2 CORINTIOS 7 - Nuevo Testamento en Quichua Cañar 1996

¹ Caicunami Dios ñucanchicman allicunata cushami nishcacunaca. Shina cashcamanta c'uyashca criccuna, cuerpotapish, almatapish tucui imapish mapayachinamantaca huacaichirishpa, chuya cashunchic. Shinallatac Taita Diosta manchashpa, paipaclla tucushpa causanata yuyailla cashunchic.

Corinto pueblopi criccuna Dioshuan alli tucucpi, Pablo cushicushcamanta

² Ñucanchic nishcataca cancunapac shungupi chasquichicyari. Pitapish ñucanchicca ima mana allitaca mana ruhuarcanchicchu. Pitapish mana pandachircanchicchu. Pitapish mana umarcanchicchu.

³ Mana cancunata llaquichingaraicuchu caicunataca nini. Ñacaman nishca shinami, cancunata c'uyashcamantaca causashpapish, huañushpapish cancunahuan pacta casha.

⁴ Ñucaca cancuna ima shina cashcata ricushpa cushicushpami, cai tucui llaquicunahuan cashpapish, ashtahuan c'atina yuyaita japishpa, yallita cushicuni.

⁵ Macedonia llactaman chayashcamanta pachaca imata mana samarircanchicchu, ashtahuanpish maipipish mana ricunachishpa, mana criccuna llaquichicpimi, llaquihuan carcanchic. Shina cashpami, ñucanchic shungupica yalli llaquilla carcanchic.

⁶ Shina cacpipish llaquilla caccunata cushichic Diosca Tito chayamucpimi, ñucanchictaca yallita cushichirca.

⁷ Mana Tito shamushcallamantachu cushicurcanchic, ashtahuanpish Tito cancuna ima shina cashcata ricushpa, cushicushcamantami cushicurcanchic. Paimi cancuna ñucata yallita ricunaihuan cashcatapish, ñucata llaquichishcata yuyarishpa llaquilla cashcatapish, shinallatac ñuca yuyailla cashcatapish parlarca. Chaita uyashpacarin ashtahuanmi cushicurcani.

⁸ Ñuca cachashca quillca cancunata ashacamanlla llaquichishcata yachac chayashpaca, utcamanca llaquirircanimi. Shina cacpipish cunanca chai quillcata cachashcamantaca mana llaquirinichu.

⁹ Mana chai quillcashca cancunata llaquichishcamantachu cunanca cushicuni, ashtahuanpish cancuna chai quillcata ricushpa llaquirishpa, Diosman cutirishcamantami cushicuni. Cancunaca Taita Dios munashca shinami, chashnaca llaquirircanguichic. Shina cacpica, ñucanchicca ima mana allitaca mana ruhuarcanchicchu.

¹⁰ Dios munashca shina maijanpish llaquirishpaca, Diosman cutirishpa quishpirinatami japinga. Shina japina cashcamantaca, imamantapish mana llaquirinachu can. Ashtahuanpish cai pacha gentecuna munashca shina maijanpish llaquirishpaca, huañuitami japinga.

¹¹ Cancuna Dios munashca shina llaquirishcamantaca, imata tucushcataca yuyarichic. Chashna llaquirishcamantami ima shina cashcata yuyarishpa, allichirishpa, yuyaita japircanguichic. Shinallatac p'iñarishpapish, manchana yuyaitami japircanguichic. Chai q'uipaca ñucata ricuna munaita charishpami, allita ruhuashun nishpa, chai mana allita ruhuactaca llaquichircanguichic. Tucui chaicunata ruhuashpaca, imapipish mana juchanchipac cashcatami ricuchircanguichic.

¹² Shina cashpami chai quillcata ñuca quillcashpaca, chai llaquichicmantapish, shinallatac llaquichishca cacmantapish mana quillcarcanichu, ashtahuanpish Diospac ñaupapi ñucanchicmanta cancuna yuyariccuna cashcata ricuchingapacllami quillcarcani.

¹³ Tucui caicunaca ñucanchictaca cushichishcami. Shina cacpipish Tito cushicuita japishcata ricushpami, ashtahuan cushicunchic. Tucui cancunami ashtahuan c'atina yuyaita cushpa cushichishcanguichic.

¹⁴ Cancunamantaca “allicunami” nishpami utcaman Titomanca ña parlarcani. Chaica chashnatacmi cashca. Ñucanchicca ima shinami cancunaman cashcatatac parlarcanchic, chashnallatacmi “allicunami” nishpa, Titoman parlashcaca chai shinatac pactashca.

¹⁵ Cancuna paita alli nishpa, c'uyac shunguhuan chasquishcata yuyarishpa, shinallatac tucui cancuna pai nishcata ruhuacushcamantami, ashtahuan c'uyan.

¹⁶ Tucui imapipish cancuna alli c'aticucta yachashpami, yallita cushicuni.