HEBREOS 3 - Nuevo Testamento en Quichua Cañar 1996

Jesusca Moisestapish yalli cashcamanta

¹ C'uyashca criccuna, cancunaca Diospaclla causachun c'ayashcacunami canguichic. Chashna cashcamanta ñucanchic crishca shina, Jesucristotaca Diosmanta huillac cashcata, shinallatac curacunata jatun mandac cura cashcata yuyashunchic.

² Ima shinami Jesusca Dios ruhuachun nishcata alli pactachic carca, chai shinallatacmi Moisespish Diospac huasipica, tucui imalla ruhuana cashcata pactachirca.

³ Shina cashpapish Jesusca Moisesta yalli alli nishcami cana can. Chai shinami huasita ruhuacca chai ruhuashca huasita yalli alli nishca cana can.

⁴ Tucui huasicunami pi cashpapish ruhuashca cana can, ashtahuanpish tucui ima tiyashcatapish Diosmi ruhuashca.

⁵ Ima shinami Moisesca Diospac huasipi Diospacta ruhuac carca, shinallatacmi chai shina ruhuashpa, Taita Dios ima shina q'uipaman huillana cashcata ricuchicurca.

⁶ Ashtahuanpish Diospac Churi cashpami, Jesucristoca Diospac huasipica imatapish allita ruhuacun. Mana caita chaita yuyashpa, cushicushpa shuyacushpaca, ñucanchicmi chai huasica canchic.

Diospac huahuacuna samarina cashcamanta

⁷ Chaimantami Dios quillcachishcapi Diospac Espirituca: “Dios ima nishcata cunan cancuna uyashpaca,

⁸ chai shitashca pambapi Taita Diosta ima ruhuacta ricushun nishpa, chai mana cazuccuna shina ama shunguta sinchiyachichicchu.

⁹ Chaipimi cancunapac ñaupa taitacunaca, chuscu chunga huatata imallata ruhuashcata ricushpapish, cutin ricushun nishpa ñucataca p'iñachircacuna.

¹⁰ Chaimantami chai gentecunahuan ñuca p'iñarishpaca: ‘Paicunapac yuyaipi ñucata mana cazushpami, chingarishca shina cashpa, ñuca ricuchishca ñantaca mana ricsinata munarcacuna’ nircani.

¹¹ Chaimantami ñuca p'iñarishpaca: ‘Ñucahuan samaringapacca manatac yaicungacunachu’ nircani” ninmi.

¹² C'uyashca criccuna, cancunapuramanta shucllapish millai yuyaihuan mana crisha nishpa, pacta causac Diosmanta caruyanguichicman.

¹³ Chaipac randica Dios quillcachishcapi nishca shina, cunan causacushparac punzhanta caishuc chaishuc yuyachinacushpa, cancunapac shungu rumiyashca shina tucuchunpish, juchapi pandarichunpish ama saquinguichicchu.

¹⁴ Ñucanchic callaripi c'aticushca shina, Cristopi shunguta churashpa tucuringacaman c'aticushpaca, Cristo japishca shinallatacmi ñucanchicpish japishun.

¹⁵ Chaimanta Dios quillcachishcapica: “Dios ima nishcata cunan cancuna uyashpaca, chai mana cazuccuna shina ama shunguta sinchiyachichicchu” ninmi.

¹⁶ Taita Dios ima nishcata uyashca q'uipa, ¿paita mana cazuccunaca picunatac carca? Chaicunaca Egipto llactamanta Moisés llucchishca tucui israelcunami*f** carca.

¹⁷ Shinallatac chai chuscu chunga huatacunataca Taita Diosca, ¿picunahuantac p'iñarishca carca? Chai shitashca pambapi juchallishpa huañuccunahuanmi p'iñarishca carca.

¹⁸ Shinallatac Taita Diosca, ¿picunatatac “ñucahuan samaringapacca, manatac yaicungacunachu” nirca? Chai mana cazuccunatami chashna nirca.

¹⁹ Shina cacpica, paicuna mana crishcamantami, chai samarinamanca mana yaicui pudishcata yachanchic.