EFESIOS 3 - Nuevo Testamento en Quichua Cañar 1996

Mana israelcunaman huillachun Pabloman mingashcamanta

¹ Chaimantami ñucaca Jesucristopacta ruhuacushcamanta, cancuna mana israelcunapac*f** allipac caipi prezu cani.

² Taita Diosca paipac c'uyaimanta cancunapac allipac alli huillaita huillachun ñucaman mingashcataca, cancunaca ña yachanami canguichic.

³ Taita Diosca pi mana yachashcatami ñucamanca yachachirca. Chaitaca ñami ashallatapish huillashpa quillcarcani.

⁴ Chai quillcata rizashpami, Jesucristomanta pi mana ricsishcata ñuca yachashcataca yachac chayanguichic.

⁵ Ñaupamanca chai mana yachashcataca pimanpish mana ricuchishcami carca. Ashtahuanpish cunanca paipac Espiritumantami Taita Diosca paipaclla cac acllashca huillaccunamanpish, paimanta huillaccunamanpish ricuchishca.

⁶ Chai pi mana yachashcaca caimi: Quishpirinamanta alli huillaita uyashpa crishcamanta, mana israelcuna israelcunahuan pacta japina cashcata japingacunami. Paicunaca shuc cuerpo shina cashcamantami, Jesucristomanta Taita Dios cusha nishcataca chasquingacuna.

⁷ Ñucatami Taita Diosca llaquishpa mai c'uyashcallamanta, alli huillaita huillachun churarca. Diosca chashna ruhuashpami, pi mana ruhuaipacta ruhuac cashcata ricuchirca.

⁸ Ñucami Diospaclla cac tucui criccunamantaca ashtahuan yangalla cani. Shina cacpipish Taita Dios c'uyashpami, cai alli huillaita mana israelcunaman huillashpa sumac ruhuanata ñucamanca mingarca. Cai huillanaca Cristo tucuimanta yalli allicunata cuc cashcata huillanami.

⁹ Tucuita ruhuac Taita Diosca pai imata ruhuasha nicushcataca, ñaupamanta pachami pacashpa charicushca. Chaita huillachunmi ñucamanca mingarca.

¹⁰ Cunanca jahua pachapi mandaccunapish, poderta chariccunapish tandanacushca criccuna ima shina cashcata ricushpa, Taita Dios imatapish yachac cashcata yachachunmi, chashnaca ruhuarca.

¹¹ Chashnami Taita Diosca ñaupamanta pacha pai imata ruhuasha nicushcata pactachirca. Chashna tucuchunmi, Apunchic Jesucristota cacharca.

¹² Chashna cacpimi: “Cristota crishpa paihuan shuc shinalla tucushcamantaca, Diosca chasquingallami” nishpa, mana manchashpa paipacman cuchuyanata pudinchic.

¹³ Shina cashcamanta ñuca cancunamanta llaquita apacucpipish ama llaquirishpa, ashtahuanpish ñaupaman c'atichunmi mañani. Cancunapac allipacmi cashna llaquicunata apacuni.

Jesucristopac c'uyaimanta

¹⁴ Chaimantami Taita Diospac ñaupapica mañangapac cungurini.

¹⁵ Paimantami jahua pachapi caccunapish, cai pachapi caccunapish tucui mashna causaita charincuna.

¹⁶ Paipac sumaimana charishcacunata cancunaman cushpa, paipac Espirituhuan yuyaita allichishpa, sinchi criccunata ruhuachunmi, Taita Diosman mañacuni.

¹⁷ Crishcallamanta cancunapac shungupi Cristo causachun, shinallatac cancuna imata ruhuashpapish c'uyaillamanta ruhuachun nishpami mañacuni.

¹⁸ Chai shina cashpami, Diospaclla cac tucui criccunahuan tandanacushpaca, Cristoca tucuimanta yalli c'uyac cashcata yachac chayanguichic. Chai c'uyaica jahuamanpish, uramanpish, chainicmanpish, cashnamanpish shinallatac maicamanpish chayac cashcataca yachac chayanguichic.

¹⁹ Jesucristo mai c'uyac cashcataca pipish mana tucuita yachac chayangachu. Shina cacpipish pai c'uyac cashcata cancuna ricsichunmi munani. Chai c'uyaita ricsishpami, Taita Dios cancunapac shungupi causacushcatatac yachac chayanguichic.

²⁰ Ima shinami Taita Diosca ñucanchicpi imatapish ruhuaclla cashcata ricuchic shinallatacmi, ñucanchic yuyashcatapish, mañashcatapish yalli imatapish ruhuaclla can. ¡Chaimanta paitaca “sumacmari cangui” nishunchic!

²¹ ¡Criccunaca Jesucristohuan shuc shinalla tucushcamantaca, huiñai huiñaita Taita Diostaca “sumacmari cangui” nicushunchic! Chashna cachun.