APOCALIPSIS 7 - Nuevo Testamento en Quichua Cañar 1996

Pasac chuscu chunga chuscu huaranga israelcunata ch'icanyachishcamanta

¹ Chai q'uipaca cai pachapi tiyac chuscu esquinacunapi chuscu angelcuna shayacuctami ricurcani. Chaicunaca cai pacha allpatapish, mama cuchatapish, ima yuracunatapish ama huaira huactachunmi, chuscu esquinacunapi jarcashpa shayacurca.

² Shinallatac inti llucshic ladomanta shuc ángel shamuctami ricurcani. Paica causac Diospac unanchinatami charicurca. Chai angelmi mama cucha yacutapish, cai pacha allpatapish huacllichiclla canata chasquic, chuscu esquinacunapi shayacuc angelcunaman caparishpaca:

³ —Ñucanchic Taita Diospacta ruhuaccunapac frentepi unanchingacaman cai pacha allpatapish, mama cucha yacutapish, shinallatac ima yuratapish ama imata ruhuanguichicchu— nirca.

⁴ Chai q'uipaca: “Israelpac*f** chunga ishcai c'ari huahuacuna mirarishcapuramanta, pasac chuscu chunga chuscu huaranga unanchishcacuna tiyan” nictami uyarcani.

⁵ Chaicunaca Judapac aillupuramanta chunga ishcai huaranga, Rubenpac aillupuramanta chunga ishcai huaranga, Gedpac aillupuramanta chunga ishcai huaranga,

⁶ Aserpac aillupuramanta chunga ishcai huaranga, Neftalipac aillupuramanta chunga ishcai huaranga, Manasespac aillupuramanta chunga ishcai huaranga,

⁷ Simeonpac aillupuramanta chunga ishcai huaranga, Levipac aillupuramanta chunga ishcai huaranga, Isacarpac aillupuramanta chunga ishcai huaranga,

⁸ Zabulonpac aillupuramanta chunga ishcai huaranga, Josepac aillupuramanta chunga ishcai huaranga, shinallatac Benjaminpac aillupuramanta chunga ishcai huaranga unanchishcacunami carca.

Yuraclla churanata churashca achcacunata ricushcamanta

⁹ Chai q'uipaca tucui llactacunamantapish, tucui aillucunamantapish, tucui laya rimaita rimaccunamantapish, shinallatac tucui laya gentecunamantapish pi mana yupaipac gentecunami mandashpa tiyarinapac ñaupapi, shinallatac Pactalla Ovejapac*f** ñaupapi shayacuctami ricurcani. Paicunaca yuraclla churanata churarishca, maquipica ramoscunatami charicurcacuna.

¹⁰ Chaicunaca: —¡Mandashpa tiyarinapi tiyacuc ñucanchic Taita Diospish, Pactalla Ovejapish ñucanchicta quishpichircami!— nishpami, sinchita caparicurca.

¹¹ Tucui angelcunaca mandashpa tiyarinapac, yuyaccunapac, shinallatac chuscu animalman ricchacunapac muyundictami shayacurcacuna. Paicunaca mandashpa tiyarinapac ñaupapi Taita Diosta alli ningapac pambacaman cumurishpaca:

¹² —¡Chashna cachun! Ñucanchic Taita Diosca sumac cashcamanta, yachac cashcamanta, alli nishca cashcamanta, imatapish ruhuaclla cashcamanta, jatun cashcamantapish, huiñaicamanmi alli nishpa pagui ninchic. ¡Chashna cachun!—nicurcacunami.

¹³ Chaimantaca chai yuyaccunapuramanta shucca: —Chai yuraclla churanata churashcacunaca, ¿picunatac, maimantatac shamushca?— nishpami, ñucaman tapurca.

¹⁴ Shina tapucpica: —Amito, canllatac yachanguimi— nircanimi. Shina nicpi paica cashnami nirca: —Chaicunaca jatun llaquimanta mishaccunami, shinallatac Pactalla Ovejapac yahuarhuan paicunapac churanata tacsharishcamanta yuraclla tucushcacunami.

¹⁵ Chaimantami Diosman mañana huasipi, Taita Dios mandashpa tiyarinapac ñaupapi tutapish, punzhapish paipacta ruhuancuna. Shina cacpimi mandashpa tiyarinapi tiyacucca pai chaipi cashcamanta tucui imapipish huacaichinga.

¹⁶ Chaipica yarcaihuanpish yacunaihuanpish ña mana llaquita apangacunachu. Intipish, shuctac ima rupachiccunapish mana rupachingachu.

¹⁷ Ashtahuanpish chai mandashpa tiyarinapac chaupipi cac Pactalla Ovejallatacmi michinga. Paillatacmi huiñai causaita cuc yacumanpish pushanga. Shinallatac tucui huiquicunatapish Taita Diosmi paicunapac ñahuicunamanta p'ichanga— nirca.