APOCALIPSIS 14 - Nuevo Testamento en Quichua Cañar 1996

Pasac chuscu chunga huaranga quishpirishcacuna cantashcamanta

¹ Chai q'uipaca Sión*f** urcu jahuapi Pactalla Oveja*f** shayacuctami ricurcani. Paihuanca pasac chuscu chunga chuscu huaranga quishpirishcacunami frentepi Pactalla Ovejapac shutita, shinallatac Taita Diospac shutita quillcashca carcacuna.

² Shinallatac jahua pachamantaca achca yacu huaj nicuc shina, urcucuna sinchita tulun nicuc shina, shinallatac tauca tocaccuna arpapi tocac shinami uyarirca.

³ Chaicunaca mushuc cantotami mandashpa tiyarinapac ñaupapi, chuscu animalman ricchapac ñaupapi cantacurcacuna. Chai cantotaca pipish mana yachac chayarcachu, ashtahuanpish chai pasac chuscu chunga chuscu huaranga cai pachamanta quishpirishcacunallami yachac chayarcacuna.

⁴ Paicunaca huarmihuan mana chayarishca, chuyacunami carca. Paicunaca Pactalla Oveja maita ricpipish c'aticcunami. Paicunaca gentecunapuramanta Taita Diosmanpish, Pactalla Ovejamanpish cungapac punta acllashcacuna shinami quishpirishcacuna.

⁵ Paicunaca jaicapi imata mana llullacchu carcacuna. Shina cashpami Diospac ñaupapica jucha illac cancuna.

Quimsa angelcuna huillashcamanta

⁶ Chai q'uipaca shuc angelmi jahuata volacucta ricurcani. Chai angelca tucui llactacunapi causaccunaman, tucui aillucunaman, tucui laya rimaita rimaccunaman, shinallatac tucui laya gentecunaman huiñaicaman tiyac alli huillaita huillangapac huillanatami charicurca.

⁷ Chai ángel sinchita huillashpaca: —¡Taita Dios taripana punzhaca ñami pactamushca! Shina cashcamanta Taita Diosta manchaichic, shinallatac paita alli nichic. ¡Cai pachatapish, jahua pachatapish, mama cucha yacutapish, shinallatac tucyacuc yacutapish ruhuacta alli nichic!— nirca.

⁸ Chaipac c'atic angelca: —¡Babilonia jatun puebloca ñamari tucui tucurin! Paica vinota ubiachic shinami, pai huacllirishpa tucui llactacunapi causaccunata huacllirinapi urmachishca— nirca.

⁹ Chaipac c'atic quimsa niqui ángel sinchita rimashpaca: —Maijanpish chai manchana animalta shinallatac paiman ricchata alli nishpa maquipi cashpa, frentepi cashpa unanchishca cacca,

¹⁰ Taita Diosmanta shamuc jatun llaquitami vinota ubiac shina chasquinga. Chaitaca vasopi t'allishpa chasquic shinami, Diospac p'iñaitaca chasquinga. Chaicunaca Pactalla Ovejapac ñaupapi, shinallatac Diospaclla cac angelcunapac ñaupapimi ninahuanpish, azufrehuanpish llaquichishca canga.

¹¹ Chai jatun llaquimantami cushnica huiñaita llucshicunga. Chai manchana animaltapish, paiman ricchatapish ‘allimari cangui’ nishpa, paipac shutita alli nishpa unanchita apaccunamanca tutapish, punzhapish llaquimanta samarinaca mana tiyangachu— nirca.

¹² Caipimi Diospaclla caccunaca Dios mandashcacunata cazushpa, mana shaicushpa Jesusta alli c'aticcuna cashcataca ricuchingacuna.

¹³ Chaimantaca jahua pachamanta shuc rimashca uyarishpaca: —Caita quillcai: Caimanta q'uipaman Apunchic Jesushuan shuc shinalla tucushpa huañuccunamanca, ¡mai cushicuimi canga!— nishcatami uyarcani. Diospac Espiritupish: —Ari, chashnami can. Paicuna ima ruhuacushcamantaca samaringacunami. Paicuna ima ruhuashcapish paicunahuanmi canga— ninmi.

Granota tandac shina, cai pachapi causaccunata tandachinamanta

¹⁴ Chai q'uipaca shuc yuraclla p'uyutami ricurcani. Chai p'uyu jahuapica Runa Tucungapac shamushcaman*f** riccha tiyacuctami ricurcani. Paica umapica curi coronata churashca, shinallatac maquipica shuc jinu hosis apashcami carca.

¹⁵ Shinallatac Diosman mañana huasimantaca shuc ángel llucshishpa, p'uyupi tiyacucta sinchita rimashpaca: —Granota tandana punzhaca ñami pactamushca. Granoca ñami p'ucushca. ¡Chaimanta hosista japishpa p'iti!— nirca.

¹⁶ Shina nicpi chai p'uyu jahuapi tiyacucca ña cai pachapi tandana cashcamantami, hosishuan cai allpapi causaccunata tandachirca.

¹⁷ Chai q'uipaca, shuctac ángel jahua pachapi cac Diosman mañana huasimanta shuc jinu hosishuanmi llucshirca.

¹⁸ Shinallatac ninata cuidachun churashca shuc ángel altarmanta llucshishpaca, jinu hosista charicucta sinchita rimashpami: —¡Cambac hosista llucchishpa, cai pachapi tiyac uvasta p'iti! Uvasca ñami p'ucushca— nirca.

¹⁹ Shina nicpi chai angelca hosista japishpami, cai pachapi tiyac uvastaca p'itirca. Shina p'itishpaca, capingapacmi huacaichinapi shitarca. Chaica Diosmanta shamuc jatun llaquichinatami nisha nin.

²⁰ Chai uvascunataca pueblomanta canzhamanmi capishca carca. Chai uvascuna huacaichinamantaca yahuarmi quimsa pasac kilometrocaman rishpa, caballopac shimi shinacaman jundarca.