EFESIOS 1 - Nuevo Testamento en Quichua Cañar 1996

Efeso pueblopi causac criccunaman Pablo quillcashcamanta

¹ Ñucaca Taita Dios munashcamanta Jesús acllashca huillac Pablomi, Efeso pueblopi maijanlla Jesucristota crishpa Taita Diospaclla caccunaman caita quillcani.

² Ñucanchic Taita Diospish, Apunchic Jesucristopish cancunataca mai c'uyashpa, sumac causaita cushca cachun ninimi.

Jesucristollamanta Dios cusha nishcata chasquina cashcamanta

³ Cristohuan shuc shinalla tucushcamantami, ñucanchicmanca paipac Espirituta cushpa, jahua pachapi tiyac tucui laya allicunata Taita Diosca curca. ¡Chaimantami ñucanchic Apunchic Jesucristopac Taita Diostaca alli nicunalla canchic!

⁴ Taita Diosca paipac c'uyaimantami manarac cai pachata ruhuashpa, ñucanchictaca Cristohuan shuc shinalla tucushpa jucha illac, paipaclla paipac ñaupapi cachun acllashca.

⁵ Shinami Jesucristohuan shuc shinalla tucushcamanta, ñucanchictaca paipac huahuata shina ruhuashpa, chasquishpa, ñaupaman pai ima shina munacushcata pactachirca.

⁶ Chashnaca Taita Dios mai c'uyashpa, paipac c'uyashca Churimanta allicunata cushcamantami, ¡paitaca alli nicunalla canchic!

⁷ Taita Diosca mai c'uyashcamantami, paipac Churi yahuarta jichashcamanta ñucanchictaca huatashca shinamanta cacharichishpa, juchacunata perdonarca.

⁸ Taita Diosca tucuita yachac, alli yuyaiyuc cashpami, paipac c'uyaitapish ñucanchicman ricuchishpa,

⁹ pai munashcamanta ñaupaman cusha nishca pacashcataca, Cristomanta ñucanchic japichun ricuchirca.

¹⁰ Taita Diosca cai cusha nishcataca pactana punzha chayacpimi pactachirca. Jahua pachapi, cai pachapi tiyac imacunatapish Cristo mandachunmi, tandachishpa chashnaca ruhuarca.

¹¹ Cristohuan shuc shinalla cashcamanta pai cusha nishcata ñucanchic japichunmi, Taita Diosca pai munashca shina ñaupaman ña acllashca. Tucui imatapish pai munashca shinami ruhuan.

¹² Chashna ruhuashpaca, ñucanchicrac punta Apunchic Jesús yuyailla cashpa, Taita Diosta “allimari cangui” nichunmi chashnaca ruhuarca.

¹³ Shinallatac cancunapish cashcata nic alli huillaita uyashpaca Cristota cricpimi, Taita Diosca pai cusha nishca paipac Espirituta cushpa, paipacllata ruhuashca.

¹⁴ Taita Diosca paipac Espirituta cushpami, ñucanchictaca huatashca shina cashcamanta tucui cacharichishpa, paipacllata ruhuashpa, pai cusha nishcata chasquiccuna cashcata ricuchin. ¡Chashna ruhuashcamantaca Taita Diosta “allimari cangui” nishunchic!

Pablo criccunamanta Taita Diosman mañashcamanta

¹⁵ Chaimanta cancuna Apunchic Jesusta crishpa, Diospaclla cac tucui criccunahuan c'uyanacuita charishcata uyashpami,

¹⁶ ñuca Taita Diosman mañashpaca, cancunata mana cungarishpa cancunamanta Diosta pagui nicunilla.

¹⁷ Diospac Espíritu yuyaita cushpa ricuchicpi cancuna Diosta alli ricsichunmi, ñucanchic Apunchic Jesucristopac sumaimana Taita Diosman mañacuni.

¹⁸ Cancuna pai c'ayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa Diosman mañani.

¹⁹ Shinallatac imatapish allita ruhuaclla cashpami, ñucanchic criccunapi allita ruhuacushcata yachachun Diosman mañacuni. Cai imatapish ruhuaclla cashcallahuantacmi, Taita Diosca pipish mana ruhuaipaclla cashcata ruhuashpa,

²⁰ Cristota causachishpa, jahua pachapi paipac alli maquiman tiyachishpa ricuchirca.

²¹ Chashna tiyachishpami poderta chariccunatapish, mandaccunatapish, tucuita atishpa mandaccunatapish, shinallatac cunan tucui ima tiyashcacunatapish, shamuc punzhapi ima tiyana cashcatapish tucuita Mandac cashcata ricuchirca.

²² Chashna cashcamantami tucui ima tiyashcacunata Cristo mandachun Taita Diosca curca. Shinallatac tandanacushca criccunata mandachunpish, Cristollamantacmi Diosca curca.

²³ Shina cacpica, tandanacushca criccunaca Cristopac cuerpo shinami can. Criccunaca tucui ima illashcatami Cristomanta chasquin. Shinallatac Cristollami maipipish ima illashcacunatapish cun.