APOCALIPSIS 6 - Nuevo Testamento en Quichua Cañar 1996

Canchis unanchishcacunata pascashcamanta

¹ Chai q'uipaca chai Pactalla Ovejami*f** canchispi unanchishca unanchicunamanta shuc niqui unanchishcata pascarca. Shinallatac chai chuscu animalman ricchacunamanta shucca urcu tulun nic shina sinchita rimashpaca: “¡Shamui!” nicta uyarcani.

² Shina nicpi ñuca ricushpaca, yuraclla caballotami ricurcani. Chai caballopac jahuapi tiyacucca shuc arcota apashcami carca. Paiman coronata cucpimi, atishpa mishangapac llucshirca.

³ Ishcai niqui unanchishcata Pactalla Oveja pascacpica, chai animalman ricchacunamanta ishcai niqui animal rimashpaca: “¡Shamui!” nictami uyarcani.

⁴ Chaimantaca shuc puca caballomi llucshirca. Chai caballopi tiyacucca cai pachapi sumac causaita anchuchishpa, caishuc chaishuc macanacushpa huañuipi churanatami chasquirca. Shinallatac shuc jatun espadatapish chasquircami.

⁵ Quimsa niqui unanchishcata Pactalla Oveja pascacpica, chai animalman ricchacunamanta quimsa niqui animal rimashpaca: “¡Shamui!” nictami uyarcani. Chaimantaca shuc yana caballotami ricurcani. Chai caballopi tiyacucca paipac maquipi shuc balanzatami charicurca.

⁶ Shinallatac chai chuscu animalman ricchacunapac chaupimanta shuc rimashpaca: “Ishcai libra trigollami shuc punzha trabajoca valinga. Shinallatac sucta libra cebadapish shuc punzha trabajollatacmi valinga. Shina cacpipish aceiteta, vinota ama imata ruhuanguichicchu” nishcatami uyarcani.

⁷ Chuscu niqui unanchishcata Pactalla Oveja pascacpica, chai animalman ricchacunamanta chuscu niqui animal rimashpaca: “¡Shamui!” nictami uyarcani.

⁸ Chaimantaca shuc quillu caballotami ricurcani. Chai caballopac jahuapi tiyacucpac shutica Huañui nishcami carca. Chai caballopi tiyacucpac huashapica, Ucu Pacha nishcapish carcami. Paicunaca cai pachapi causaccunamanta chuscumanta shucta chaupishpa macanacuicunapi, ung:uicunahuan, ima mana p'ucucpi yarcaihuan, shinallatac cai pachapi cac animalcuna canishcahuan huañuchic canatami chasquirca.

⁹ Pichca niqui unanchishcata Pactalla Oveja pascacpica, Diosmanta allita huillashcamanta huañuchishcacunapac almacuna altar ucupi cactami ricurcani.

¹⁰ Chaimantaca sinchita caparishpami: —Tucuita Mandac, jucha illac Taita Dioslla, allpa pachapi causaccunataca, ¿ima punzhacamantatac ñucanchicta huañuchishcamantaca taripashpa llaquichigringuiyari?— nircacuna.

¹¹ Chashna nicpi paicunaman yuraclla churanata cushpaca: —Cancuna shinallatac Jesucristopacta ruhuaccuna cashcamanta mashnacuna huañuchina cashca pactangacaman, ashata samaricuichiclla— nictami uyarcani.

¹² Sucta niqui unanchishcata Pactalla Oveja pascacpica, allpa ima mundo chucchucpi, intipish yana churanata churarishca shina tucucpi, quillapish pucayashpa yahuar shina tucurca.

¹³ Ima shinami huaira sinchita cuyuchicpi yuramanta higocuna urman shinami, jahua pachamanta cai allpa pachaman lucerocunaca urmarca.

¹⁴ Jahua pachaca shuc papelta tandac shinami tucui chingarirca. Urcucunapish, yacu chaupipi cac allpacunapish maipi cashcamanta tucuimi cuyurirca.

¹⁵ Shinallatac cai pachata jatun mandaccunapish, soldadocunata jatun mandaccunapish, chayuccunapish, jatun pushaccunapish, serviccunapish, mana serviccunapish, tucuimi urcupi tiyac rumi jutcucunapi, shinallatac machaicunapi miticugrircacuna.

¹⁶ Chaipimi paicunaca urcucunatapish, rumicunatapish rimashpaca: —Mandashpa tiyarinapi tiyacucpac ñaupamanta, shinallatac Pactalla Oveja p'iñarishpa jatun llaquita cachanamantapish, ¡ñucanchic jahuapi urmashpa pacaichicyari!

¹⁷ Paicuna yallita p'iñarishpa llaquichina punzhami shamushca. ¿Chai llaquita apanataca pitac pudinga?— nircacuna.