HEBREOS 5 - Nuevo Testamento en Quichua Cañar 1996

¹ Tucui curacunata jatun mandac curacunami, gentecunapuramanta Diospacta ruhuachun Dios acllashca can. Paicunaca tucui gentecunapac juchacunamanta Diosman imallata cushcacunata chasquishpa cungapac, animalcunata huañuchishpa Diosman cungapacpish acllashcami can.

² Curacunapish juchapi urmanalla cashcamantami, caishuc mana yachac chingarishca shina gentecunamantaca llaquinga.

³ Chai curacunaca quiquinpish urmanalla cashcamantami, paicunapac juchacunamanta, shinallatac tucui gentecunapac juchacunamanta animalcunata Diosman cushpa, rupachina can.

⁴ Maijan cura cashpapish, pai quiquinllatacca jatun mandac cura cangapacca mana acllarinchu, ashtahuanpish Taita Dios Aaronta shina alli cachun acllashcacunallami, jatun mandac cura canga.

⁵ Chai shinallatacmi Jesucristoca mana pai quiquinllatac jatun mandac cura tucurca. Ashtahuanpish Taita Diosmi paita alli cachun acllashpaca: “Canca ñuca Churimi cangui, cunanca ñuca Huahuatacmi cangui” nirca.

⁶ Shinallatac Dios quillcachishcapi maipitapishcharica: “Canca Melquisedec shinallatacmi, huiñai huiñaipac cura cangui” ninmi.

⁷ Apunchic Jesucristoca cai pachapi causacushparacmi, huañuimantapish quishpichic Taita Diosmanca caparishpa, huacashpa mañarca. Jesusca Pai mandashcata ruhuac cashcamantami, Taita Diosca uyarca.

⁸ Apunchic Jesucristoca Diospac Churi cashpapish, llaquita apashpami pactachina cashcata yachacurca.

⁹ Chai shina llaquita apashpa, Taita Dios ima nishcata tucui pactachishpami, maijanpish paita cazuccunapacca huiñaita Quishpichic tucurca.

¹⁰ Melquisedecta shinami, Taita Diosca curacunata jatun mandac cura cachun paitaca churashca.

Crinata mana saquina cashcamanta

¹¹ Caicuna jahuaca achcatami rimana canchic. Shina cacpipish cancuna imapish mana utca entendiclla cashcamantami, cancunaman huillanaca sinchi can.

¹² Cancunaca cai tucui huatacunapica, ña yachachiccunami cana carcanguichic. Shina cashpapish cutin callarishpa, Diosmanta yachachinacunami tucushcanguichic. Cancunaca sinchi micuita micuc shina sinchiyanapac randica, huahuacuna lechellata micuc shinami huahuayashcanguichic.

¹³ Pipish chuchucuc huahuacuna shina lechellahuan causacushpaca, imapish cashcata ruhuanataca mana yachanchu.

¹⁴ Pipish sinchi micuita micucca ña yuyaita charishpami, imatapish taripashpa, allitapish, mana allitapish yachashpa causan.