GÁLATAS 5 - Nuevo Testamento en Quichua Cañar 1996

Mana cutin huatashca shina tucunamanta

¹ Moisés mandashcacunata cazushpa ama huatashca shina cachunmi, Jesucristoca ñucanchictaca cacharichirca. Shina cashcamanta ama cutinllatac huatashca shina tucunata yuyaichicchu.

² ¡Uyaichic! Ñucaca cancunapac ricsishca Pablomi cashna nini: Cancuna circuncisionta*f** ruhuanami nishcata uyashpa c'aticucllapica, Cristo imata ruhuashcapish yangamantami canman.

³ Chaimantaca cutinllatacmi nini: Maijanpish circuncisionta ruhuaccunaca Moisés mandashcacunata tucui pactachinami can.

⁴ Maijan cancunapurapi Moisés mandashcacunata pactachishpalla Taita Dioshuan alli tucushun nishpaca, Cristomanta caruyashpami Dios mai c'uyashcamantapish ch'icanyarishcacuna.

⁵ Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Taita Dioshuan alli tucuna yuyaillami canchic.

⁶ Shina cashcamanta Jesucristohuan shuc shinalla cashpaca, circuncisionta ruhuashca cashpa, mana ruhuashca cashpapish mana ima canchu, ashtahuanpish Cristota criccuna cashcamanta c'uyanacushpa causanami ashtahuan alli.

⁷ Cancunaca allimi c'aticurcanguichic. Shina cashcata nic huillashcata cazushpa c'aticucpica, ¿pitac cancunataca saquichun nircayari?

⁸ Cancunata c'ayac Taita Diosca mana chashna saquichun munanchu.

⁹ Ashalla levaduralla tucui chaputa punguillichic cashcataca yachanchicmi.

¹⁰ Shina cacpica Jesucristohuan shuc shinalla tucushcamantaca, cancuna mana pandarina cashcatami yachani. Taita Diosca maijan pandachishpa purictaca, pita cashpapish llaquichingami.

¹¹ C'uyashca criccuna, ñuca cancunaman “circuncisionta ruhuanaca allimi” nishpa puricpica, israelcunaca*f** mana p'iñanmanchu carca, shinallatac Jesucristo ñucanchicmanta cruzpi huañushcata huillashcapish ña mana paicunata p'iñachinmanchu.

¹² “Circuncisionta ruhuanaca allimi” nishpa pandachishpa puriccunataca, ¡paicunapactarac tucui p'itishpachari alli canman ninimi!

¹³ C'uyashca criccuna, cancunataca Taita Dios ama huatashca shina causachunmi c'ayarca. Cunanca “ña mana huatashca shinachu canchic” nishpaca, imapish mana alli munaicunataca ama ruhuanguichicchu. Chaipac randica caishuc chaishuchuan c'uyanacushpa, ayudanacushpa causaichic.

¹⁴ Moisés mandashcacunapica: “Can ima shinami c'uyaringui, shinallatac shuccunatapish c'uyangui” ninmi. Tucui mandashcacunami chai shinallatac nin.

¹⁵ Cancunaca sacha animalcuna shina caninacushpa, caishuc chaishuc llaquichinacushpaca chingaringuichicmi.

Mana alli munaicunamantapish, Diospac Espíritu yuyaita cushcamantapish

¹⁶ Chaimantami cancunataca: “Diospac Espíritu munashca shina causashpa, cancunapi tiyac millai munaicunataca ama ruhuaichicchu” nini.

¹⁷ Millai munaicunaca Diospac Espiritupac munaitaca p'iñanmi. Shinallatac Diospac Espiritupish millai munaicunataca p'iñanllatacmi. Chashna ishcaimanta mana apanacuc cashcamantami, ima munashcatapish mana ruhuai pudinguichic.

¹⁸ Shina cacpipish Diospac Espíritu cancunata pushacucpica, ña mana Moisespac mandashcacunaca mandacunchu.

¹⁹ Maijanpish shungupi tiyac millai munaicunata ruhuashpa causacuccunataca ricunallami. Paicunaca yallita huaclliriccunami, imapish millaita ruhuaccunami, manapish ruhuana cashcata ruhuaccunami,

²⁰ ruhuashcalla dioscunata adoraccunami, brujiaccunami, pitapish mana allichu nishpa p'iñaccunami, p'iñanacuccunallami, shuccuna shina casha niccunami, imamantapish jahualla p'iñariccunami, p'iñanacuipi churaccunami, gentecunata ch'icanyachiccunami, “ñucanchicllami alli canchic” niccunami,

²¹ shuccuna ama charichun nishpa munaccunami, machaccunami, micunallatac munaccunami, shinallatac shuctac chashna laya mana allita ruhuaccunami. Cancunataca utcaman nishca shinallatacmi: “Chashna ruhuaccunaca Dios mandacucpica imata mana charingachu” nishpa, cutinllatac nini.

²² Ashtahuanpish Diospac Espíritu yuyaita cushca causaccunaca c'uyaccunami, cushi causaccunami, sumacta causaccunami, mana utca p'iñariccunami, llaquiccunami, cuccunami, imatapish pactachiccunami,

²³ mana jatun tucuccunami, shinallatac mana allimanta jarcariccunami. Chashna causaccunataca mana allichu nic mandashcaca mana tiyanchu.

²⁴ Shinallatac maijanpish Jesucristopac caccunaca cai pacha jucha munaicunandic, imapish yallita mana alli yuyaicunandicmi chacatashca shina causacun.

²⁵ Cunan Diospac Espiritumanta causacushpaca, Diospac Espiritullatac yuyaita cushpa pushachun saquishunchic.

²⁶ Ñucanchicpurapica mana jatun tucushpa, shuccunahuan mana p'iñanacushpa, shinallatac shuccuna ama charichun nishpaca, ama munashunchic.