HEBREOS 13 - Nuevo Testamento en Quichua Cañar 1996

Criccuna ima shina causana cashcamanta

¹ Criccunaca shuc shinalla caishuc chaishuchuan c'uyanacunataca, amatac saquinguichicchu.

² Maijanpish huasiman chayaccunata cushilla chasquinataca, ama cungaringuichicchu. Chai shina pi cashcata mana yachashpa chasquishpami, maijancunaca angelcunata chasquishcacuna.

³ Cancunapish carcelpi cashca shinallatac, carcelpi caccunataca yuyarichic. Shinallatac llaquihuan caccunata, cancunapish llaquihuan cashca shinallatac yuyaichic.

⁴ Cazaranataca tucui mashnallatac alli nichic. Ama shuccunahuan huacllirishpa causaichicchu. Mosocunapish, cazadocunapish huacllirishpa causaccunataca Taita Diosca taripashpa llaquichingami.

⁵ Taita Diosca: “Jaicapi mana saquishachu, manatac cungarishachu” nishcami. Chaimanta cancunaca charishcallahuan cushi caichic. Ama yallimana cullquita charina yuyailla caichicchu.

⁶ Shina Dios pushacushcamanta imata mana manchashpami: “Mandac Diosca ñucata ayudacmi. Chaimanta pipish ñucata imata ruhuanamantaca mana manchanichu” ni pudinchic.

⁷ Diosmanta alli huillaita maijan cancunaman huillashpa pushashcataca yuyarichicyari. Paicuna causashcata yuyarishpa, paicuna ima shina crishcata ricushpa c'atichic.

⁸ Jesucristoca sarunpish, cunanpish, huiñai huiñaipacpish Paillatacmi.

⁹ Cancuna mana ricsishca shuctac yachanacunata yachachiccunataca, ama chasquinguichicchu. “Caitaca micunami, caitaca mana micunachu” nishpa yachachishcata c'atinapac randica, Taita Diospac c'uyaita shungupi charishpa, sinchiyashpa c'atinata yuyaichic. Chai yachachishcacunaca imapacpish mana allichu can.

¹⁰ Ñucanchicca Diosman cushpa, rupachina shuc altartami charinchic. Chai altarmantaca, Diosman mañana huasipi Diospacta ruhuac curacunaca mana micui pudinchu.

¹¹ Curacunata jatun mandac curaca juchacunamanta cungapacmi, animalcunapac yahuartaca Diospaclla ch'icanyachishca ucuman apan. Ashtahuanpish chai animalcunapac aichataca chai huasimanta llucchishpami, carupi rupachincuna.

¹² Chashnallatacmi Jesuspish gentecunapac juchacunata anchuchingapacca, paipac quiquin yahuarta pueblomanta carupi jichashpa, llaquita apashpa huañurca.

¹³ Chai shinallatac ñucanchicpish pinganayai llaquita Jesús apashca shina, pueblomanta llucshishpa, llaquita apashunchic.

¹⁴ Cai pachapica huiñaita mana chingaric pueblotaca mana charinchicchu, ashtahuanpish shamuc punzhapi mana tucuric shuc pueblo tiyanatami shuyacunchic.

¹⁵ ¡Chaimantami Taita Diostaca, Jesucristomanta huiñaita “allimari cangui” nicunalla canchic! Cai alli nishcaca Diosman cushpa, rupachishca shinami. ¡Chaimanta ñucanchic shimihuan Taita Diostaca “allimari cangui” nishunchic!

¹⁶ Cancunaca allita ruhuashpa, ima charishcata caishuc chaishuc caranacunataca, amatac cungaringuichicchu. Chashna ruhuashpami, animalta Diosman cushpa rupachic shina, Taita Diosta cushichinguichic.

¹⁷ Cancunata pushaccunata cazuichic. Paicunaca Taita Diosman ima ruhuashcatapish ricuchina cashcamantami, mana samarishpa cancunataca ricuracun. Paicuna mana llaquirishpa, cushilla imatapish ruhuachunca, paicunahuanca alli caichic. Paicuna mana cushilla pushacpica, ima allita cancunaca mana japinguichicchu.

¹⁸ Ñucanchicmanta Diosman mañaichic. Imapish alli cachun nishpa allita pushana yuyailla cashpami, pipacpish mana juchanchishca cashcata yachanchic.

¹⁹ Ashtahuancarin ñucaca cancunahuan cangapac utca cutimuchunca, Taita Diosman mañaichic ninimi.

Ña tucuchingapac “allilla cashca cachun” nishcamanta

²⁰ Ñucanchic Apunchic Jesustaca, sumac causaita cuc Taita Diosmi huañushcacuna puramanta causachirca. Taita Dioshuan huiñaipac ari ninacushcata pactachic yahuarta jichashcamantami, paica ovejacunapac michic shina ñucanchic Jatun Michic can.

²¹ Diosllatac tucui imapipish pai munashca shina allicunata ruhuac cachun cancunaman yachachichun, shinallatac Jesucristomanta tucui ñucanchicta pai munashca shina ruhuachichun nishpami mañani. ¡Apunchic Jesusllata huiñai huiñaita “sumacmari cangui” nishca cachun! Chashna cachun.

²² C'uyashca criccuna, cancuna alli c'atichun nishpa, cai ñuca asha quillcashcataca mana p'iñarishpa chasquichun nishpami mañani.

²³ Jesusmanta ñucanchic huauqui Timoteo ña carcelmanta llucshishcata yachachunmi munani. Pai utca shamucpica, paihuanmi cancunata ricungapac shamusha.

²⁴ Tucui cancunata pushaccunatapish, shinallatac Diospaclla cac tucui criccunatapish “allilla cashca cachun” ninchicmi. Italia llactapi causac criccunapish, “allilla cashca cachun” nishpami cachancuna.

²⁵ Taita Diosca paipac sumaimana c'uyaita tucui cancunaman cushca cachun ninchicmi.