2 CORINTIOS 8 - Nuevo Testamento en Quichua Cañar 1996

Diospaclla cac criccunaman cullquita cuna cashcamanta

¹ C'uyashca criccuna, cunanca Dios c'uyashcallamanta Macedonia llactapi cac tandanacushca criccuna imallata ruhuac cashcatami, cancunamanca parlagrinchic.

² Paicunaca llaquicunata apacushpapish, cushillami carcacuna. Shinallatac imata mana chariccuna cashpapish, chariccuna shinami cullquitaca mana misarishpa curcacuna.

³ Paicuna charishca shina tucui shunguhuan cushcatapish, chaimanta yalli yallita cushcatapish, ñucallatac ricushcamantami huillacuni. Paicunaca quiquin munaimantami,

⁴ “Diospaclla cac criccunata ñucanchicpish ayudashun ninchicmi” nishpa, mailla mañarcacuna.

⁵ Paicuna cushpaca, ñucanchic yuyacushcatapish yallimari curcacuna. Paicunapac quiquin munaimantami, puntaca Apunchic Jesucristopacta ruhuanata munarcacuna. Chaipac q'uipaca Dios munashca shinami, ñucanchicpacta ruhuanatapish munarcacuna.

⁶ Chaimantami Titotaca pai puntaman callarishca shinallatac, Dios c'uyashcamanta cancuna cushcacunata tandachichun nishpa mañarcanchic.

⁷ Cancunaca alli criccunami canguichic, alli huillaita huillaccunami canguichic, alli yachaccunami canguichic, cushicushpa imatapish allita ruhuashpa c'aticcunami canguichic, shinallatac ñucanchicta c'uyaccunami canguichic. Chai shinallatacmi cancunaca imata cushpapish, Dios c'uyashcamanta yallita cuna canguichic.

⁸ Caitaca mana shuc mandashca shinatachu nicuni, ashtahuanpish shuccuna cushicushpa cushcata ricushpa, cancunapish cushpa, tucui shunguhuan c'uyashcata ricuchichunmi nicuni.

⁹ Ñucanchic Apunchic Jesucristo mai c'uyac cashcataca, cancunaca ña yachanguichicmi. Paica achcata charic cashpapish, cancunamantami imata mana charic huaccha tucurca. Chai shina huaccha tucushcamantami, cancunaca achcata chariccuna shina tucunguichic.

¹⁰ Caimanta rimashpaca, cancunapac allipacllatacmi cai ñuca yuyaitaca cuni. Cai cullquita cunataca sarun huatapiracmi cancunaca callarircanguichic. Chashna cui callarishpaca, mana saquishpami tucui shunguhuan cuc carcanguichic.

¹¹ Chashna cui callarishca shinallatac, cunanpish cancuna charishcamanta tucui shunguhuan cushpa c'aticuichiclla.

¹² Maijanpish pai charishcamanta tucui shunguhuan imata cucpica, Taita Diosca chasquinmi. Ashtahuanpish Taita Diosca imata mana charishcataca mana mañanchu.

¹³ Cancuna shuccunaman cungaraicu ima illaclla saquirichunca mana ninichu, ashtahuanpish tucuilla caishuc chaishuc caranacuchunmi nini.

¹⁴ Cancunaca shuccuna mana charishcatami charinguichic. Maijan cutinca cancuna mana charishcatami shuccunaca charinga. Chai shina caishuc chaishuc ima illashcata caranacucpica, imapish mana illangachu.

¹⁵ Dios quillcachishcapica: “Achcata tandacpish mana puchuchircachu. Shinallatac ashallata tandacpish mana ima illacllachu carca” ninmi.

Titota shuctac criccunandic Pablo cachashcamanta

¹⁶ Cancunata ñuca llaquic cashca shinallatac, Titoman cancunata llaquina yuyaita Taita Dios cushcamantami, paitaca pagui nicunilla.

¹⁷ Ñuca ricugrichun mañacpica, paica uyarcami. Pai quiquinllatac cancunata ricugrina munaihuan cashpami, cunanca ricungapac ricun.

¹⁸ Alli huillaita huillacushcamanta tucui tandanacushca criccunapac alli nishca, shuc huauquitami Titohuanca cachani.

¹⁹ Alli nishcallapish paica mana canchu, ashtahuanpish paica ñucanchichuan pacta cullquita tandachishpa richun, tandanacushca criccuna acllashcapish canmi. Cai shina tandashpa apashpaca, Apunchic Jesús alli nishca cachun, shinallatac ñucanchic criccuna cuna munaita ricuchingapacmi, chashnaca ruhuacuncuna.

²⁰ Chashna paicunahuan achca cullquita tandachishpaca, ama pi juchanchichunmi chashnaca ruhuanchic.

²¹ Shina ruhuashpaca, mana Apunchic Jesuspac ñaupallapi alli ricuringapac, ashtahuanpish gentecunapac ñaupapipish alli ricuringapacmi chashna ruhuacunchic.

²² Shinallatac paicunahuanca ñucanchicpuramanta shuc huauquitapish cachanimi. Paitaca imapipish allita ruhuactami ricushcanchic. Cunancarin paica cancuna cuna cashcatatac yachashpaca, ashtahuanmi allita ruhuanga.

²³ Titoca ñucahuan pacta cancunapac allipac ruhuashpa puricmi. Shinallatac caishuc ishcai huauquicunaca, caipi chaipi cac tandanacushca criccuna acllashcacunami. Paicunaca Cristo alli nishca cachunmi ruhuacuncuna.

²⁴ Caipi chaipi cac tandanacushca criccuna cancuna c'uyac cashcata yachachunca, cai huauquicunata allita chasquichic. Chai shina cancuna allita chasquicpimi, ñucanchic cancunata “allicunami” nishcaca mana yanga canga.