HECHOS 1 - Nuevo Testamento en Quichua Cañar 1996

Jesusca: “Diospac Espirituta cachashami” nishcamanta

¹ C'uyashca Teófilo. Jesús imallata ruhuashpa yachachishcataca, ñami punta librollapitac callarimanta pacha quillcashpa cacharcani.

² Apunchic Jesusta Taita Dios manarac jahua pachaman pushacpimi, huillagrichun acllashcacunamanca Diospac Espíritu yuyaita cushpa, imalla ruhuana cashcata yachachirca.

³ Jesús huañushca q'uipaca, pai causarishcata alli yachachunca, chuscu chunga punzhacunacamanca tauca cutinmi paicunaman ricurirca. Chashna ricurishpami, Taita Dios mandacucmanta paicunaman yachachirca.

⁴ Paicunahuan cashparacmi, Jesusca: —Ñuca huillashca shina, ñuca Taita cusha nishca paipac Espíritu shamungacaman, Jerusalén pueblomantaca amarac maiman rishpa, shuyacunguichiclla.

⁵ Juanca yacullahuanmi bautizarca, ashtahuanpish asha punzhacuna q'uipaca, Taita Diosca paipac Espirituhuanmi cancunataca bautizanga— nishpami mandarca.

Jahua pachaman Jesús rishcamanta

⁶ Chaipi tandanacushca caccunami Jesustaca: —Apunchic Jesús, ¿cunanllatacchu Israel*f** llactataca, ñucanchicpurallatac cutin mandachun cungui?— nishpa tapurcacuna.

⁷ Chashna nicpi Jesusca paicunataca: —Chashna tucuchunca, ñuca Taitallami pactachinga. Cancuna ima huata, ima punzha chashna tucuna cashcata yachachunca, Taita Diosca mana saquinchu.

⁸ Shina cacpipish, Diospac Espíritu cancunapacman shamucpimi, tucui imatapish ruhuai pudinguichic. Chaimantami Jerusalén pueblopipish, tucui Judea llactapipish, Samaria llactapipish, shinallatac mai tiyashca llactacunapipish ñucamanta huillagringuichic— nirca.

⁹ Chashna nishca q'uipami, paicuna ricucucpi, Jesustaca jahua pachaman Taita Diosca pusharca. Chashna pushacpi, p'uyu paita pacacpica, ña mana ricurcacunachu.

¹⁰ Jesús chashna ricta paicuna huichailla ricuracucpimi, ñapish ishcai yuraclla churarishca runacuna paicunapac cuchupi ricurishpaca:

¹¹ —Galilea llacta runacuna, ¿ima nishpatac huichailla chaparacunguichic? Cai cancunapacmanta jahua pachaman pushashca Jesusllatacmi, cutin shamunga. Ima shinami pai ricta ricurcanguichic, chashnallatacmi cutimunga— nircacuna.

Matiasta Judaspac randi acllashcamanta

¹² Chashna nicta uyashca q'uipami, Olivos urcumantaca Jerusalén puebloman cutimurcacuna. Chai urcuca Jerusalenmantaca shuc kilómetro shinapimi carca.

¹³ Ña Jerusalenman chayashpaca, paicuna pozacushca huasi altomanmi huichicurcacuna. Chai huasiman huichicuccunaca Pedro, Jacobo, Juan, Andrés, Felipe, Tomás, Bartolomé, Mateo, Alfeopac churi Jacobo, Celote*f** nishca Simón, shinallatac Jacobopac huauqui Judaspish carcacunami.

¹⁴ Tucui paicunami Jesuspac huauquicunahuanpish, paipac mama Mariahuanpish, shinallatac caishuc huarmicunahuanpish Taita Diosman mañangapac tandanacuclla carcacuna.

¹⁵ Chai punzhacunapica, Jesusta criccunaca pasac ishcai chunga shinami tandanacushca carcacuna. Paicunapac ñaupapimi Pedroca shayarishpa cashna nirca:

¹⁶ “Caipi tandanacushca tucui criccuna. Jesusta Judas japichina cashcataca, ñaupamanmi Diospac Espíritu yuyaita cushpa, Davidman quillcachishca. Chaica pactanami carca.

¹⁷ Judasca ñucanchicpuramantami carca. Paipish Jesusmanta huillagrichun, ñucanchicta acllashca shinallatac acllashcami carca.

¹⁸ Chashna cashpapish, pai millaita ruhuashcamanta chasquishca cullquihuanca allpatami randirca. Chai allpallapitacmi Judasca jahuamanta uraisinga urmashpa, huicsa tucyashpa, chunzhullicuna t'allirishpa huañurca.

¹⁹ Chashna tucushcata Jerusalenpi tucui causaccuna yachashpaca, chai allpataca paicunapac quiquin rimaipimi ‘Acéldama’ shutita shutichircacuna. ‘Acéldama’ nishcaca, ‘Yahuar Allpa’ nisha ninmi.

²⁰ Salmos libropica: ‘Pai causacushca huasica shitashca saquirichun, chai huasipica pipish ama causachun’ nicunmi. Chashnallatac: ‘Pai ruhuanataca, shuc runa ruhuachun’ nicunmi.

²¹ Apunchic Jesús ñucanchichuan cacpirac, punzhanta ñucanchichuan puric runacunaca tiyanmi.

²² Paicunaca Juan bautizacushca punzhamanta pacha, Jesús jahua pachaman ringacaman ñucanchichuan puric runacunami. Chashna cashcamanta Jesús causarishcata ñucanchichuan huillachunca, paicunapuramanta maijanta cashpapish shucta acllashunchic” nirca.

²³ Pedro chashna nicpica, ishcai runatami ch'icanyachircacuna. Shucca Justo nishca José Barsabasmi carca. Cutin caishucca Matíasmi carca.

²⁴ Chaimantaca: “Mandac Taita Dioslla, canmi tucui gentecunapac shunguta ricsingui. Cunanca cai ishcaicunamantaca, maijantapish can acllashcata ñucanchicman ricuchiyari.

²⁵ Maijanta can acllacpipish, ñucanchichuan canmanta huillachunmi munanchic. Judasca millaita ruhuashcamantami, canmanta huillanata saquishpa huañushpaca, llaqui tucurca” nircacuna.

²⁶ Chashna mañashpa suerteta ruhuacpica, Matiasmanmi urmarca. Chaimantami Matiasca Jesús acllashca chunga shuc huillaccunahuan tandanacurca.