APOCALIPSIS 15 - Nuevo Testamento en Quichua Cañar 1996

Ña tucurina canchis llaquicunata angelcuna charicushcamanta

¹ Cutinllatacmi jahua cielopica shuctac jatun mancharinata ricurcani. Chaica tucurina canchis llaquicunatami canchis angelcuna charicurca. Chai llaquicunahuanmi Taita Diospac p'iñaica ña tucurigricurca.

² Shinallatac cristalman riccha jatun cucha yacu ninahuan chapushcatami ricurcani. Chai yacu cucha patapica manchana animaltapish, paiman ricchatapish mishashpa, paipac shuti yupaitapish mana chariccuna Dios cushca tocana arpacunata apashpa shayacuctami ricurcani.

³ Chaipica Diospacta ruhuac Moisespac cantota, shinallatac Pactalla Ovejapac*f** cantotapish cashna nishpami cantacurcacuna: —¡Tucui imatapish ruhuac Mandac Dioslla! Can tucui ima ruhuashcacunaca sumaimana jatunmi. ¡Tucui llactacunata Mandac Dioslla! Canca imatapish allita, shinallatac imapish cashcallatami ruhuangui.

⁴ ¡Mandac Dioslla! ¿Pitac cantaca mana manchangayari? ¿Pitac cantaca mana alli ningayari? Canllami jucha illac cangui. Shina cashcamantami tucui llactacunapi causaccuna shamushpa, cantaca alli ningacuna. Can ruhuashcacunaca tucuimi alli ricurishca— nicurcacuna.

⁵ Chai q'uipaca jahua pachapi cac, ari nishcata ricuchic Diosman mañana carpa huasi pascarictami ricurcani.

⁶ Diosman mañana chai huasimantaca, canchis angelcunami canchis llaquicunata apashca llucshirca. Paicunaca linomanta ruhuashca jagan nicuc churanata churashca, shinallatac pechopica curimanta ruhuashca chumbita churashcami carca.

⁷ Chai chuscu animalman ricchapuramanta shucca, huiñaicaman causacuc Taita Dios p'iñarishpa llaquichinataca curimanta ruhuashca canchis copapi jundachishpa, canchis angelmanmi curca.

⁸ Taita Dios imatapish ruhuaclla cashcamanta shinallatac sumaimana achiclla cashcamantaca, cushnimi Diosman mañana huasipica jundarca. Shina cacpimi canchis angelcuna canchis llaquicunahuan llaquichinata tucuchingacaman, chaimanca pipish mana yaicui pudircacuna.