FILIPENSES 2 - Nuevo Testamento en Quichua Cañar 1996

Mana jatun tucushpa, Cristo causashca shina causanamanta

¹ Cristo paipac c'uyaihuan cancunata sinchiyachishpa cushichicucpica, Diospac Espiritupish cancunahuanmi. Chaimantami caishuc chaishuc c'uyanacuipish, llaquinacuipish tiyan.

² Tucui mashna shuc yuyailla, shuc munailla tucushpa, shuc shinalla c'uyanacushpa, caishuc chaishuc apanacushpa, ñucataca ashtahuan cushichichunmi munani.

³ Shuccunata llaquichingaraiculla ama yachac tucuichicchu, ashtahuanpish quiquinca mana yachac cashca shinalla, shuccunata ashtahuan allipi churaichic.

⁴ Maijanpish quiquinlla alli canataca ama yuyaichicchu, ashtahuanpish shuccunapish alli cachun munaichic.

⁵ Jesucristo ima shinami causarca, shinallatac cancunapish causaichic:

⁶ Pai causashpaca Diosllatacmi carca. Shina cashpapish chai shina canataca saquircallami.

⁷ Pai ima shina cashcata saquishpami, ñucanchic shina aichayuc huacharishpa, servic shina tucurca.

⁸ Paica chashna aichayuc cashpapish Diosta cazuc cashcamantami, paillatac cruzpi chacatashpa llaquita huañuchichunpish, mana imata nishpa saquircalla.

⁹ Chaimantami Taita Diosca paitaca jatunyachishpa, paipac shutitapish tucuimanta yalli alli nishca cachun curca.

¹⁰ Jesuspac shutita uyashpaca, jahua pachapi causaccunapish, cai pachapi causaccunapish, allpa ucupi caccunapish tucui cungurishpa,

¹¹ Taita Diosta “sumacmari cangui” nishpa, Jesucristotapish “tucuita Mandacmi cangui” nichunmi, chashnaca ruhuarca.

Criccunaca cai pachata achicyachic lucerocuna shina cashcamanta

¹² Chaimanta ñuca c'uyashca criccuna, ima shinami ñuca cancunahuan cacpi alli cazuc carcanguichic, cunan ñuca mana cancunahuan cacpicarin, ashtahuan alli cazuccuna caichic. Cancuna ña quishpirishca cashcamantaca manchaihuan, chucchuihuan Taita Diospac ñaupapi allita ruhuana yuyailla caichic.

¹³ Taita Diosllatacmi imapish paiman allita ruhuana yuyaitapish, allita munana yuyaitapish cancunaman cun.

¹⁴ Ama huashalla rimanacushpa, ama p'iñanacushpa imatapish ruhuaichicchu.

¹⁵ Chashna ruhuashpami, cai pacha mana cric millai gentecunapac chaupipica, Diospac huahuacuna cashcamanta mana pi juchanchishca, allita ruhuac, achicyachic lucerocuna shina canguichic.

¹⁶ Ñuca huillashcapish, ñuca imata ruhuashcapish ama yanga cachunca, causaita cuc alli huillaita huillaichic. Chashna huillacpimi, ñucaca Cristo cutimuna punzhapica munai cushicusha.

¹⁷ Cancuna crishpaca, Taita Diosman cushpa rupachic shinami cushcanguichic. Chaita pactachingapacca, ñuca quiquin causaita chingachina cacpipish chingachishallami. Chashna yuyashpami, tucui cancunahuan cushicuni.

¹⁸ Shina cashcamanta cancunapish cushicushpa, ñucatapish cushichichic.

Timoteomantapish, Epafroditomantapish

¹⁹ Apunchic Jesuspac munai cacpica, Timoteotami cancunapacman utca cachanata yuyacuni. Pai cutimushpa cancuna ima shinalla cashcata huillacpica, ñucaca ashtahuanmi cushicusha.

²⁰ Timoteollami ñuca shina cancunaman allita ruhuana yuyaita charin. Pai shinaca pipish mana tiyanchu.

²¹ Caishuccunaca paicuna alli canallatami mashcancuna. Jesucristomanta allita ruhuanataca mana munancunachu.

²² Ashtahuanpish Timoteo ima shina cashcataca, cancunallatac yachanguichicmi. Paica shuc churi taitata ayudacuc shinami, alli huillaita ñuca huillacucpica, paipish ñucahuan pacta huillacurca.

²³ Chaimantami ñuca ima tucuna cashcata ña yachashpaca, Timoteota utca cancunapacman cachasha nicuni.

²⁴ Ashtahuanpish Apunchic Jesuspac munai cacpica, ñucallatac cancunata ñalla ricugrina cashcatami yachani.

²⁵ Shinallatac Jesusmanta ñucanchic huauqui Epafroditotaca cachana alli caipac yuyachicpimi, cutichishpa cachagrini. Paimi llaquita apana cacpipish, mana manchashpa alli huillaitaca ñucahuan pacta huillacun. Ñucata ima ruhuanapipish ayudachunmi, cancunaca cachashca carcanguichic.

²⁶ Epafroditoca tucui cancuna ima shina cashcata ricugrina yuyaillami puricun. Ashtahuancarin pai ungushca cashcata cancuna yachashcamantami, tucui shungumanta llaquiricun.

²⁷ Paica huañuna laya, ancha ungushcatacmi carca. Ashtahuanpish Taita Diosmi ñuca llaquita apacushca jahua ama ashtahuan llaquita apachun nishpa, paitapish ñucatapish llaquishpa, paitaca alliyachirca.

²⁸ Cunanca paita ricushpa cutin cushicuchunmi, ñucapish ña ama ashtahuan llaquilla cangapac paitaca cancunapacman cachani.

²⁹ Paica Apunchic Jesusta cric cashcamantaca, quiquin huauqui shinami. Chaimanta paitaca tucui shunguhuan cushicushpa alli chasquinguichic. Shinallatac maijanpish pai shina caccunataca, allimi ninguichic.

³⁰ Paica quiquin causaita mana llaquishpa Cristopacta ruhuacushpami, huañunalla tucurca. Chashna ruhuashpaca, cancuna carupi cashcamanta mana ruhuanata pudishcatami, paica ruhuarca.