FILEMÓN 1 - Nuevo Testamento en Quichua Cañar 1996

Filemonman Pablo quillcashcamanta

¹ Jesucristomanta huillashpa puricucpi prezu japishca Pablomi, Jesusmanta huauqui Timoteondic, ñucanchic shina Diospacta ruhuac c'uyashca Filemonman caita quillcashpa cachanchic.

² Shinallatac cambac huasipi tandanacuc criccunamanpish, Jesusta crishcamanta pani Apiamanpish, ñucanchic shina mana manchashpa huillac Arquipomanpish caitaca quillcanchic.

³ Ñucanchic Taita Diospish, Apunchic Jesucristopish cancunata mai c'uyashpa, sumac causaita cushca cachun ninchicmi.

Filemonca Jesucristota alli cric, c'uyac cashcamanta

^4-5 C'uyashca Filemón, cantaca Apunchic Jesusta alli cric, shinallatac Diospaclla cac tucui criccunatapish c'uyac cashcatami uyarcani. Chaimantami Taita Diosman mañacushpaca, canmantapish mañashpa pagui nicunilla.

⁶ Ñucanchic crishcata shuccunaman huillachun nishpa, shinallatac Dios cushca allicunata Jesucristomanta chasquishcatapish alli entendichun nishpami, canmantaca Taita Diosman mañacuni.

⁷ C'uyashca huauqui, cambac c'uyaihuanmi Diospaclla cac tucui criccunataca cushichishcangui. Chaimantami ñucapish cushicushpa, Diospacta ruhuana yuyailla cani.

Onésimo runata Filemón chasquichun nishpa, Pablo mañashcamanta

⁸ Ñucaca Apunchic Jesucristo acllashca huillac cashcamantami, can imapish alli caipactaca ruhuachun ni pudini.

⁹ Chashna cashpapish ñucanchic c'uyanacushcamantami, canmanca c'uyaihuan mañani. Ñucaca ña yuyacmi cani. Cunancarin Jesucristomanta huillashpa puricucpi, prezu japishcami tiyacuni.

¹⁰ Ñuca caipi prezu cacpimi, Onesimoca Jesucristota crishpa ñuca huahua shina tucurca. Cunanca paita alli chasquichunmi mañani.

¹¹ Ñaupamanmi Onesimoca mana allita ruhuac carca. Cunanca canmanpish, ñucamanpish allita ruhuacmi.

¹² Paitaca cambacllamantacmi cachani. Chaimanta ñucata chasquic shinallatac, paitaca chasquingui.

¹³ Alli huillaita huillashcamanta ñuca prezu tiyacucpi cambac randi ñucaman allita ruhuachunmi, caipi saquirichun munani.

¹⁴ Chashna cashpapish can ima nishcata manarac yachashpaca, ñuca quiquin munaimantaca imata mana ruhuasha ninichu. Can ima allita ñucaman ruhuasha nishpaca, ama ñuca nishcallamanta ruhuangui, ashtahuanpish can munashca shina ruhuanguilla.

¹⁵ Onesimoca canmanta ashata caruyashpapish, cunanca huañungacamanmi canhuanca canga.

¹⁶ Cunanca ña mana cambac randishca runa shinallachu, ashtahuanpish Jesusta crishcamantaca shuc c'uyashca huauqui shinami tucushca. Ñucapish maimi paitaca c'uyani. Cancarin ñucata yallimari c'uyana cangui. Mana shuc yanga runalla shinachu c'uyana cangui, ashtahuanpish Apunchic Jesusta cric huauqui cashcamantami, ashtahuan c'uyana cangui.

¹⁷ Jesusta crishcamanta shuc shinallami canchic. Chaimanta ñucata chasquic shinallatac, paitaca chasquingui.

¹⁸ Pai ima mana allita ruhuashca cacpi, imata canman manarac cutichishca cacpipish, ñucata ninguilla. Paimantaca ñucami ricusha.

¹⁹ Caita rimacuc Pablollatacmi, caitaca quillcashpa cashna nini: “Onésimo imata canman cutichina cashca cacpica, paimantaca ñucami cutichisha.” Can quishpirishcamanta ñucaman ima allicunata ruhuana cacpipish, chaitaca mana nishpami cashna nini.

²⁰ C'uyashca huauqui, Jesusta cric cashcamanta ñuca nishcacunata ruhuashpa cui. Chashna ruhuashpa ñuca shunguta cushichishpami, Apunchic Jesucristomanpish allita ruhuangui.

²¹ Cai ñuca nishcata cazushpa, ashtahuan caicunamanta yallita ruhuana cashcata yachashpami, cai quillcata cachani.

²² Cancuna Taita Diosman mañacushcamanta, “paica ñucata cutinllatac cancunapacman cachangami” nishpami shuyacuni. Chaimanta ñuca pozanatapish allichicungui nishpami mañani.

Tucuchingapac “allilla cashca cachun” nishcamanta

²³ Jesucristomanta huillashpa puricucpi ñucahuan prezu japishca huauqui Epafraspish, “allilla cashca cachun” nishpami cachan.

²⁴ Ñucahuan Diospacta ruhuac Marcospish, Aristarcopish, Demaspish, shinallatac Lucaspish “allilla cashca cachun” nishpami cachancuna.

²⁵ Ñucanchic Apunchic Jesucristoca paipac sumaimana c'uyaita tucui cancunaman cushca cachun ninimi.