EFESIOS 6 - Nuevo Testamento en Quichua Cañar 1996

Taita mamacuna huahuacunahuan ima shina canamanta

¹ Huahuacuna, Apunchic Jesusta c'uyashcamanta cancunapac taita mamata cazuichic. Chaimi alli.

² Dios mandashcacunamanta punta cushami nishcaca: “Cambac taita mamata c'uyangui.

³ Chashna c'uyashpami, unai huatacunata cai pachapica cushilla causangui” ninmi.

⁴ Shinallatac taita mamacunapish, cancunapac huahuacunata ama yanga p'iñachichicchu. Chaipac randica imapish mana allita ama ruhuachun nishpa, sumacllata yachachichic. Chaitami Apunchic Jesusca munan.

Amocunahuan, amopacta ruhuaccunahuan ima shina canamanta

⁵ Cai pachapi amocunapacta ruhuaccuna, Cristopacta ruhuac shinallatac, manchaihuan tucui shungumanta imata ruhuana cacpipish, amopacta ruhuaichic.

⁶ Imata ruhuashpapish, ama paicuna ricucucpi alli ricuringaraiculla ruhuac tucuichicchu, ashtahuanpish Cristopacta ruhuaccuna cashcamanta tucui shunguhuan Dios munashcata pactachishpa, amopacta ruhuaichic.

⁷ Imata ruhuana cacpipish, ama gentecunapacta ruhuacushcata yuyaichicchu, ashtahuanpish Cristopacta ruhuacushcata yuyashpa, tucui shunguhuan ruhuaichic.

⁸ Cancunaca amopacta ruhuac cashpa, mana amopacta ruhuac cashpapish, imapish allita ruhuashcamantaca Apunchic Jesusmanta japina cashcataca yachanami canguichic.

⁹ Shinallatac amocunapish, cancunata serviccunahuanca alli caichic. Ama macasha nishpa manchachichicchu. Amocunapish, amopacta ruhuaccunapish jahua pacha Taita Dios mandashca causacushcataca yachanami canguichic. Paica pitapish “caica allimi, chaica mana allichu” mana ninchu.

Criccuna ima shina millaita mishanamanta

¹⁰ Chaimanta cunanca Apunchic Jesushuan shuc shinalla cashcamanta, pai imatapish ruhuaclla cashcahuan sinchi tucuichic.

¹¹ Diablo ima millai yuyaicunata cushpa ama pandachichunca, millaita mishangapac Dios cushcacunata churarishca shina caichic.

¹² Ñucanchicca aichayuc, tulluyuc cac runacunahuanca mana macanacunchicchu, ashtahuanpish jahua huairapi mandashpa puric millai espiritucunahuanmi macanacucunchic. Chaicunami cai amsa pachapica mandashpa, imapish mana allita ruhuachicun.

¹³ Chaimantami millaihuan macanacuna punzhacunapi macanacushpa mishangapacca, Dios cushca macanacuna churanata churarishca shina caichic. Chashna macanacungapac tucui allichirishca q'uipaca, “macanacungapaclla shuyacuichic” ninimi.

¹⁴ Shina cashpaca, cashcata nic huillashcahuanca chumbillishca shina sinchi caichic. Shinallatac imatapish cashcata ruhuanataca, shunguta pacac fierro churanata churaric shina churashca caichic.

¹⁵ Sumac causaita cuc alli huillaita huillangapacca, ushutata churarishca shina caichic.

¹⁶ Tucuimanta yallica, millai diablo cachashca nina shina yuyaicunata jarcaringapacca Diosta crishpa, escudota churarishca shina caichic.

¹⁷ Umata jarcachun cascota umapi churarishca shina, quishpirishca cashcataca yuyaichic. Shinallatac Diospac Espíritu cushca Dios rimashca shimitaca espadata shinata charichic.

¹⁸ Diosman mañanataca ama saquichicchu. Diospac Espíritu yuyaita cushca shina Taita Diosmanca mañaraichic. Mana q'uillanachishpa chaparacuichic. Shinallatac Diospaclla cac tucui criccunamanta punzhanta Diosman mañaichic.

¹⁹ Alli huillaita huillashpa, chai pi mana yachashcata mana manchashpa, imata nina cashcallata huillachunca, Dios yuyaita cuchun ñucamantapish Diosman mañaichic.

²⁰ Taita Diosmi ñucataca alli huillaita huillachun cacharca. Chaita huillacushcamantami cunanca prezu cani. Diosmanta imata mana manchashpa ñuca huillachun Taita Diosman mañaichic.

Tucuchingapac imata nishcamanta

²¹ Ima shina ñuca causacushcatapish, ñucamanta tucui imalla huillanatapish, Apunchic Jesuspacta allita ruhuac, ñucanchic c'uyashca cric huauqui Tiquicomi apashpa huillagringa.

²² Chaimantami cancunaman ñucanchic caipi ima shina cashcata huillashpa, ashtahuan cushichichun paita cachani.

²³ Taita Diospish, Apunchic Jesucristopish tucui criccunaman sumac causaita, c'uyac canata, alli cric canata cushca cachun.

²⁴ Sumac mana chingaric c'uyaihuan ñucanchic Apunchic Jesucristota tucui c'uyaccunamanca, sumaimana c'uyaita Taita Diosca cushca cachun ninimi.