2 PEDRO 2 - Nuevo Testamento en Quichua Cañar 1996

Llullashpa yachachiccunamanta

¹ Israelcunapurapica*f** “Diosmantami huillacuni” nishpa, ñaupa llullac huillaccunapish tiyashcami. Chashnallatacmi cancunapurapipish llullashpa yachachiccuna tiyanga. Chashnami paicunata Quishpichic Apunchic Jesusta “mana ricsinichu” nishpa, cancunamanca allita yachachicuc shinalla llaquiman pushac yuyaicunata yachachinga. Chashna yachachishpaca, paicunallatacmi utca llaqui tucugricuncuna.

² Taucacunami paicuna mana alli causacuc shinallatac causangacuna. Chaimantami cashcata nic huillashcata c'atinatapish mana allichu nishpa c'amingacuna.

³ Paicunaca cullquita japingaraicullami, cancunamanca paicunapac yuyaillamanta yachachishpa chayucyangacuna. Paicunataca ña utcamanta pachami, “llaquimanmi ringuichic” nishpa Diosca shuyacun. Chai llaquimantaca manatac quishpiringacunachu.

⁴ Diosca paipac angelcuna cacpipish juchallicpica, mana perdonarcachu, ashtahuanpish ucu pacha amsapimi shitarca. Chaipimi paicunaca Dios taripashpa llaquichina punzhacaman cadenahuan huatashca shuyacun.

⁵ Ñaupa punzhacunapi causaccunatapish shina juchallicpica, Diosca mana perdonarcachu, ashtahuanpish yacu juizhuhuanmi millai gentecunataca tucuchirca. Shina cashpapish Dios munashca shina causachun nishpa, huillac Noellatami paihuan cac canchiscunandic quishpichirca.

⁶ Chashnallatac Diosca Sodoma pueblopi, Gomorra pueblopi causac millai gentecunataca uchupayangacamanmi rupachirca. Chashna ruhuashpaca, q'uipaman causac millai gentecuna chashnallatac tucuna cashcata ricuchingapacmi, chashnaca ruhuarca.

⁷ Shina cashpapish Lotllatami quishpichirca. Lotca millaita ruhuashpa causac gentecunata ricushpaca, llaquirishpami cashcata ruhuashpa causac carca.

⁸ Cashcata ruhuac Lotca millai gentecunapac chaupipi causashpami, punzhanta chai mana allicunata ricushpa, uyashpa, paipac alli shungupica llaquiric carca.

⁹ Chashnami Mandac Diosca paipaclla causaccunataca imapish llaquicunamanta quishpichin. Shinallatac millai gentecunataca pai taripashpa, llaquichina punzhacamanmi llaquichishpa charicun.

¹⁰ Tucuimanta yallica, Mandac Diosca pai Mandac cachun mana chasquiccunatapish, mana alli munaihuan c'atic imapish mapa mana allita ruhuaccunatapish llaquichingami. Paicunaca mana cazuccunami, imapipish c'ariyaccunami, shinallatac imatapish ruhuaclla jahua pachamanta mandaccunatapish mana manchashpa c'amiccunami.

¹¹ Ashtahuanpish angelcunaca paicunata atishpa mandaccuna cashpapish, imatapish ruhuacllacuna cashpapish, Diospac ñaupapica jahua pachamanta mandaccunataca mana juchanchishpa c'amincunachu.

¹² Chai pandata yachachiccunaca animalcuna shinami. Chashna cashpami, imatapish mana entendishpa, ima shinapish causashpa, japishpa huañuchina animalcuna shina causancuna. Paicunaca manapish entendishpami, mana allichu nishpa rimancuna. Chashna mana allita ruhuashcamantami, animalcuna shina huañungacuna.

¹³ Chashnami shuccunata llaquichishcamantaca, paicunapish llaquita apangacuna. Paicuna imapish mapa, mana allicunata punzha pacha ruhuashpaca, “allitami ruhuanchic” nishpami cushicuncuna. Cancunahuan cangapac tandanacuicunaman rishpaca, imapish quiquin munashcata ruhuashpami, pingaipac mapata ruhuancuna. Chai shina ruhuashpaca, cancunata umashpami cushicuc tucuncuna.

¹⁴ Maijan huarmita ricushpapish, huacllirina yuyaillami cancuna. Chashna cashcamanta juchallinataca manatac shaicuncunachu. Manarac sinchi criccunataca pandachincunallami. Paicunaca tucuita atishpa imatapish charinallatac munaccunami, shinallatac Dios mana ricunachishca gentecunami.

¹⁵ Paicunaca cashcata ruhuashpa causanata saquishpami, pandarishpa puricuncuna. Chashna ruhuashpaca, Bosorpac churi ñaupa huillac Balaam ruhuashca shinami ruhuancuna. Balaamca millaita ruhuashpallami, cullquita japinata munac carca.

¹⁶ Pai chashna mana allita ruhuagricucpimi, shuc burroca gente shina “canca mana allitachu ruhuacungui” nishpa rimacpi, chai juizhu illac shina yuyacushcataca saquirca.

¹⁷ Chai pandata yachachiccunaca yacu illac jundu shinacunami. P'uyuta huaira apashca shinacunami. Shina cashpami, paicunaca huiñaicaman jatun amsapi shitashca cangacuna.

¹⁸ Paicunaca yanga mapa rimaicunallatac sinchita rimashpami, “allimi canchic” nincuna. Chashnami quiquin munashca mapacunata ruhuashpa, mana alli causaccunapuramanta cunanlla anchurishcacunatapish cutin pandachincuna.

¹⁹ Paicunallatac mana alli causaipi huatashca shina cashpapish, shuccunata huatashca shina causaimanta cacharichishun nincunami. Maijanpish paipac mapa munaicuna aticpica, chai munaipi huatashca shinami tucun.

²⁰ Maijanpish ñucanchicta Mandac Quishpichic Jesusta crishpa, chai mana alli causaimanta anchurishcacunami. Chashna anchurishca cashpa, cutin chai mana alli causaiman tigrarishpaca, ñaupa ima shina causacushcatapish ashtahuan yallimi tucun.

²¹ Taita Dios cushca alli huillaita uyashca jahua cutinllatac saquinapac randica, Dios munashca shina causanata mana ricsishca cashpachari, ashtahuan alli canman carca.

²² Ashtahuanpish paicuna chashna tucucpimi: “Allcupish pai ungushcallatatacmi cutin tigrachishpa micun. Cuchipish armarishca q'uipaca, cutinmi turupi singun” nishcaca pactashca.