APOCALIPSIS 18 - Nuevo Testamento en Quichua Cañar 1996

Jatun Babilonia pueblo tucurishcamanta

¹ Chai q'uipaca imatapish ruhuaclla cashcahuan, jahua pachamanta shuc ángel urai shamucuctami ricurcani. Chai ángel paipac sumaimana cashcahuan achicyachicpimi, cai pachaca punzha shina achicyarca.

² Chai ángel sinchita caparishpaca: —¡Babilonia jatun puebloca tucui urmashcami! Cunanca supaicuna, millai espiritucuna, shinallatac p'iñana millanayai volashpa puric animalcuna causana pueblomi tucushca.

³ Tucui llactacunapi causaccunami vinota ubiashpa machac shina, chai pueblota c'atishpa huacllirishcacuna. Cai pachapi tiyac jatun mandaccunapish paihuanmi huacllirishcacuna. Shinallatac chai pueblo yallita chayucyanata munashcamantami, tucui llactacunamanta c'atushpa randishpa causaccunaca yallita chayucyashcacuna— nircami.

⁴ Cutinllatac jahua pachamanta shuc rimashca uyarishpaca: —¡Ñuca acllashca huahuacunalla! Paicunahuan pacta mana llaquichishca cangapac, paicuna shina mana juchata ruhuangapacca, chai pueblota shitashpa llucshichic.

⁵ Paicunapac juchacunaca ashtahuan ashtahuan mirarishpami, jahua pachacaman chayashca. Shinallatac tucui paicunapac juchata ricushpami, Taita Diosca llaquichinata yuyarishca.

⁶ ¡Chai pueblotaca pai llaquichishca shinallatac llaquichichic! ¡Pai shuc cutinhuan llaquichishca cacpica, ishcai cutinhuan llaquichichic! ¡Shinallatac pai imata ruhuashcamantaca, chaupihuan yallita ruhuaichic! ¡Ubianatapish pai ubiachishcamanta, ishcai cutinhuan yallita chapushpa ubiachichic!

⁷ Pai jatun tucushpa munashcata ruhuashpa, cushicushpa causashcamantaca, ¡chai shinallatac llaquichichic! Paica paipac shungupica: ‘Jatun mandac huarmi shinami tiyacuni. Cusa illacpish mana canichu, shinallatac llaquillapish mana canichu’ nishpami niricun.

⁸ Chaimantami shuc punzhallapi paita llaquichic llaquicunaca japinga. Chai llaquicunaca huañuipish, huacaipish, shinallatac yarcaipishmi canga. Mandac Taita Dios imatapish ruhuaclla cashcamantami, paitaca juchanchishpa ninahuan rupachinga— nirca.

⁹ Paihuan huacllirishpa, munashcata ruhuashpa cushicuc cai pachapi tiyac jatun mandaccunaca chai pueblo rupashpa cushni llucshicucta ricushpaca, chai pueblomanta llaquirishpami yallita huacangacuna.

¹⁰ Paita llaquichicushcata ricushpa, manchaihuan carupi saquirishpaca: —¡Tucuimanta yalli jatun pueblolla! ¡Aij, aij, cungaillami canta llaquichina pachaca chayamun!— ningacunami.

¹¹ Tucui llactacunamanta c'atushpa randishpa causaccunapish, pipish paicunapac c'atunacunata mana randiccuna tiyashcamantaca, chai pueblomanta llaquirishpami yallita huacangacuna.

¹² Chai c'atunacunaca curi, cullqui, sumac rumicuna, perlascunami carca. Shinallatac valishca lienso, seda, morado, puca pañucunami carca. Shinallatac tucui laya mishquilla ashnacuc caspicuna, marfilmanta ruhuashcacuna, sumac caspimanta ruhuashcacuna, broncemanta ruhuashcacuna, fierromanta ruhuashcacuna, marmolmanta ruhuashcacunami carca.

¹³ Shinallatac canela, mishquilla ashnacuccuna, incienso, mirra,*f** mishquiman ashnacuc jambicuna, vino, aceite, cutashca jarina, trigo, aparic animalcuna, ovejacuna, caballocuna, carrocuna, amopacta ruhuac gentecunapish carcami.

¹⁴ Shinallatac chai pueblotaca: —Can mai munashca micunacunataca ña mana charinguichu. Can tucui chai sumaimana charishcacunaca huiñaipacmi chingarishca— ningacuna.

¹⁵ Chai pueblopi c'atushpa randishpa chayucyaccunaca chai llaquichicushcata ricushpaca, manchaihuan yallita huacashpami carupi saquiringacuna.

¹⁶ Chashna saquirishpaca: —¡Aij, aij, jatun pueblolla! Canca sumaimana lino nishca morado, shinallatac puca churanata churarishca sumac huarmi shinami carcangui. Shinallatac curihuanpish, sumaimana rumicunahuanpish, perlascunahuanpish allichishcami carcangui.

¹⁷ Cai tucui charishcacunaca shuc ñahui quimllaillapimi tucui tucurishca— ningacunami. Barcopi riccunapish, barcota purichiccunapish, barcota purichicta mandaccunapish, yacupi imata ruhuashpa causaccunapish chaimanta carupimi shayacungacuna.

¹⁸ Chai jatun pueblo rupacushcamanta cushni llucshicucta ricushpaca: —¿Cai jatun pueblo shinaca maijan pueblotac tiyangayari?— nishpami caparingacuna.

¹⁹ Shina nishpaca, mai llaquirishpa yallita huacashpami, ñutu allpata umapi churashpaca: —¡Aij, aij, jatun pueblolla! Can charishcacunamantami mama cucha yacupi barcota chariccunaca chayuc tucushcacuna. Shina cashpapish shuc ñahui quimllaillapimi tucui tucurishca— nishpami caparingacuna.

²⁰ ¡Chai pueblota tucuchishcamantaca Diospaclla caccunapish, Jesusmanta huillachun acllashcacunapish, Diosmanta ñaupa huillaccunapish, shinallatac jahua pachapi tucui causaccunapish cushicuichic! Cancunata llaquichic cashcamantami Taita Diosca chai pueblotaca chashna llaquichishca.

²¹ Chai q'uipaca imatapish ruhuaclla shuc ángel shamushpaca, shuc rumitami japirca. Chai rumica cutana jatun rumi shinami carca. Chaita japishpa mama cucha yacuman shitashpaca: —Chai shinallatacmi Babilonia jatun pueblolla, chingarishpa jaicapi mana ricuringui.

²² Shina chingaricpica flautapi tocashcapish, arpapi tocashcapish, cornetapi tocashcapish, shinallatac maijan cantashcapish cambac callecunapica jaicapi mana uyaringachu. Tucui imata ruhuashpa causaccunapish jaicapi mana tiyangachu. Cutana rumi huacashcapish mana uyaringachu.

²³ Shinallatac achicyachic luzpish jaicapi mana tiyangachu. Cazarashpa cushicuipish mana tiyangachu. C'atushpa randishpa causaccunapish maimi chayucyashcacuna. Canca brujiashpami tucui llactacunapi causaccunatapish llullashpa umashcangui— nirca

²⁴ Chai pueblomi Diosmanta ñaupa huillaccunatapish, Diospaclla caccunatapish, shinallatac tucui cai pachapi causaccunatapish huañuchishcamanta juchanchishca tucurca.