2 JUAN 1 - Nuevo Testamento en Quichua Cañar 1996

Cashcata nic huillashcapi nishca shina c'uyanacushpa causanamanta

¹ Ñucaca criccunata pushac cashpami, Dios acllashca tandanacushca criccunamanpish, mashnalla chaipi caccunamanpish tucui ñuca c'uyaihuan caita quillcani. Mana ñucallachu c'uyani, ashtahuanpish tucui mashnalla cashcata nic huillashcata uyashpa criccunapish c'uyancunami.

² Chai cashcata nic huillashcaca ñucanchic shungupimi causacun. Chaica mana chingaringachu. Chaimantami cancunataca c'uyani.

³ Taita Diospish, paipac Churi Jesucristopish cancunataca mai c'uyashpa, llaquishpa, sumac causaita cuchunmi munani. Cashcata nic huillashcata crishpa c'uyanacushpa causachunmi, chashnaca nini.

⁴ Taita Dios ñucanchicta mandashca shina, cancunapurapi maijancuna cashcata nic huillashcata crishpa causacushcata yachashpami, yalli cushicuni.

⁵ C'uyashca criccuna, cunanca caishuc chaishuchuan c'uyanacuchun nishpami mañani. Cai mandashcaca mana mushucchu, ashtahuanpish callaripi ñucanchicman mandashcallatacmi.

⁶ C'uyanacushpa causanaca, Taita Dios mandashcacunata pactachinami. Chashna c'uyanacushpa causanami nishpa mandashcataca, callarimanta pachami cancunaca ña uyashcanguichic.

Llullashpa yachachiccunamanta

⁷ Cai pachapica llullashpalla huillaccunaca achcacunami puricuncuna. Paicunaca: “Apunchic Jesucristoca mana runa tucushpachu shamurca” nishpami, llullashpa huillancuna. Chaicunaca Apunchic Jesucristota p'iñaccunami.

⁸ Chashna cashcamantami cancunaca imalla ruhuashcamanta japina cashcata mana chingachishpa, tucui japina yuyailla cana canguichic.

⁹ Maijanpish Cristo yachachishcamanta ashtahuan yallichishpa yachachisha nicca, mana Dioshuanchu. Maijanpish Cristo yachachishca shina yachachicllami Taita Dioshuanpish, paipac Churi Jesucristohuanpish can.

¹⁰ Shina cashcamanta maijanpish cancunapac huasiman rishpa Cristo yachachishca shina mana yachachictaca, ama chasquinguichicchu. Chashna llullashpa huillaccunataca “allillachu shamungui” ninallatapish, ama ninguichicchu.

¹¹ Ashtahuanpish chashna “allillachu shamungui” nishpaca, ñami paicunapura tucunguichic.

Ña tucuchingapac “allilla cashca cachun” nishcamanta

¹² Cancunaman imata nina cashcataca achcatami charini. Chashna cacpipish cai quillcapica mana quillcashpa cachagrinichu, ashtahuanpish ñuca quiquinllatac rimashpami, cancunahuantac parlasha nini. Chashna parlashpami, ñucanchicca yallita cushicushun.

¹³ Cancunapac ñañan shina caishuc criccunapish, Dios acllashca cashpami “allilla cashca cachun” nishpa cachancuna.