2 TESALONICENSES 2 - Nuevo Testamento en Quichua Cañar 1996

Jesucristo cutimucpi imalla tucuna cashcamanta

¹ Cunanca c'uyashca criccuna, ñucanchic Apunchic Jesús cutimunamantapish, ñucanchic paihuan tandanacunamantapishmi huillashun ninchic.

² “Apunchic Jesús cutimuna punzhaca ñami chayamushca” nishpa, maijancuna ñucanchic quillcashca shimita ricushpapish, pi mana yachashcata rimacta uyashpapish, huillacta uyashpapish, pacta pandarishpa jahualla mancharinguichicman nishpami mañanchic.

³ Ima shinapish pandachichunca, amatac saquinguichicchu. Chai punzha manarac chayamucpimi, Taita Diosta p'iñaccunaca achcacuna ricuringa, shinallatac huiñai huiñaita llaquiman cachana millaita ruhuac runapish ricuringami.

⁴ Chai millaita ruhuac runami Taita Diostapish, chashnallatac imatapish Diosta shina alli ninacunatapish p'iñanga. Chaipac jahuapica chai runallatacmi Diosman mañana huasipipish “ñucami Dios cani” nishpa tiyaringa.

⁵ Ñuca cancunahuan cashparac cai shina huillashcataca, ¿manachu cancunaca yuyaringuichic?

⁶ Chai millaita ruhuac runa ricurina punzha manarac chayacpi, pai ricurinata ima jarcacushcataca cancunallatac yachanguichicmi.

⁷ Chai mana alli ruhuanaca ñami callarishca. Chaitaca Dios yuyaita cucllapimi yachac chayangacuna. Chai millai ricurinata jarcacucllapimi, manarac ricurin. Ña chai jarcacucta anchuchicpica,

⁸ chai millaita ruhuac runami ricuringa. Paitami Apunchic Jesusca cutin shamushpa, paipac shimihuan p'ucushpa huañuchinga, shinallatac paipac sumac achiclla cashcahuanmi chingachinga.

⁹ Chai millaita ruhuac runaca Satanás*f** ayudacpi imatapish ruhuaclla cashcahuan shamushpami, pi mana ruhuaipaccunatapish, pi mana ricushcacunatapish ruhuashpa, llullashpa crichinga.

¹⁰ Jatun llaquiman ricuccunataca tucui laya mana allita ruhuashpami, umashpa crichinga. Paicuna quishpiringapac cashcata nic huillashcata p'iñashpa, mana chasquishcamantami chashnaca tucunga.

¹¹ Chaimantami Taita Diosca llullashpa crichichun, shinallatac llullashcata crichunpish saquinga.

¹² Cashcata nic huillashcata huillacpi mana crisha nishpa, mana allillata ruhuashcacunahuan cushicushcamanta, paicuna tucuillatac jatun llaquiman richunmi, chashnaca ruhuanga.

Dios ima shina quishpichina cashcamanta

¹³ Apunchic Jesús c'uyashca criccuna, ñucanchicca cancunata yuyarishpaca, punzhantami Taita Diostaca pagui nicunchiclla. Diospac Espíritu Diospacllata ruhuashcamanta, shinallatac cashcata nic huillashcata crishcamantami, cancuna quishpirichun callarimanta pacha Diosca acllarca.

¹⁴ Chashnaca ñucanchic Apunchic Jesucristohuan sumaimana llactapi causagrichunmi, ñucanchicman alli huillaita huillachishpa, Diosca cancunataca c'ayarca.

¹⁵ Shina cashcamanta c'uyashca criccuna, ñucanchic quillcashpapish, ñucanchic yachachishpapish, imata nishcataca amatac cungarishpa c'atiraichiclla.

¹⁶ Ñucanchicta c'uyac Taita Diosllatac, shinallatac pai c'uyashcallamanta huiñai huiñaita cushi canatapish, cushicushpa shuyanatapish cuc ñucanchic Apunchic Jesucristollatac

¹⁷ cancunapac shunguta cushichishpa, imata rimangapacpish, punzhanta imata ruhuangapacpish alli yuyaicunata cuchun ninchicmi.