APOCALIPSIS 16 - Nuevo Testamento en Quichua Cañar 1996

Llaquichic canchis copacunamanta

¹ Chai q'uipaca Diosman mañana huasi ucumantaca canchis angelman sinchita rimashpaca: —¡Richic, Taita Dios p'iñarishpa cachashca canchis copacunapi tiyac llaquichinata allpapi t'alligrichic!— nishcatami uyarcani.

² Shina nicpi shuc niqui ángel rishpaca, pai charicushca copatami allpapi t'allirca. Chashna t'allicpica, manchana animalpac unanchita charicucta, shinallatac paiman ricchata alli niccunataca millai sisu ung:uimi japirca.

³ Ishcai niqui ángel rishpaca, pai charicushca copataca mama cucha yacupimi t'allirca. Chashna t'allicpica, huañushca runapac yahuar shinami chai yacuca yahuar tucurca. Chashna tucucpica, tucui chai yacupi causac animalcunami huañurca.

⁴ Quimsa niqui ángel rishpaca, tucyac yacupi shinallatac callpac yacupimi pai charicushca copataca t'allirca. Shina t'allicpica, chai yacuca yahuarmi tucurca.

⁵ Chai q'uipaca yacucunata mandac ángel rimashpaca: —¡Jucha illac Dioslla! Canllatacmi cangui, canllatacmi carcangui. Chashna llaquita cachashpaca, allitami ruhuashcangui.

⁶ Paicunami cambaclla caccunatapish, canmanta huillaccunatapish yahuarta jichashpa huañuchircacuna. Paicunaca chashna chasquina cashcamantami, canpish chashnallatac paicunamanca yahuarta ubiachishcangui— nishcatami uyarcani.

⁷ Shinallatac altar ucumanta rimashpaca: —¡Tucui imatapish ruhuac Mandac Dioslla! Canca imatapish llaquichina cashcatatac ricushpami taripangui— nishcatami uyarcani.

⁸ Chuscu niqui angelca intipimi pai charicushca copataca t'allirca. Chashna t'allishpaca, inti ashtahuan rupacyashpa gentecunata rupachichunmi t'allirca.

⁹ Chashna ruhuacpica, tucui gentecunami ruparcacuna. Shina cacpipish Taita Diosman cutirishpa, paita alli ninataca mana munarcacunachu, ashtahuanpish chai llaquicunatapish anchuchiclla Diostaca c'amishpami rimarcacuna.

¹⁰ Pichca niqui angelca manchana animal mandashpa tiyarinapimi pai charicushca copataca t'allirca. Shina t'allicpica, pai mandanaca amsa purayashcami tucurca. Shina tucucpica, nanaihuanmi gentecunaca c'alluta canirircacuna.

¹¹ Ashtahuanpish millaita ruhuanataca manatac saquircacunachu. Sisu ung:uihuanpish, nanaihuanpish cashpami, jahua pacha Taita Diostaca c'amishpa rimarcacuna.

¹² Sucta niqui angelca Eufrates jatun yacupimi pai charicushca copataca t'allirca. Chashna t'allicpica, inti llucshic ladomanta jatun mandaccuna shamushpa chimbachunmi, chai yacuca chaquirca.

¹³ Dragonpac shimimantapish, manchana animalpac shimimantapish, llullac huillacpac shimimantapish sapoman riccha quimsa mana alli espiritucuna llucshicuctami ricurcani.

¹⁴ Chaicunaca pi mana ruhuaipacta ruhuashpa ricuchic, supaipac millai espiritumi carca. Chaicunaca tucui cai pachapi tiyac jatun mandaccunapacman rishpami, tucui imatapish ruhuac Diospac jatun macanacuna punzhapi macanacungapac tandachigricurca.

¹⁵ Chaipica: —Uyaichic, ñucaca cancuna mana yuyashca horaspimi shuhua shamuc shina shamusha. Maijanpish riccharishca shina, churanata churarishca chapacucmanca, ¡mai cushicuimi canga! Chashna churarishca mana lluchulla cashpami, mana pinganachinga— nishcatami uyarcani.

¹⁶ Chai millai espiritucunaca hebreo*f** rimaipi Armagedón nishca pambapimi tucui mandaccunata tandachirca.

¹⁷ Canchis niqui angelca huairapimi pai charicushca copataca t'allirca. Chashna t'allicpica, jahua pachapi cac Diosman mañana huasipi cac mandashpa tiyarinamanta sinchita rimashpaca: “Ñami tucui tucuchishca” nishcami uyarirca.

¹⁸ Chashna nicpica urcu tulun nishcapish, rimashcacunapish uyarircami. Relampa achic nishcapish ricurircami. Shinallatac gentecuna cai pachapi tiyashca punzhamanta pacha jaicapi chucchushcatami, allpaca chucchurca.

¹⁹ Chashna tucucpica, jatun Babilonia puebloca quimsapimi chaupirirca. Shinallatac cai pachapi tiyac tucui pueblocunapish t'uñirircami. Chai jatun Babilonia pueblotaca jayac vinota ubiachic shina p'iñaihuan llaquichingapacmi, Taita Diosca yuyarirca.

²⁰ Yacu chaupipi tiyac tucui llactacunapish, shinallatac urcucunapish tucuimi chingarirca.

²¹ Shinallatac jahua pachamantaca shuc quintal shina llashac runducunami tucui gentecunapac jahuapi urmarca. Shina urmashpa yallimana llaquichicpimi, gentecunaca Taita Diosta c'amishpa rimarcacuna.