APOCALIPSIS 12 - Nuevo Testamento en Quichua Cañar 1996

Huarmimantapish, dragón animalmantapish

¹ Jahua cielopica shuc jatun mancharinami ricurirca. Chaipica shuc huarmimi intihuan pillushca shina churarishca carca. Quillaca paipac chaqui ucupimi carca. Paica umapica chunga ishcai lucerocunayuc corona apashcami carca.

² Chai huarmica huicsayucmi carca. Chashna huicsayuc cashpami sajuarina punzha chayacpica, nanaihuan llaquita apashpa caparirca.

³ Chai q'uipaca cutinllatacmi jahua cielopica shuc jatun mancharina ricurirca. Shuc jatun puca dragón nishca manchana animalmi canchis umayuc, chunga gachuyuc ricurirca. Umacunapica coronacuna apashcami carca.

⁴ Chupahuanca quimsapi chaupishcamanta shuc parte lucerocunatami jahua cielomanta cai pachaman aisashpa shitarca. Chai dragonca huarmi ña sajuarinca huahuata micungapacmi, chai huarmipac ñaupapi shayarirca.

⁵ Chai huarmica shuc c'ari huahuatami sajuarirca. Chai huahuami tucui cai pachapi causaccunataca fierro varahuan mandanga. Ashtahuanpish chai huahuaca mandashpa tiyarinapi tiyacuc Diospac ñaupamanmi apashca carca.

⁶ Shinallatac chai huarmica shitashca pambamanmi miticushpa rirca. Chaipimi Taita Diosca huaranga ishcai pasac sucta chunga punzhacaman caracpi, micushpa causachun ch'icanyachishcami carca.

⁷ Chai q'uipaca shuc macanacuimi jahua pachapi tiyarca. Chaipica mandac ángel Miguelmi paipac angelcunata tandachishpa dragonhuan macanacurca. Shinallatac dragonpish paipac angelcunata tandachishpami macanacurca.

⁸ Shina cashpapish paicunaca mana misharcachu. Shina mana mishashcamantami jahua pachapica ña mana ashtahuan causanata charircacuna.

⁹ Chaimantami jatun dragontaca jahua pachamanta llucchishpa shitarcacuna. Chai dragonmi ñaupa rucu culebraca can. Paillatacmi diablo nishcapish, Satanás*f** nishcapish can. Paica tucui cai pachapi causaccunata llullashpa, mana allita ruhuachicmi. Chaimantami paipac angelcunandic cai pachaman llucchishpa shitarcacuna.

¹⁰ Shina tucushca q'uipaca jahua pachamanta sinchita caparishpaca: —Cunan punzhami quishpirinapish, Taita Diospac imata ruhuanapish, Taita Dios mandanapish, pai cachashca Quishpichic Cristo mandanapish chayamun. Tutapish, punzhapish Diospac ñaupapi ñucanchic shina criccunata juchanchishpa llaquichictaca ñami caimanta llucchishpa shitashca.

¹¹ Paicunaca Pactalla Oveja*f** huañushpa yahuarta jichashcamantapish, alli huillaita huillashcamantapish chai llaquichictaca mishashcami. Shinallatac huañuna cacpipish, mana manchashpami c'atircacuna.

¹² ¡Jahua pachapi causaccunaca cushicuichic! Ashtahuanpish allpa pachapi, shinallatac mama cucha yacupi causaccunaca, ¡aij, imachari tucunguichic! Ashalla punzhacuna tiyana cashcata yachashpami, diabloca yallita p'iñarishpa jahua pachamanta cancunapacman shamushca— nictami uyarcani.

¹³ Cai pachaman shitashca cashcata yachac chayashpami, dragonca chai c'ari huahuata charic huarmita huañuchisha nishpa c'ati callarirca.

¹⁴ Ashtahuanpish chai huarmimanca culebramanta caruyashpa, shitashca pambapi pai causagrichunmi, condorpac ishcai alasta volashpa richun curcacuna. Chaipi quimsa huata chaupita micushpa causachunpish curcacunami.

¹⁵ Chai culebraca callpacuc yacu tucushpa chai huarmita apachunmi, paipac shimimanta yacuta shitarca.

¹⁶ Ashtahuanpish huarmita ama yacu apachunmi, allpaca pascarishpa chai culebra shitashca yacutaca ucuyachirca.

¹⁷ Chashna tucucpimi dragonca chai huarmihuan yallita p'iñarishpa, chai huarmipac huahua huahuacunahuan macanacungapac rirca. Chaicunaca Dios mandashcacunata pactachiccunapish, shinallatac Jesusmanta huillashcata uyashpa alli c'aticcunapish canmi.

¹⁸ Chai dragonca mama cucha yacu patapimi shayacurca.