EFESIOS 5 - Nuevo Testamento en Quichua Cañar 1996

Diospac huahuacuna shina causanamanta

¹ Cancunaca ña Diospac c'uyashca huahuacuna cashcamantaca, pai shina canata yuyaichic.

² Jesucristo ñucanchicta c'uyac shinallatac, cancunapish c'uyanacushpa causaichic. Paica c'uyashcamantami, Diosman cushpa rupachishca mishquiman ashnacuc shina cangapac, pai quiquinllatac japi tucushpa, ñucanchicmanta huañurca.

³ Cancunaca Diospaclla cashcamantaca “huaclliriccuna” nishcapish, “manapish caipaccunata ruhuaccuna” nishcapish, mana cashpaca “ashtahuan charina yuyaillami causancuna” nishcapish, cancunapurapica pacta uyarishcallapish canman.

⁴ Pinganayaipac shimicunatapish, mapa yangalla pandachic shimicunatapish ama rimarichicchu. Chaicunata rimarinapac randica, Diosman mañashpa pagui ninami alli.

⁵ Maijanpish huacllirishpa, ima mapatapish ruhuashpa, shinallatac imatapish ashtahuan charina yuyailla cashpa, ruhuashcalla diosta alli niccunaca. Jesucristopish, Taita Diospish mandacucpica imata mana charingacunachu. Chaitaca yachanami canguichic.

⁶ Chashna mana allita ruhuashcamantami Taita Dios p'iñarishpa, tucui paita mana cazuccunataca llaquichinga. Chaimanta yanga parlocunahuanca pipish cancunata ama pandachichun.

⁷ Chashna caccunahuanca ama tandaringuichicchu.

⁸ Ñaupaca amsallapimi cancunaca causarcanguichic. Cunanca Apunchic Jesushuan shuc shinalla tucushcamanta achic luzpimi causacunguichic. Shina cashcamantaca achic luzpi causacuc shina causaichic.

⁹ Achic luzca alli shungu canata, imapish cashcata ruhuanata, shinallatac mana llullac cana yuyaitami cun.

¹⁰ Cancunaca punzhantami Apunchic Jesús munashca shina causanata yuyana canguichic.

¹¹ Amsapi causac, yangalla mana allita ruhuaccuna shina ama causaichicchu. Chaipac randica chashna ruhuaccunataca “mana allichu” nishpa rimashpami, achicman llucchina canguichic.

¹² Paicuna pacalla imatapish ruhuashcata rimanataca pinganayanmi.

¹³ Imapish pacashcata achicman llucchicpica, tucuimi yacharinga.

¹⁴ Chashna achic luzman llucchicpica, imapish luzpimi canga. Chaimantami: “Suiñushcamanta ricchari, huañushcacunapuramanta jatari. Cristomi cantaca achicyachinga” nincuna.

¹⁵ Chaimanta caishuc chaishuchuan apanacungapac alli yuyarichic. Ama yuyai illac shina causaichicchu, ashtahuanpish alli yuyaihuan causaichic.

¹⁶ Cunan punzhapi gentecuna mana allita ruhuashpa causacushcamantaca, ruhuanata pudishpaca allita ruhuaichic.

¹⁷ Imata mana yachaccuna shina ama caichicchu, ashtahuanpish Apunchic Jesucristo ima munashcata yachana yuyailla caichic.

¹⁸ Ama machaichicchu. Machaccunaca imapipish mana jarcarincunachu. Chaipac randica, Diospac Espíritu yuyaita cushca shina causanata munaichic.

¹⁹ Salmocunatapish, Diospac Espíritu yuyachishca sumac cantocunatapish caishuc chaishuc parlanacuichic. Apunchic Jesucristota tucui shunguhuan “allimari cangui” nishpa cantaichic.

²⁰ Ñucanchic Apunchic Jesuspac shutipi punzhanta imamantapish Taita Diostaca pagui nicuichiclla.

Cusandic huarmindic sumacta causanamanta

²¹ Apunchic Jesucristota cazushcamanta caishuc chaishuc cazunacuichic.

²² Huarmicuna, Apunchic Jesusta cazuc shina cancunapac cusacunata cazuichic.

²³ Jesucristoca tandanacushca criccunata uma shina Mandacmi. Shinallatac cusapish huarmitaca uma shina mandacmi. Jesucristoca tandanacushca criccunata Quishpichicmi. Tandanacushca criccunaca Jesucristopac cuerpo shinami.

²⁴ Tandanacushca criccunaca Jesucristota cazucmi. Shinallatac huarmicunapish, tucui imapipish cancunapac cusacunata cazuichic.

²⁵ Cusacunapish, Jesucristo tandanacushca criccunata c'uyac shina, cancunapac huarmicunata c'uyaichic. Jesucristoca tandanacushca criccunata c'uyashpami huañurca.

²⁶ Cristoca tandanacushca criccunataca yacuhuanpish, pai rimashca shimihuanpish chuyayachishcami. Diospaclla tucushpa causachunmi, paicunamanta Cristoca huañurca.

²⁷ Tandanacushca criccunaca paipac ñaupapi chuyalla, ima mana alli ruhuashcacunapish illac, llambuclla sumaimana ricurichunmi, chashnaca ruhuarca.

²⁸ Cusacunaca, ima shinami quiquinllatac c'uyaringuichic, chai shinallatac cancunapac huarmicunatapish c'uyaichic. Maijanpish quiquin huarmita c'uyacca quiquinllatacmi c'uyarin.

²⁹ Maijanpish quiquin cuerpotaca mana p'iñanchu, ashtahuanpish allita ricunmi. Imamantapish jarcarinatami munan. Shinallatacmi Cristoca tandanacushca criccunataca huacaichin.

³⁰ Tandanacushca criccunaca Jesucristopac cuerpo shinami. Chaimanta ñucanchicpish Jesucristopac cuerpo shinallami canchic.

³¹ Dios quillcachishcapica: “C'arica taita mamata saquishpa, paipac huarmihuan tandanacushpa causanga. Chashna tandanacushpaca, ña mana ishcaichu, ashtahuanpish shucllami tucun” ninmi.

³² Caimanta yachanaca yallitacmi tiyan. Shina cacpipish ñucaca Jesucristohuan, tandanacushca criccunahuan ima shina cana cashcatami entendishpa huillani.

³³ Shina cacpica quiquinllatac c'uyaric shina, cancunaca cancunapac huarmicunata c'uyaichic. Shinallatac huarmicunapish, cancunapac cusacunata alli nishpa cazuichic.