HEBREOS 10 - Nuevo Testamento en Quichua Cañar 1996

¹ Moisés mandashcacunaca q'uipata shamuc allicunata ricuchic llandu shinallami, ashtahuanpish mana chai shamuna cashcacuna shinachu. Shina cashcamanta Moisés mandashcacunata pactachishpa, huatanta chaillatatac chaillatatac ruhuashpa animalcunata rupachishpa, Taita Diosman cuchuyaccunataca allitacca jaicapi mana ruhuanchu.

² Chai mandashcacunata pactachicpi juchacunata p'ichac cacpica, animalcunata rupachishpa, Taita Diosman cunata saquishpami, “ña mana juchayucchu canchic” ninmancuna.

³ Ashtahuanpish caicunata Diosman cushpa rupachinacunaca, huatanta juchayuc cashcata yuyachingapacmi can.

⁴ Huagracunapac yahuarpish, chivocunapac yahuarpish juchacunataca mana anchuchi pudinchu.

⁵ Chashna cashcamantami Apunchic Jesusca cai pachaman shamushpaca, Taita Diostaca cashna nirca: “Animalcunata canman cushpa huañuchishcatapish, imallata canman cushcacunatapish, mana nircanguichu. Ashtahuanpish runa tucuchunmi, ñucataca allichircangui.

⁶ Animalcunata rupachishpa, canman cushcacunapish, juchacunamanta canman imallata cushcacunapish, canmanca imapish mana canchu.

⁷ Chaimantami: ‘¡Jatun Dioslla! Ñucamanta quillcachishcapi nishca shinami, can munashcata ruhuangapac shamuni’ ” nirca.

⁸ Quillcachishcapi Cristo rimashpaca, Moisés mandashcacunapi nishca cashca jahuapish: “Animalcunata Diosman cushpa huañuchishcapish, imallata Diosman cushcacunapish, juchacunata anchuchingapac animalcunata cushpa rupachishcapish ima mana canchu, paitaca mana cushichinchu” ninmi.

⁹ Cristoca: “Can munashcata ruhuangapac shamuni” ninmi. Chashna nishpaca, ñaupaman imata ruhuana cashcata anchuchishpa, mushuctami ruhuarca.

¹⁰ Ñucanchic Taita Diospaclla cachunca, Jesucristomi Dios munashca shina pai quiquinllatac curishpa, shuc cutinlla huiñaipac huañurca.

¹¹ Tucui Israel*f** curacunami, punzhanta chaillatatac chaillatatac animalcunata rupachishpa, Diosman cuncuna. Shina cacpipish caicunaca jaicapi juchacunataca mana anchuchinchu.

¹² Tucuipac juchacunamantami Jesucristoca pai quiquinllatac curishpa, huiñaipac huañurca. Chai q'uipaca Taita Diospac alli maquimanmi tiyarirca.

¹³ Chaipimi paita p'iñaccunata ima punzha Dios paipac chaqui sarunapi churangacaman shuyacun.

¹⁴ Paica shuc cutinlla Diosman curishpami, huiñaipac paipaclla caccunata juchanchina illacta ruhuarca.

¹⁵ Diospac Espiritupish ñucanchicmanca chashnallatacmi nin. Paica:

¹⁶ “Shamuc punzhacunapica, paicunahuan ari ninacushpaca, ñuca mandashcacunataca paicunapac shungupimi yuyarichun churasha. Shinallatac paicunapac yuyaipimi, quillcashca shina cachun churasha” ninmi.

¹⁷ Shinallatac: “Paicuna ima mana allita ruhuashpa juchallishcatapish, mana ashtahuan yuyarishachu” ninmi

¹⁸ Chaimantami juchacunata perdonashca q'uipaca, juchamanta ashtahuan imata mana cunachu.

Taita Diosman cuchuyana cashcamanta

¹⁹ C'uyashca criccuna, cunanca Apunchic Jesucristopac yahuarmantaca Diospaclla ch'icanyachishca ucumanca yaicunallami canchic.

²⁰ Causaita cungapacca, mushuc ñanta cuc shinami Jesucristollatac Diospaclla ch'icanyachishca ucuman yaicuna jarcashcataca anchuchirca. Quiquinlla huañushpami, chashna pactachirca.

²¹ Taita Diospaclla huasipica, Apunchic Jesucristomi ñucanchicpac jatun mandac cura can.

²² Chaimantami mana caita chaita yuyashpa, tucui shunguhuan crishpa, ñucanchic shungupi millai yuyaicuna tiyashcatapish anchuchishca, shinallatac chuya yacuhuan chuyayachishca, Taita Diosman cuchuyana canchic.

²³ Taita Diosca Pai pactachingapac ari nishca shinallatacmi pactachinga. Chaimantami ñucanchic crishpa shuyacushcataca, mana caita chaita yuyashpa shuyashunchiclla. Chai shuyacushcamantami shuccunaman huillacunchic.

²⁴ Caishuc chaishuc c'uyaihuan ayudanacushpa, ashtahuan allita ruhuana yuyailla cashunchic.

²⁵ Shinallatac mana tandanacuccuna shina ama cashunchic. Chaipac randica ñucanchic tandanacuicunaman caishuc chaishuc tandanacushpa, Apunchic Jesús ñalla cutimuna cashcata yuyachinacushpa, ashtahuan c'atina yuyaita cushunchic.

²⁶ Cashcata nic huillashcata yachashca jahua quiquin munaimanta juchata ruhuashpa c'aticucpica, chai juchamanta huañushpa quishpichicca mana tiyanchu.

²⁷ Ashtahuanpish chashna ruhuaccunamanca manchanayai taripana punzha, shinallatac rupachishpa chingachic ninallami shuyacun. Chai ninaca Diosta mana cazuccunatami tucuchinga.

²⁸ Moisés mandashcata mana cazuctaca ishcai cashpa, quimsa cashpa pai mana allita ruhuashcata huillaccuna tiyacpica, mana llaquishpami huañuchina can.

²⁹ Ashtahuanpish Diospac Churita saruc shinacunata, paipac jichashca yahuarta yangapi churashpa, Diospac c'uyac Espirituta c'amishpa rimaccunataca, chaita yallimi llaquichishca canga. Chai yahuarmi mushuc ari ninacuitaca pactachin. Shinallatac chai yahuarllatacmi juchata p'ichan.

³⁰ Mandac Diosca: “Llaquichina cacpica, ñucami llaquichisha. Paicuna japina cashca shinallatacmi, taripashpa cusha” ninmi. Shinallatacmi: “Ñuca huahuacuna imalla ruhuashcatapish, ñucami taripasha” ninmi. Chaitaca yachanguichicmi.

³¹ Causac Diospac maquipi llaquichishca canaca, mai jatun llaquimi.

³² Ñaupa punzhacunapi Dios yuyaita cucpi, jatun llaquicunata macanacuc shina apashcata cancunallatac yachanguichicmi.

³³ Cancunapuramanta maijancunaca tucuipac ñaupapi c'amishpa, rimashcacunami carcanguichic. Cutin shuccunaca chai llaquichishcacunahuan tandanacushpami, paicuna shinallatac llaquita aparcanguichic.

³⁴ Cancunaca carcelpi caccunamantaca, cancuna cashca shinallatacmi llaquircanguichic. Cancuna jahua pachapi huiñai huiñaipac tucuimanta yalli allita charishcamantaca, tucui charishcata quichucpipish, cushilla carcanguichicmi.

³⁵ Cancuna chai yuyailla shuyacushcataca, amatac chingachinguichicchu. Chai yuyailla shuyashpami, sumac japinata japinguichic.

³⁶ Cancunaca mana p'iñarishpa, c'uyac shunguhuan llaquita apashpami, Diospac munaitaca pactachina canguichic. Chashna pactachishpami, pai cusha nicushcataca chasquinguichic.

³⁷ Dios quillcachishcapica: “Chai shamuna cashcaca ñallami shamunga, mana unaiyangachu.

³⁸ Cashcata ruhuacca crishcallamantami causanga. Ashtahuanpish ña mana c'atishpa saquiric-huanca, mana cushi cashachu” ninmi.

³⁹ Ñucanchicca mana c'atisha nishpa, llaquita apangapac riccuna shinaca mana canchicchu, ashtahuanpish quishpiringapac Jesusta criccunami canchic.