2 TIMOTEO 3 - Nuevo Testamento en Quichua Cañar 1996

Q'uipa punzhacunapi gentecuna ima shina canamanta

¹ Q'uipa tucurina punzhacunapi llaqui punzhacuna shamuna cashcatapish yachanami cangui.

² Cai pachapi causac gentecunaca quiquinlla alli canata munashpami, cullquita yallimana charinata munangacuna. Jatun tucushpa, imapish mana allita ruhuashpami cushicunga. Shinallatac Diostapish mana alli nishpami rimangacuna. Taita mama ima nishcatapish mana uyangacunachu. Rumi shungu tucushpami, Diosmanta yachachishcatapish mana cazungacuna.

³ Shinallatac c'uyaitapish mana charishpami, mana llaquingacuna. Quiquinllatac mana jarcaric cashpami, imatapish parlaric cangacuna. Llaquichinallata munashpami, imapish allicunataca p'iñangacuna.

⁴ Taita Diosta cazunapac randica, imapish quiquin shungupi munashcata ruhuashpa cushicushpami, jatun tucushpa, ima millaitapish ruhuashpa llaquichina yuyailla cangacuna.

⁵ “Taita Diosman mañaccunami canchic” nishpapish, paicuna ruhuashcacunahuanca Taita Diosmantatac yachachishcataca yangatami ruhuangacuna. Chashna gentecunahuanca ama tandaringuichu.

⁶ Paicunapuramanta maijancunaca huasicunaman yaicushpa, ima nishcatapish criclla huarmicunata crichincunallami. Chai huarmicunaca tucui laya juchayuccuna, shinallatac tucui millai munai apashcami cancuna.

⁷ Paicunaca punzhanta yachacushpapish, cashcata nic yachachishcataca mana yachac chayancunachu.

⁸ Janes, shinallatac Jambres brujocuna Moisesta jarcac shinami, chai gentecunaca cashcata nic huillanataca jarcancuna. Chaicunaca imapish alli yuyaita mana charishpami, crinatapish saquishpa chingachishcacuna.

⁹ Shina cashpapish tucui gentecuna paicuna juizhu illac cashcata yachashpami, Janes shinallatac Jambres tucushca shina, mana unai huatacaman crichingacuna.

Ña tucuchingapac Pablo Timoteoman mingashcamanta

¹⁰ Chashna cacpipish canca ñuca yachachishcatapish, ñuca ima shina causacushcatapish, ima yuyaita charishcatapish, mana utca p'iñaric cashcatapish, cric cashcatapish, c'uyac cashcatapish,

¹¹ llaquita apashpa cushicuc cashcatapish yachanguimi. Antioquía pueblopi, Iconio pueblopi, shinallatac Listra pueblopi ñucata p'iñashpa llaquichishcata yachanguimi. Chashna llaquichicpipish, Apunchic Jesusllatacmi tucui chaicunamantaca huacaichirca.

¹² Maijanpish Apunchic Jesushuan shuc shinalla tucushpa, paipaclla causanata munaccunaca llaquita apangami.

¹³ Ashtahuanpish millaita ruhuaccunapish, shinallatac shuccunata pandachiccunapish punzhantami ashtahuan ashtahuan mana allipi c'atingacuna. Chashna cashpami ashtahuan pandachishpa, paicunapish pandaringacuna.

¹⁴ Chashna canapac randica, can imata yachacushcata crishpa alli c'atingui. Canca pi yachachishcataca yachanguimi.

¹⁵ Shinallatac huahuamanta pachami Dios quillcachishcataca yachangui. Chaillatacmi Jesucristota crishpa quishpirichun yachacta ruhuanga.

¹⁶ Dios quillcachishcaca tucuimi Diosllatac yuyaita cushpa quillcachishca. Chaimantami yachachingapacpish, mana alli ruhuaccunata rimangapacpish, cunangapacpish, shinallatac cashcata ruhuashpa causanata yachachingapacpish alli.

¹⁷ Chashna yachachishca cashpami, Diospacta ruhuaccunaca imatapish allita ruhuangapac allichirishca canga.