COLOSENSES 4 - Nuevo Testamento en Quichua Cañar 1996

¹ Amocuna, cancunapish shuc Amota jahua pachapi charishcamanta, cancunapac serviccunamanca allita yuyarishpa, imatapish cashcata ruhuaichic.

² Cancuna Taita Diosta pagui nishpami, riccharishca shina punzhanta mañacunalla canguichic.

³ Shinallatac Cristomanta pi mana yachashca alli huillaita maipipish mana jarcarishpa huillangapac, ñucanchicmantapish Taita Diosman mañaichic. Chaita huillashcamantami, ñucapish caipi prezu tiyacuni.

⁴ Ñuca ima shina huillana cashca shinallatac allita huillachun, Taita Diosman mañaichic.

⁵ Mana criccunahuan tandarishpaca, yachaccuna shina alli caichic. Shinallatac huillana cacpica, paicunaman huillanguichiclla.

⁶ Cancuna shuccunahuan parlanacushpapish, uyanalla sumac rimaicunahuan parlaichic. Shinallatac paicuna imata tapucpipish, allita cutichinata yuyaichic.

Ña tucuchingapac “allilla cashca cachun” nishcamanta

⁷ Jesusmanta ñucanchic c'uyashca huauqui Tiquicoca Jesucristopacta ruhuac cashpami, ñucataca tucui imapipish ayudacun. Paimi ñucamantaca tucui ima huillana cashcataca huillagringa.

⁸ Ñucanchic ima shina cashcata cancunaman huillashpa, ashtahuan alli c'atina yuyaita cuchunmi, paitaca cancunapacman cachani.

⁹ Ñucanchic c'uyashca, allita pactachic huauqui Onesimopish paihuanmi rin. Paica cancunapurallatacmi can. Paicunami caipi tucui ñucanchic ima shina cashcatapish parlanga.

¹⁰ Ñucahuan pacta carcelpi tiyacuc Aristarcopish, Bernabepac primo Marcospish “allilla cashca cachun” nishpami cachancuna. Marcos cancunapacman chayacpica, alli chasquina cashcataca ñami huillarcani. Chaimanta pai chayacpica, alli chasquinguichic.

¹¹ Shinallatac Justo nishca Jesuspish “allilla cashca cachun” nishpami cachan. Israelcunapuramanta*f** criccunaca paicunallami, Taita Dios mandacucmanta ñucahuan pacta imatapish ruhuashpa, cushichiccunaca can.

¹² Jesucristopacta ruhuac, cancunapuramanta Epafraspish “allilla cashca cachun” nishpami cachan. Cancuna alli c'atishpa, tucui shunguhuan Diospac munaita alli yachashpa, Diospacta ruhuachunmi, punzhanta Taita Diosman mañacunlla.

¹³ Cancunamantapish, Laodicea pueblopi causaccunamantapish, Hierápolis pueblopi causaccunamantapish Epafras yuyaricushcataca ñucallatacmi yachani.

¹⁴ Shinallatac c'uyashca jambic Lucaspish, Demaspish “allilla cashca cachun” nishpami cachancuna.

¹⁵ Shinallatac Laodicea pueblopi causac criccunatapish, Ninfatapish paipac huasipi tandanacushca criccunandic “allilla cashca cachun” ninchicmi.

¹⁶ Cancuna cai quillcata rizashca q'uipaca, Laodicea pueblopi causac tandanacushca criccunamanpish rizachun cachanguichic. Shinallatac Laodicea puebloman ñuca cachashca quillcata paicuna cancunaman cachacpipish rizanguichic.

¹⁷ Shinallatac Arquipotapish, Apunchic Jesuspacta imata ruhuachun nishpa mingashcataca allita pactachichun nichic.

¹⁸ Pablomi quiquin maquihuan quillcashpa, “allilla cashca cachun” nishpa cachani. Ñuca carcelpi tiyacushcataca, ama cungaringuichicchu. Taita Diosca paipac sumaimana c'uyaita tucui cancunaman cushca cachun ninimi.