APOCALIPSIS 11 - Nuevo Testamento en Quichua Cañar 1996

Diosmanta ishcai huillaccunamanta

¹ Chai q'uipaca shuc medina carrizo vara shinata ñucaman cucpimi, cashna nishcataca uyarcani: —Jatari, Diosman mañana huasitapish, altartapish medi. Shinallatac chaipi Taita Diosman mashna mañaccunatapish yupai.

² Ashtahuanpish Diosman mañana huasi canzha pambataca ama medinguichu. Chaica Diosta mana ricsiccunaman cushcami. Paicunami chuscu chunga ishcai quillata Diospaclla cac pueblotaca ima shinapish llaquichinga.

³ Chai punzhacunapica huaranga ishcai pasac sucta chunga punzhacunacaman ñucamanta huillachunmi, yana churanata churarishca ishcai huillaccunata cachasha— nirca.

⁴ Chai ishcai huillaccunaca cai pachata mandac Taita Diospac ñaupapi shayacuc ishcai olivo yuracuna, shinallatac ishcai candelerocunami can.

⁵ Chaicunaca maijanpish paicunata llaquichisha nicpica, shimimanta ninata llucchishpami rupachinga. Chashna rupachicpimi, maijanpish llaquichisha nicca huañunga.

⁶ Chai ishcai huillaccunaca paicuna Diosmanta huillacui punzhacuna ama tamiachun jarcac canatapish charincunami. Shinallatac yacucunata yahuarman tigrachic canatapish, allpa pachapi ima tiyashcatapish tucui laya llaquicunahuan paicuna munashca shina llaquichic canatapish charincunami.

⁷ Ña paicuna tucui huillashca q'uipaca, manchaipac animalmi ucu pacha jutcumanta llucshishpa paicunahuan macanacunga. Chashna macanacushpaca, paicunata atishpami huañuchinga.

⁸ Chashna huañuchicpica, jatun pueblo ucupi tiyac callecunapimi paicunapac cuerpoca siricunga. Chai pueblollapitacmi paicunata Mandac Apunchic Jesustaca chacatashpa huañuchircacuna. Chashna jatun pueblo nishpaca, Sodoma pueblota, shinallatac Egipto llactatami chimbapurashpa nisha nin.

⁹ Chai huañushcacunataca tucui aillucunamanta, tucui laya rimaita rimaccunamanta, tucui laya gentecunamanta, shinallatac tucui llactacunamantapish quimsa punzha chaupicaman siricuctami ricungacuna. Chashna ricushpapish, enterrachunca mana saquingacunachu.

¹⁰ Diosmanta huillac chai ishcaicunaca cai pachapi causaccunataca yallitami llaquichishca carca. Chaimantami cai pachapi causaccuna chai ishcai huañushcata ricushpaca, yallitami cushicungacuna. Chashna cushicushpami, caishuc chaishuc imatapish caranacunga.

¹¹ Ashtahuanpish quimsa punzha chaupi tucucpica, causaita cuc espirituta Dios cachacpimi, paicunaca causarishpa jatarircacuna. Shinallatac chaita ricuccunaca yallitami mancharircacuna.

¹² Chai ishcai huillaccunaca: “¡Caiman huichicuichic!” nishpa, jahua pachamanta sinchita caparishcatami uyarca. Shina nicpica, paicunata p'iñaccuna ricucucpimi p'uyupi huichicurcacuna.

¹³ Chai pachallatac yallita allpa chucchucpimi, chai pueblopi cac huasicunamantaca chungamanta shuc urmarca. Chashna urmacpica, canchis huaranga gentecunami huañurca. Mana huañushca gentecunaca manchaillahuantacmi jahua pacha Taita Diostaca “allimari cangui” nircacuna.

¹⁴ Ishcai niqui llaquica tucurinmi. Shina cacpipish quimsa niqui llaquica ñallami chayamugrin.

Canchis niqui cornetapi tocashcamanta

¹⁵ Canchis niqui angelmi paipac cornetapi sinchita tocarca. Chashna sinchita tocacpimi, jahua pachapi caccunaca: —Tucui cai allpa pachapi cac llactacunaca, ñucanchic Taita Diospac, shinallatac pai cachashca Quishpichic Cristopac mandanami tucushca. Paimi huiñai huiñaita mandanga— nishpa, sinchita caparishcatami uyarcani.

¹⁶ Shina caparicpimi Diospac ñaupapi cac, paicunapac tiyarinapi tiyacuc ishcai chunga chuscu yuyaccuna pambacaman cumurishpa, Taita Diosta alli nircacuna.

¹⁷ Paicunaca cashnami nircacuna: —¡Tucui imatapish ruhuac Mandac Dioslla! Cantaca pagui ninchicmi. Canllatacmi cangui, canllatacmi carcangui. Tucui ima ruhuanatapish canllatacmi charingui. Shinallatac chaihuanmi tucui mandanatapish callarishcangui.

¹⁸ Tucui llactacunapi causaccunami p'iñarishca. Shina cacpipish can p'iñarishpa llaquichina punzhami chayamushca. Chai punzhaca huañushcacunata taripana punzhami. Chai punzhapica cambacta ruhuac canmanta huillaccunaman, cambaclla caccunaman, cambac shutita alli niccunaman, jatunman cashpa, uchillaman cashpa japina cashcataca cungui. Shinallatac cai pachapi llaquichiccunata tucuchina punzhami chayamushca— nircacuna.

¹⁹ Shina cacpica jahua pachapi tiyac Diosman mañana huasimi pascarirca. Chaipica Dioshuan ari ninacushcata huacaichina cajonmi ricurirca. Chashna ricuricpica urcucuna tulun nishcapish, rimashcacunapish uyarircami. Relampa achic nishcapish ricurircami. Allpapish chucchurcami, shinallatac ima mundo rundupish urmarcami.