APOCALIPSIS 10 - Nuevo Testamento en Quichua Cañar 1996

Shuc uchilla pillushca p'angata ángel charicushcamanta

¹ Chai q'uipaca imatapish ruhuaclla ángel jahua pachamanta p'uyupi pillurishpa shamucuctami ricurcani. Paica umapica cuichi apashca, ñahuica inti shina jagan nicuc, shinallatac changacunaca nina culun nishpa rupacuc shinami carca.

² Paica shuc uchilla pillushca p'anga pascashcatami maquipi charicurca. Alli chaquihuanca mama cucha yacupi, lluqui chaquihuanca allpapimi sarushpa shayacurca.

³ Shina shayacushpaca, león huacac shinami sinchita caparishpa rimarca. Shina caparicpica, canchis tulun nishcapish uyarircami. Shina canchis tulun niccunapac rimashcata uyashpaca, ñucaca quillcagrircanimi.

⁴ Shina quillcagricucpi jahua pachamantaca: —Chai canchis tulun nishpa rimashcataca ama quillcashpa, shungupi huacaichilla— nishcatami uyarcani.

⁵ Chai q'uipaca mama cucha yacupi, shinallatac allpapi sarushpa shayacuc angelca alli maquita jahuaman churarcami.

⁶ Shina churashpaca: —Jahua pachatapish, cai pachatapish, mama cuchatapish, shinallatac tucui chaipi ima tiyaccunatapish ruhuacpac, huiñaita causacpac shutipimi cashna nini: Cunanca shuyana punzhacunaca ña mana tiyangachu.

⁷ Ashtahuanpish canchis niqui ángel trompetapi tocacpica, Taita Diosmanta ñaupa huillac, paipacta ruhuaccunaman huillashca shinami, pai imata ruhuasha nishcataca pactachinga— nirca.

⁸ Chai q'uipaca jahua pachamanta chai rimashcallatatac cutin uyarishpaca: —Ri, chai yacupi, allpapi sarushpa shayacuc angelpac maquipi cac uchilla quillcashca p'anga pascashcata japigri— nirca.

⁹ Shina nicpi rishpa, uchilla quillcashca p'angata mañagricpi angelca: —Japi, micui. Cambac shimipica bunga mishqui shina mishquimi canga. Ashtahuanpish cambac huicsapica jayac tucungami— nirca.

¹⁰ Shina nicpi angelpac maquimanta uchilla quillcashca p'angata japishpaca, micurcanimi. Shina micucpica, ñuca shimipica bunga mishqui shina mishquimi carca. Ashtahuanpish micushca q'uipaca, ñuca huicsapica jayacmi tucurca.

¹¹ Chaita micushca q'uipaca: —Tauca pueblocunapish, llactacunapish, shuctac shuctac rimaita rimaccunapish, shinallatac jatun mandaccunapish ima tucuna cashcata cutin huillanami cangui— nircacunami.