EFESIOS 4 - Nuevo Testamento en Quichua Cañar 1996

Diospac Espiritumanta shuc shinalla canamanta

¹ Chaimantami Apunchic Jesuspacta ruhuacushcamanta carcelpi tiyacuc Pablo cancunamanca cashna nini: Cancunaca Taita Dios ima shina causachun c'ayashca shina causaichic.

² Ama pihuanpish jatun tucushpa, ama p'iñarishpa, c'uyac shunguhuan caishuc chaishuchuan apanacushpa c'uyanacuichic.

³ Diospac Espíritu alli apanacushpa shuc shinalla causachun yuyaita cushcamantaca, chashna causana yuyailla caichic.

⁴ Diospac Espirituca shucllami. Chaimantami tandanacushca criccunaca shuc cuerpo shinalla can. Taita Diospish cancunata shuclla japina cashcata cushicushpa shuyachunmi c'ayarca.

⁵ Chashnallatac Apunchic Jesuspish shucllami. Crinapish shucllami, bautizarinapish shucllami.

⁶ Shinallatac tucui mashnapac taitaca shuclla Diosmi. Paica tucuita Mandac cashpami, pai munashcata tucuipi ruhuachicun, shinallatac tucuipi causacun.

⁷ Shina cashpami, ñucanchicca Diosmanta ruhuac canata Cristo cusha nishpa cushcamanta chasquishcanchic.

⁸ Dios quillcachishcapica: “Pai jahuaman rishpaca, prezu caccunata pushashpami rirca. Gentecunamanca Diosmanta ruhuac canatami curca” ninmi.

⁹ “Jahuaman rirca” nishpaca, ¿imatatac nisha nin? Shina nishpaca, cai allpa pachamanrac urai shamushcatami nisha nin.

¹⁰ Shina shamushca cashpami, paillatac tucui maipipish cangapacca jahua cielomanta ashtahuan jahuaman rirca.

¹¹ Chai shinami paillatac shuccunataca pai acllashca huillaccuna cachun, shuccunataca Dios ima nishcata huillaccuna cachun, shuccunataca quishpirinamanta alli huillaita huillaccuna cachun, shuccunataca criccunata pushaccuna cachun, cutin shuccunataca yachachiccuna cachun acllashpa, Diosmanta ruhuac canata curca.

¹² Tucui paipaclla caccunataca paipacta ruhuashpa, Cristopac cuerpo shina tandanacushca criccuna ashtahuan sinchi cachunmi, chashnaca acllarca.

¹³ Chashnaca tucui paita criccuna shuc shinalla tucushpa, Diospac Churita ricsishpa, Cristo shinallatac mana pandaric, alli yuyaiyuc tucungacamanmi acllarca.

¹⁴ Shina cashpami ñucanchicca huahuacuna imatapish jahualla cric shina, chai pandachishpa puric, yachac tucushca gentecuna yachachishcata c'atishpa, huaira apashca shinaca ña mana cashun.

¹⁵ Chaipac randica imapish cashcata huillashpa, caishuc chaishuchuan c'uyanacushpami, Cristohuan shuc shinalla causana yuyailla cana canchic. Cristoca tandanacushca criccunapac uma shinami.

¹⁶ Tucui criccuna Cristopac cuerpo shina cashpaca, tauca cashpapish chaqui maqui llutarishca shinami shuc shinalla canchic. Chashna tauca cashpapish c'uyanacushpa, caishuc chaishuc allita ruhuacpica, tandanacuica sinchiyashpa c'atingami.

Cristo mushuc causaita cuc cashcamanta

¹⁷ Apunchic Jesusmantami cancunamanca caicunata mingani. Chai yanga, quiquin munaillata ruhuashpa Diosta mana ricsiccuna shinaca, ña ama causaichicchu.

¹⁸ Paicunaca amsa yuyaillata charishpami, mana alli yuyaita japincuna. Paicunaca Diosmanta shamuc mushuc causaitaca, yuyai illac rumi shungu cashcamantami mana chasquincuna.

¹⁹ Paicunaca mana pingaccuna cashpami, ima mana allita ruhuashpapish, mana jarcarishpa ruhuancunalla.

²⁰ Shina cacpipish cancuna Cristota chasquishpaca, mana chai shina causangapacchu chasquircanguichic.

²¹ Cancunaca Jesusmanta cashcata nic huillashcata uyashpami, pai munashca shina causanata yachacurcanguichic. Chaitaca allitami yachani.

²² Chaimanta cancunaca ñaupa ima shina causacushcataca saquishpami, chai ñaupa mana alli yuyaicunata mana yuyana canguichic. Chai yuyaicunaca cancunata pandachishpa, mana allillata ruhuachishpami, ismuchic shina tucuchicurca.

²³ Cancunaca Diospac Espíritu yuyaita cushca shinami, ñaupa mana alli yuyaicunataca saquina canguichic.

²⁴ Cancuna mushuc churanata churaric shina, Taita Dios mushucyachishca causaichic. Shina causashpami, cashcata nic huillashca shina Diospaclla tucushpa, allillata ruhuashpa, shuccunamanpish ricuchinguichic.

²⁵ Tucui criccuna shuc shinalla cashcamantaca ña ama ashtahuan llullashpa, caishuc chaishuchuan imapish cashcallatac nichic.

²⁶ Imamanta p'iñarishpapish, ama juchallichicchu. P'iñarishpapish, ama tucui punzha p'iñashcalla caichicchu.

²⁷ Diablo ashtahuan pandachishpa c'atichunca ama saquichicchu.

²⁸ Shuhua cashpapish shuhuanata saquishpa, trabajanata callarichic. Shina quiquin maquihuan trabajashpami, imata huacchacunamanca cunata charinguichic.

²⁹ Imapish mana alli rimaicunata ama rimashpa, ashtahuanpish yuyaita cuc alli rimaicunallatac rimaichic. Chashna rimacta uyashpami, shuccunapish yuyaita japingacuna.

³⁰ Taita Diosca juchapi huatashca shinamanta cacharichishpa pushana punzhacamanmi, Diospaclla cashcata ricuchishpa causachun, ñucanchictaca paipac Espirituhuan unanchishpa ch'icanyachirca. Chaimanta millaita rimashpa ama Diospac Espirituta nanachichicchu.

³¹ Chaimanta shungu ucullapi p'iñashca canata, imapish llaquichinata, pitapish p'iñanata, c'amishpa rimanata, rimashpa caparinata, shinallatac tucui mana allicunataca saquichic.

³² Caishuc chaishuchuan c'uyac shunguhuan apanacushpa alli causaichic. Taita Dios cancunataca Jesucristomanta juchacunata perdonashca shina, caishuc chaishuc perdonanacuichic.