GÁLATAS 6 - Nuevo Testamento en Quichua Cañar 1996

Caishuc chaishuc ayudanacunamanta

¹ C'uyashca criccuna, cancunapuramanta maijan juchapi urmashcata ricushpaca, pai allichirichun Diospac Espíritu yuyaita cushca causaccunaca ayudanami canguichic. Chashna ayudashpaca, c'uyac shunguhuan sumacta ayudangui. Pacta canpish chai shina tucunguiman.

² Caishuc chaishuc llaquicunata apanata ayudanacushpami, Cristo mandashcataca pactachinguichic.

³ Maijan manapish ima cashpa, “allimi cani” nicca, paillatacmi llullarishpa pandaricun.

⁴ Allita ruhuacushcata, mana allita ruhuacushcata ricungapacca, quiquinllatac ima shina causacushcatami ricuna can. Chashna ricushpami mana shuccunahuan chimbapurashpa, ashtahuanpish quiquinllatac allita ruhuacushcamanta cushicuna can.

⁵ Diospac ñaupapica quiquin ima shina causashca shinallatacmi ricuringa.

⁶ Dios rimashca shimita yachachiccunamanca yachacuccunaca imatapish cunami can.

⁷ Ama quiquinllatac pandarishpa llullaichicchu. Taita Diostaca pipish mana llullashpa crichinchu. Shina cashcamantaca pipish imata ruhuashcamantaca chaillatatacmi japinga.

⁸ Maijanpish millai munaita ruhuashpa mana allita ruhuacca, chai mana allita ruhuashcamantami huañuita japinga. Ashtahuanpish Diospac Espíritu munashcata ruhuacca, Diospac Espiritumantami huiñai causaita japinga.

⁹ Chaimanta ima allita ruhuanataca mana shaicushpami ruhuana canchic. Chashna mana shaicushpa allita ruhuashpa causashpaca, japina punzha chayamucpica japishunmi.

¹⁰ Chaimanta imata ruhuanalla cacpica, tucuiman allita ruhuashpa c'atishunlla. Tucuimanta yallica criccunaman allita ruhuashun.

Ña tucuchingapac cunashpa “allilla cashca cachun” nishcamanta

¹¹ ¡Riquichic! Cunanca jatun quillcatami ñuca quiquin maquihuan quillcashpa cancunaman cachani.

¹² Chai “circuncisionta*f** ruhuanaca allimi” niccunaca gentecunapac alli nishca cangapac, shinallatac Jesucristo cruzpi huañushcata crishcamanta ama pi p'iñachun nishpallami chashnaca nincuna.

¹³ Shina cacpipish circuncisionta ruhuaccunapish mana tucui Moisés mandashcacunataca pactachincunachu. Chashna cashpapish paicuna taucacunata circuncisionta ruhuachishpa “allimi cani” ningapacllami, cancunataca circuncisionta ruhuachun nincuna.

¹⁴ Ñucaca imamantapish mana “alli cani” ninichu, ashtahuanpish Apunchic Jesús cruzpi huañushcallamantami “alli cani” nini. Cristo ñucamanta huañushcamantaca, ñucamanca cai pachapacta ruhuanaca huañushca shina imapish mana canchu, shinallatac ñucapish cai pachapacta ruhuangapacca huañushca shinallatacmi cani.

¹⁵ Circuncisionta ruhuashcapish, mana circuncisionta ruhuashcapish mana ima canchu, ashtahuanpish Taita Dios mushucyachicpi mushuc causanami ashtahuan alli.

¹⁶ Cai ñuca nishca shina causaccunamanpish, Dios tucui acllashcacunamanpish Taita Dios llaquishpa, sumac causaita cushca cachun ninimi.

¹⁷ Ñuca Apunchic Jesusta c'aticushcamanta chugririshpa alli tucushca señalmi, paipacta ruhuac cashcataca ricuchin. Chaimanta ñucataca ama pi p'iñachun.

¹⁸ C'uyashca criccuna, ñucanchic Apunchic Jesucristoca paipac sumaimana c'uyaita tucui cancunaman cushca cachun ninchicmi. Chashna cachun.