FILIPENSES 3 - Nuevo Testamento en Quichua Cañar 1996

Jesucristohuan cushi canamanta

¹ C'uyashca criccuna, ¡Apunchic Jesushuan shuc shinalla cashcamanta cushicuichic! Ñucamanca chaillatatac, chaillatatac nishpa quillcanaca, mana shaicuchinchu. Cashna nishpa quillcanaca, cancunamanca mai allimi canga.

² “Circuncisionta*f** ruhuanami canguichic” nishpa mana allita yachachic, allcu shina gentecunamantaca huacaichiringuichic.

³ Ashtahuanpish ñucanchicmi, Diospac Espíritu yuyaita cucpi Diosta shungumanta alli niccuna cashpa, Jesucristomanta cushicushpa, circuncisión ruhuashcatatac ricuchicunchic. Shina cashpami ñucanchicca aichapi imalla ruhuashcacunallapica mana shunguta churanchic.

⁴ Chashna aichapi imata ruhuashcallahuan alli cana cacpica, ñucacarin tucuita atishpami chashna ruhuanapi shunguta churaiman.

⁵ Ñucaca hebreopuramanta*f** huacharishca, Benjaminpac huahua huahua israelmi*f** cani. Chaimantami ñucataca huacharishcamanta pusac punzhapica, ña circuncisionta ruhuachishcacuna. Shinallatac fariseo*f** cashpami, Moisés mandashcacunataca alli pactachicurcani.

⁶ Chaicunata cazuchisha nishpami, tandanacushca criccunataca p'iñashpa llaquichic carcani. Mandashcacunata alli pactachic cacpimi, pipish ñucataca imamanta mana juchanchic carcacuna.

⁷ Ñaupamanca tucui chai ruhuashcacunaca mai allimi carca. Chashna cashpapish Cristo c'uyashcamantami, tucui chaicunaca yangalla tucushca.

⁸ Ñucata Mandac Jesucristomanta sumac yachana tucuita yalli alli cacpimi, ñucapac tucui imalla allicunatapish yangata ruhuashpa saquircani. Cristota c'uyashpa paihuan cangapacmi, chai tucui yangallacunataca ima mapata laya shitarcani.

⁹ Cristohuan causana yuyailla cashpami, mandashcacunata pactachishpalla alli ricurinataca mana munani. Ashtahuanpish Cristota crishcallamantami, Taita Diosca paihuan alli tucuchun ñucataca chasquirca.

¹⁰ Cunanca tucuimanta yallica Cristota ricsishpami, pai causarishca q'uipa imatapish ruhuaclla cashcata ricusha nini. Shinallatac pai llaquita apashpa huañushca shinallatacmi, ñucapish llaquita apana cacpipish pai shina huañusha nini.

¹¹ Chashna ñuca huañushpapish, huañushcacunapuramantaca causarina yuyaillami cani.

Chayana cashcaman chayanamanta

¹² Ñucaca: “Cai tucui nishcata ña pactachishpa, allimi cani” ninatapish, shinallatac: “Ima pandatapish ña mana ruhuanichu” ninatapish, mana ni pudinichu. Ashtahuanpish Jesucristo acllashcamantaca, japina cashcata japingacaman ricunillami.

¹³ C'uyashca criccuna, chayana cashcaman ña chayashcataca mana yuyanichu. Ashtahuanpish caillatami ruhuacuni: Utcaman ima shina cashcatapish cungarishpa, japina cashcata japingapacmi chutaricuc shina ricuni.

¹⁴ Jesucristomanta Taita Dios cusha nishca tucuimanta yalli alli cacpimi, chaita japingapac chayana yuyailla ricuni.

¹⁵ Alli sinchi criccunaca chai shinallatacmi yuyana canchi. Ima shuc layata yuyacucpipish, Diosllatacmi cancuna alli yachachunca yuyaita cunga.

¹⁶ Shina cashcamanta ña uyashcata alli yuyarishpa, ñucanchic c'aticushca shinallatac alli causashunchic.

¹⁷ C'uyashca criccuna, ñuca causashca shinallatac cancunapish causaichic. Chashnallatac ñucanchic cancunaman yachachishcata c'atishpa causaccunata ricushpa, paicuna shina causaichic.

¹⁸ Ña utcaman tauca cutin nishca shinallatacmi, cunanpish huacashpa cashna nini: Cristo chacatashca huañushcataca, achcacunami yangata shina ruhuashpa causacuncuna.

¹⁹ Chashna causaccunaca tucuri punzhapimi llaquipi chingaringapac ringacuna. Paicuna munashca shina micunallatacmi, Diostapish yalli munancuna. Paicunaca pingaipacta ruhuashpapish, mana pingancunachu. Ashtahuanpish chaillahuantacmi “allimi canchic” nirincuna. Paicunaca cai pacha causaipacllami ashtahuan munancuna.

²⁰ Ashtahuanpish ñucanchic causana llactaca jahua pachami. Chai jahua pachamanta Quishpichic Apunchic Jesucristo cutimunallatacmi shuyacunchic.

²¹ Apunchic Jesucristo imatapish ruhuaclla cashcamantami, pai nicpica imapish ruhuarinlla. Chashna cashcamantami ñucanchic ismuclla aichatapish, paipac cuerpo shina sumacta ruhuanga.