APOCALIPSIS 21 - Nuevo Testamento en Quichua Cañar 1996

Jahua pachapish, cai pachapish mushuc tucushcamanta

¹ Chai q'uipaca ñaupaman cac jahua pachapish, cai pachapish shinallatac mama cucha yacupish chingaricpi, jahua pachatapish, cai pachatapish mushuc cashcatami ricurcani.

² Jahua pacha Diospac ñaupamanta Diospaclla cac mushuc Jerusalén pueblo, novio cusahuan tupangapac allichirishca shina urai shamucuctami ricurcani.

³ Mandashpa tiyarinamanta sinchita shuc rimashca uyarishpaca: —Cunanca Taita Diosca gentecunapac chaupipimi causacun. Paicunahuanmi tucui causaipi causanga. Paicunaca Diospac huahuami canga. Paillatacmi paicunahuanca causanga.

⁴ Paica ñahuicunamantapish tucui huiquita p'ichangami. Huañuipish, llaquilla canapish, huacaicunapish, nanaicunapish ña mana tiyangachu. Ñaupaman ima tiyashcapish cunanca ña mana tiyangachu— nirca.

⁵ Chai q'uipaca mandashpa tiyarinapi tiyacucca: —Ñucaca tucuitami mushucta ruhuani— nirca. Shinallatac paica: —Cai ñuca nishcacunaca chashnatac cashcamanta shunguta churanallami. Chaicunata quillcai— nirca.

⁶ Chai q'uipaca ñucaman cashnami nirca: —¡Ñami tucui pactachishca! Ñucami callari A shina, tucuri Z shina tucuita callarichicpish, tucuchicpish cani. Maijanpish yacunayaita charicmanca, huiñai causaita cuc tucyacuc yacutami yanga ubiachisha.

⁷ Maijanpish millaita mishaccunaca paicuna japina cashcata japingami. Ñucaca paicunapac Diosmi casha, shinallatac paicunapish ñucapac huahuacunami canga.

⁸ Ashtahuanpish manchaccunaca, mana criccunaca, yalli millaicunaca, huañuchiccunaca, huaclliriccunaca, brujiaccunaca, ruhuashcalla dioscunata adoraccunaca, shinallatac tucui llullaccunaca azufrehuan rupacuc nina cuchapi shitashcami canga. Chaica q'uipa huañuimi canga— nirca.

Mushuc Jerusalenmanta

⁹ Chai q'uipaca canchis tucurina llaquicunata copapi charicuc, chai canchis angelcunapuramanta shuc ángel shamushpaca: —Shamui, Pactalla Ovejapac*f** huarmi cana novia allichishcata ricuchisha— nircami.

¹⁰ Diospac Espíritu ñucata japicpimi chai ángel shuc jatun urcu jahuaman pushashpa, jahua pacha Diospac ñaupamanta Diospaclla cac Jerusalén pueblo urai shamucucta ricuchirca.

¹¹ Chai puebloca Diospac sumaimana achiclla cashcahuanmi jagan nicurca. Chaica valishca rumi shina, jaspi rumi shina, vidrio shina jagan nicucmi carca.

¹² Chai pueblo muyundictaca jahuacaman jarcashcami carca. Chunga ishcai pungutami charirca. Tucui chai pungucunapimi shuc ángel carca. Shinallatac chai pungucunapica Israelpac*f** chunga ishcai aillucunamanta shuc aillupac shutita quillcashcami carca.

¹³ Quimsa punguca inti llucshic ladoman, cutin quimsa punguca inti yaicuc ladoman, cutin quimsa punguca ura ladoman, cutin quimsa punguca jahua ladomanmi carca.

¹⁴ Chai pueblota jarcac callari pircapica, chunga ishcai rumicunami carca. Chai rumicunapica, Pactalla Ovejapac chunga ishcai acllashca huillaccunapac caishucpac chaishucpac shutitami quillcashca carca.

¹⁵ Ñucahuan parlanacuc angelca pueblotapish, pungucunatapish, muyundic jarcashcatapish medina curi varatami charicurca.

¹⁶ Chai puebloca sunimanpish, anchomanpish chai shinallatacmi carca. Ángel varahuan medishpaca, ishcai huaranga ishcai pasac kilometrotami llucchirca. Sunimanpish, anchumanpish, jahuamanpish chai shinallatacmi carca.

¹⁷ Shinallatac muyundic jarcashcata medishpaca, gentecuna medishca shinallatacmi sucta chunga pichca metrota llucchirca.

¹⁸ Chai muyundic pircashcaca jaspi rumimanta pircashcami carca. Cutin chai puebloca llambuclla vidrio shina curimanta ruhuashcami carca.

¹⁹ Chai pueblota jarcac callari pircaca tucui laya valishca rumicunahuan allichishcami carca. Chai rumicunaca jaspi rumi, zafiro rumi, ágata rumi, esmeralda rumi,

²⁰ ónice rumi, cornalina rumi, crisólito rumi, berilo rumi, topacio rumi, crisoprasa rumi, jacinto rumi, amatista rumimi carca.

²¹ Shuc shuc pungumi shuclla perlamanta*f** ruhuashca carca. Shina cacpica chunga ishcai pungucunaca chunga ishcai perlacunami carca. Chai pueblopi cac jatun ñanca llambuclla vidrio shina curimanta ruhuashcami carca.

²² Chai pueblopica tucui imatapish ruhuac Mandac Diospish, shinallatac Pactalla Ovejapish Diosman mañana huasi shina cashcamantami, chaipica Diosman mañana huasitaca mana ricurcani.

²³ Chai pueblotaca Taita Dios pai sumaimana cashcahuan, shinallatac Pactalla Oveja lámpara shina achicyachicucpimi, intipish, quillapish achicyachingapacca mana tiyana carca.

²⁴ Chai pueblo achicyachicpimi, tucui llactacunapi causaccunaca achicpi puringacuna. Shinallatac cai pachapi causac jatun mandaccunapish tucui ima charishcacunatami chaimanca apangacuna.

²⁵ Chai pueblopi tuta mana tiyacpi punzhalla cacpimi, pungucunapish jaicapi mana huichcaringa.

²⁶ Shinallatac chaimanca tucui llactacunamantami ima sumaccunatapish, ima charishcacunatapish apangacuna.

²⁷ Shina cacpipish chai pueblomanca juchayuccunapish, millaita ruhuaccunapish, llullaccunapish mana yaicungachu. Ashtahuanpish Pactalla Oveja charicuc, huiñaita causangapac quillcachina libropi shutita quillcachishcacunallami chaimanca yaicunga.