyachic Simonpac huasipimi pozacun. Chai huasica mama cucha patapimi. Pai shamushpami, can imalla ruhuana cashcataca huillanga— nirca.

⁷ Ña chai ángel ricpi, Cornelioca ishcai servic runacunata, shinallatac soldadocunamantaca paitapish, Diostapish alli cazuc shuc soldadotami c'ayarca.

⁸ Chai quimsa runacunamanmi tucui imalla tucushcata, ricushcata parlashpa, Jope puebloman cacharca.

⁹ Cayandic punzha chai cachashca runacuna Jope puebloman ñanta shamucucpica, ña chaupi punzha shina cacpimi, Pedroca pai pozana huasi jahuaman huichicushpa, Taita Diosman mañacurca.

¹⁰ Pedro chaipi cashparac munai yarcachicushpami, micunata huasiyuc ruhuangacaman muscuipi shina ricushpa,

¹¹ jahua pacha pascarictapish, shuc jatun lienso shina chuscu puntapi huatashca, pai tiyacucman urai shamucuctapish ricurca.

¹² Chai jatun liensopica chuscu chaquiyuc animalcunatapish, allpata aisarishpa puric animalcunatapish, alasyuc animalcunatapish ricurca.

¹³ Chaicunata ricucucpica: —Pedro, jatari. Caicunata huañuchishpa micui— nishcami uyarirca.

¹⁴ Shina nicpi Pedroca: —Mana, Apunchic Jesús. Israelcuna*f** millashpa, mana micuna cashcataca, jaicapi mana micushcanichu— nirca.

¹⁵ Shina nicpi cutin rimashpaca: —Dios micunallami nishcataca mana micunachu nishpaca, ama nichu— nishcami uyarirca.

¹⁶ Chai jatun lienso ña quimsa cutin ricurishpaca, jahua pachaman apacpi chingarircallami.

¹⁷ Chaita Pedro ricushpaca: “¿Imatashi cai ricushcaca nisha nin?” nishpa yuyacucpica, Cornelio cachashca runacunaca tapushpa, tapushpa Simonpac huasiman cungailla chayarcacunallami.

¹⁸ Paicuna chai punguman chayashpaca: “Pedro nishca Simonca, ¿caipichu canga?” nishpami tapurcacuna.

¹⁹ Chai muscuipi shina ricushcata Pedro yuyaricucpiracmi, Diospac Espirituca: “Riqui, cantaca quimsa runacunami mashcacun.

²⁰ Paicunataca ñucami caiman cacharcani. Chaimanta ama caita chaita nirishpa jatari, uricui. Paicunahuan rilla” nirca.

²¹ Chashna nicpi Pedroca Cornelio cachashca runacunapacman uricumushpami: —Ñucami cancuna mashcacushca Simón Pedroca cani. ¿Imatatac nicunguichic?— nirca.

²² Chashna nicpi paicunaca: —Ñucanchicca pasac soldadocunata mandac Cornelio cachacpimi shamunchic. Paica Diosta cazushcamanta tucui israelcuna alli nishca runami. Paimanmi Dios cachashca ángel ricurishpaca, paipac huasiman canta pushamuchun, shinallatac can ima huillashcatapish uyachun nishca— nircacuna.

²³ Shina nicpi, Pedroca pai pozacuc huasillapitacmi paicunata chai tutaca pacarichirca. Ña cayandic punzha Pedro paicunahuan ricucpica, Jope pueblopi causac maijan criccunapish rircacunami.

²⁴ Minchandic punzha ña Cesarea puebloman chayacpica, Cornelioca paipac tauca familiacunandic, paipac alli ricsishcacunandicmi tandarishpa, shuyacushca carcacuna.

²⁵ Corneliopac huasiman Pedro chayacpica, Cornelio tupangapac llucshishpami, Taita Diosta shina Pedrotaca cungurishpa alli ni callarirca.

²⁶ Chashna cunguricpimi Pedroca: —Shayari. Ñucapish can shina runallatacmi cani— nishpa jatarichirca.

²⁷ Pedro shina parlaihuan, parlaihuan huasi ucuman yaicushpaca, achca gentecuna tandanacushcahuanmi tuparirca.

²⁸ Chaipimi Pedroca: —Israelcunaca mana israelcunahuanca*f** mana tandanacunalla cashcataca, cancunallatac yachanguichicmi. Paicunapac huasillamanpish mana chayarina cashcataca yachanguichicmi. Ashtahuanpish Taita Dios ñucaman ricuchishpaca: ‘Pitapish mana alli nishpaca, ama millanguichu’ nircami.

²⁹ Chaimantami can cachashca runacuna ñucapacman chayacpica, imamantapish mana jarcarishpa shamuni. Cancunaca, ¿imapactac c'ayachircanguichic?— nirca.

³⁰ Shina nicpi Cornelioca: —Sarun, cunan shina chishipimi, cai ñuca huasipi ayunashpa, Diosman mañacucpi, jagan nicuc churanata churashca runa ñapish ricurirca. Chaica ña chuscu punzhami tucun.

³¹ Chashna ricurishpaca: ‘Cornelio, can mañashcataca Taita Diosca uyashcami. Shinallatac can tucui imallacunata mana chariccunaman cushcacunatapish ricushcami.

³² Cunanca Jope pueblopi cac, Pedro nishca Simonta pushamuchun cachai. Paica carata ñutuyachic Simonpac huasipimi. Chai huasica mama cucha patapimi. Pai shamushpami, can imata ruhuana cashcataca huillanga’ nirca.

³³ Chaimantami ñucaca canta pushamuchun cacharcani. Allitacmi shamushcangui. Cunanca tucuimi Taita Diospac ñaupapi canchic. Pai tucui imallata ñucanchicman huillachun nishcataca huillailla. Ñucanchicca uyashun ninchicmi— nirca.

Corneliopac huasipi Pedro huillashcamanta

³⁴ Chaimantami Pedro huillai callarishpaca: —Pi cashpapish Taita Diospac ñaupapica: ‘Caica allimi, chaica mana allichu’ ninaca mana alli cashcataca, cunanmi alli yachani.

³⁵ Mai llactapipish Diosta manchashpa allita ruhuaccunataca, Taita Diosca alli nicmi cashca.

³⁶ Taita Diosca paihuan alli tucushpa sumacta causachunmi, israelcunamanca*f** tucuita Mandac Jesucristotaca quishpirinamanta huillachun cacharca.

³⁷ Juan bautizarinamanta huillashca q'uipaca, Galilea llactamanta callarishpa, Judea llactacaman ima tucushcataca cancunallatac alli yachanguichicmi.

³⁸ Nazaret pueblomanta Jesusmanca tucui imatapish ruhuaclla cachunmi, Taita Diosca paipac Espirituta curca. Taita Dios paihuan cacpimi, Jesusca maipipish allita ruhuashpa, Satanás*f** llaquichicushcacunatapish alliyachishpa purirca.

³⁹ Ñucanchicca Jerusalén pueblopipish, Judea llactapipish Jesús tucui imalla ruhuashcacunata ricushpa, huillaccunami canchic. Chai tucui allita ruhuacucpipish, paitaca cruzpi chacatashpami huañuchircacuna.

⁴⁰ Chashna huañuchicpipish, Taita Diosca quimsa punzhapi causachishpami, ñucanchicman cutin ricuchirca.

⁴¹ Mana tucuimanchu ricuchirca. Ñucanchic imalla ricushcata huillachun nishca, Dios ñaupaman acllashcacunallamanmi ricuchirca. Huañushcacunapuramanta Jesús causaricpica, ñucanchicca paihuanmi micurcanchic, ubiarcanchic.

⁴² Taita Diosca: ‘Mandac cashcahuanca Jesusmi huañushcacunatapish, causaccunatapish taripanga’ nishcami. Ñucanchicca chaita huillaccunami canchic.

⁴³ Diosmanta ñaupa huillaccunapish, tucuimi Jesusmanta huillashpaca: ‘Paita criccunallatami juchata ruhuashcamanta perdonanga’ nishpami huillarcacuna— nirca.

Mana israelcunamanpish Diospac Espíritu shamushcamanta

⁴⁴ Pedro chashna huillacucpiracmi, chai huillashcata tucui uyaccunapac shungumanca Diospac Espíritu shamurca.

⁴⁵ Pedrohuan shamuc Jesusta cric israelcunaca,*f** Taita Diosca paipac Espirituta mana israelcunamanpish*f** cushcata ricushpami mancharircacuna.

⁴⁶ Jaicapi mana uyashca rimaicunahuan Taita Diosta “allimari cangui” nicucta uyashcamantami, chashna mancharircacuna.

⁴⁷ Chaimantami Pedroca: —Paicunapish ñucanchic shinallatacmi, Diospac Espiritutaca chasquincuna. Chaimanta paicuna bautizarichunca, pi mana jarcangachu— nirca.

⁴⁸ Shina nishpami Pedroca: —Apunchic Jesuspac shutipi paicunata bautizaichic— nirca. Chai q'uipami Pedrotaca: —Asha punzhacunacaman ñucanchichuan saquiriyari— nishpa mañarcacuna.