2 TESALONICENSES 3 - Nuevo Testamento en Quichua Cañar 1996

“Ñucanchicmanta Diosman mañaichic” nishcamanta

¹ Ña tucuchingapacca caitami nini: Cancuna chasquishca shinallatac, Apunchic Jesucristomanta huillashcata tucui llactacunapi sumacta utca chasquichunca, ñucanchicmanta Diosman mañaichic.

² Mana tucuichu criccuna can. Chashna cashcamanta mana allita ruhuac, millai gentecuna ñucanchicta ama llaquichichunpish, Diosman mañaichic.

³ Paicuna chashna cacpipish, Apunchic Jesusca tucui imatapish pactachic cashcamantaca, cancunataca sinchi criccunata ruhuashpa, millaimantapish huacaichingami.

⁴ Ñucanchic ima nishcacunata cancuna ña pactachicuc shinallatac, pactachishpa c'atina cashcatatacmi Apunchic Jesucristomantaca yachanchic.

⁵ Dios c'uyac shina cancunapish c'uyac cachun, shinallatac Cristo shina c'uyac shunguhuan llaquita apac cachunmi, Apunchic Jesusmanca mañanchic.

Trabajashpa causana cashcamanta

⁶ C'uyashca criccuna, Apunchic Jesuspac shutipimi ñucanchic yachachishcata mana cazushpa, mana trabajasha nishpa puric criccunahuanca ama tandarichun ninchic.

⁷ Ñucanchic cancunahuan cashpaca, mana trabajashpa yangallaca mana carcanchicchu. Chaitaca cancunaca allimi yachanguichic. Chaimantami chai shinallatac cancunapish causana canguichic.

⁸ Ñucanchicca pipac micunatapish mana yanga micurcanchicchu. Chaipac randica, micunata mañashpa cancunata mana p'iñachingapacmi tutapish, punzhapish mana samarishpa, imatapish ruhuashpa causarcanchic.

⁹ Ñucanchicca cancunaman imata mañashpapish, mañanallami carcanchic. Shina cacpipish ñucanchic ruhuashca shinallatac cancunapish ruhuachun nishpami, ñucanchic micungapacca imatapish trabajarcanchic.

¹⁰ Ñucanchic cancunahuan cashpaca: “Maijanpish mana trabajasha nicca ama micuchun” nishpami mandarcanchic.

¹¹ Ashtahuanpish cancunapuramanta maijancunataca mana trabajasha nishpa, huasi huasi yanga puric nictami uyarcanchic.

¹² Chai shina puriccunataca, Apunchic Jesuspac shutipimi causaipac micunata charingapacca cushicushpa trabajachun nishpa mandanchic.

¹³ Shina cacpipish c'uyashca criccuna, cancunaca imapish allita ruhuanataca mana shaicushpa ruhuacuichiclla.

¹⁴ Maijanpish cai quillcapi nishcata mana cazucta ricushpaca, pai pingachunmi “caica mana allichu” nishpa, paihuanca mana tandanacuna canguichic.

¹⁵ Chashna mana tandanacushpapish ama p'iñaichicchu, ashtahuanpish ima shinami shuc cric huauquita cunashpa yachachinguichic, chashnallatac yachachichic.

Tucuchingapac “allilla cashca cachun” nishcamanta

¹⁶ Sumac causaita cuc Apunchic Jesusllatac cancunapac tucui causaipipish, imapipish sumac causaita cushca cachun. Shinallatac Apunchic Jesusllatac tucui cancunahuan cashca cachun nishpami mañanchic.

¹⁷ Ñucaca Pablomi cani. Ñuca quiquin maquihuanmi: “Allilla cashca cachun” nishpa quillcani. Cashna cachac shinallatacmi, tucui quillcacunapi ñuca quiquin maquihuan quillcashpa cachani.

¹⁸ Ñucanchic Apunchic Jesucristoca tucui cancunaman paipac sumaimana c'uyaita cushca cachun.