GÁLATAS 1 - Nuevo Testamento en Quichua Cañar 1996

Galacia llactapi causac criccunaman Pablo quillcashcamanta

¹ Ñucaca mana gentecunalla acllashcapac huillachun cachashcachu cani, ashtahuanpish Taita Diospish, shinallatac pai causachishca Jesucristopish huillachun cachashca Pablomi cani.

² Tucui caipi cac criccunahuan tucushpami, Galacia llactapi causac tandanacushca criccunaman quillcashpa cachani.

³ Ñucanchic Taita Diospish, Apunchic Jesucristopish mai c'uyashpa, cancunamanca sumac causaita cushca cachun ninimi.

⁴ Jesucristoca ñucanchic juchacunamanta huañushpami, cai pacha millai gentecuna shina ama causachun ñucanchicta quishpichishpa, ñucanchic Taita Dios munashcata pactachirca.

⁵ ¡Chaimanta Taita Diosca huiñaita alli nishca cachun! Chashna cachun.

Quishpirinamanta alli huillaica shucllami tiyan

⁶ Jesucristo mai c'uyashcamantami, Taita Diosca cancunataca acllarca. Chaimantami cancuna shuctac yachachishcata c'atishpa, Taita Diosmanta utca caruyacushcata yachashpaca mancharini.

⁷ Quishpirina alli huillaimanta ashtahuan shuctac alli huillaica mana tiyanchu. Ashtahuanpish cancunataca pandachingaraicullami, maijancunaca Cristomanta alli huillaitaca shuctac layaman yachachishun nincuna.

⁸ Shina cacpica ñucanchic cancunaman huillashca alli huillaita shuctac layaman huillactaca ñuca cacpipish, jahua pachamanta shamuc ángel cacpipish Taita Dios llaquichishca cachun.

⁹ Ñaupaman nishca shinallatacmi cutin nini: ¡Maijanpish quishpirinamanta huillashpa, cancuna ña uyashcamanta shuctac layaman huillactaca Taita Dios llaquichishca cachun!

¹⁰ Chashna nishpaca gentecunalla alli nichunca mana munanichu, ashtahuanpish Dios alli nishca canatami munani. Gentecunalla ñucata alli nichun nishpaca, ña mana Cristopacta ruhuacchu caiman.

Pablo ima shina Jesusmanta huillai callarishcamanta

¹¹ C'uyashca criccuna, caitami yachachun munani: Quishpirinamanta ñuca huillashca alli huillaica mana gentecunapac yuyaillamantachu can.

¹² Caitaca mana gentecunamantachu chasquircani, shinallatac mana pimanta yachacurcanichu, ashtahuanpish Jesucristomi ñucamanca ricsichirca.

¹³ Ñuca ñaupaman israelcuna*f** yachachishcata c'aticushpaca, Diospaclla tandanacushca criccunata yallita llaquichishpa, ima shinapish tucuchina yuyaihuan puricushcataca cancunallatac uyashcanguichicmi.

¹⁴ Ñucaca ñaupa taitacuna yachachishcata allita huacaichic cashpami, israelcuna yachachishcata c'aticushpaca, ñucahuan huiñai israelcunata atishpa ashtahuan alli cazuc carcani.

¹⁵ Shina cacpipish ñuca manarac huacharicpimi, Taita Diosca ñucata mai c'uyashpa, ch'icanyachishpa acllarca. Chashna acllashpaca, pai munashca pachami

¹⁶ mana israelcunamanpish*f** paimanta huillachun paipac Churitaca ñucaman ricsichirca. Shina ricsichicpimi, pimanpish mana tapurcani.

¹⁷ Shinallatac Jesús acllashca punta huillaccunata Jerusalén pueblopi ricungapacllapish mana rircanichu, ashtahuanpish utcashpami Arabia llactaman rircani. Chaimantaca Damasco pueblomanmi cutimurcani.

¹⁸ Quimsa huata q'uipami Pedrota ricungapac Jerusalén pueblomanca rircani. Chaipica chunga pichca punzhatami paihuan carcani.

¹⁹ Chaipica Jesús acllashca caishuc huillaccunataca pitapish mana ricurcanichu, ashtahuanpish Apunchic Jesuspac huauqui Jacobollatami ricurcani.

²⁰ Taita Dios ricucucpimi, mana llullashpa caicunataca quillcani.

²¹ Chai q'uipaca Siria llactaman, Cilicia llactamanmi rircani.

²² Chai punzhacunapica Cristota cric, Judea llactapi causac tandanacushca criccunaca ñucataca mana ñahui ñahui ricsircacunachu,

²³ ashtahuanpish ñucataca: “Ñaupamanca ñucanchicta llaquichishpa tucuchisha nicca, cunanca Jesucristota crinamantami paipish huillacun” nicllatami uyarcacuna.

²⁴ Chaimantami ñucamantaca Taita Diosta “allimari cangui” nircacuna.