2 CORINTIOS 13 - Nuevo Testamento en Quichua Cañar 1996

¹ Caihuanca quimsa cutinmi cancunata ricungapac rigrini. Tucui imatapish ishcai cashpa, quimsa cashpa imata ricushcata huillac tiyacpimi, allichishca canga.

² Utcaman juchata ruhuaccunatapish shinallatac caishuc mana cazuccunatapish, ima shinami q'uipata sarun rishpa ñuca quiquin nircani, chai shinallatacmi cunan carupi cashpapish nini: Cutin ricungapac rishpaca, mana llaquishpami cancunataca llaquichisha.

³ Chashna cacpimi Cristo ñucata huillachicushcatatac yachanguichic. Cancunapurapi cac Cristoca imata mana ruhuaipac shinaca mana canchu, ashtahuanpish imatapish ruhuaclla cashcatami ricuchicun.

⁴ Ari, paica imatapish mana ruhuaipac shinami, cruzpi chacatashca carca. Shina cashpapish imatapish ruhuaclla Diosmantami causacun. Chai shinallatacmi ñucanchicca Cristo shina, imatapish mana ruhuaipac shina canchic. Shina cashpapish paihuan shuc shinalla tucushpami, Taita Dios imatapish ruhuaclla cashcahuan cancunapac allipac causashun.

⁵ Cancuna alli cric cashcata yachangapacca, cancunallatac ima shina cashcata yuyarichic. Ima shina cashcataca yuyarichicyari. Jesucristo cancunapac shungupi cashcataca, ¿manachu yachanguichic? Cristo cancunapac shungupi cashcata mana yachashpaca, mana crishpa pandariccunami canguichic.

⁶ Shina cashpapish ñuca mana pandaric, alli cric cashcataca, cancunallatac yachagricushcatami yuyani.

⁷ Cancuna imapish mana allita ama ruhuachunmi, Taita Diosman mañanchic. Chashnaca mana ñucanchic allipi ricuringaraicuchu mañacunchic, ashtahuanpish ñucanchicta pandarishcami nishpa juchanchicucpish, cancuna allicunata ruhuachunmi mañanchic.

⁸ Cashcata nic huillashcapac imapish mana allicunataca mana ruhuai pudinichu, ashtahuanpish cashcata nic huillashcapac imapish allillatami ruhuai pudini.

⁹ Chaimanta ñucata “shina shinalla cricmi” nicucpipish, cancuna ashtahuan sinchi criccuna cacpimi cushicuni. Cancuna Cristota c'atishpa, ashtahuan sinchiyangacamanmi, Taita Diosman mañashpa c'aticushalla.

¹⁰ Ñuca cancunapacman rishpa ama yallita mandashpa llaquichingapacmi, manarac ricungapac rishpa, caita quillcashpa cachani. Apunchic Jesús mandashpaca, mana cancunata chingachichunchu mandarca, ashtahuanpish cancunata alli cricta ruhuashpa, ashtahuan sinchiyachichunmi mandarca.

Ña tucuchingapac “allilla cashca cachun” nishcamanta

¹¹ Ña tucuchingapacca caitami nisha nini: Cushilla causashpa, punzhanta allichirishpa c'atichic. Caishuc chaishuc yuyachinacushpa, sumacta causaichic. Chashna causacpimi, sumac causaita cuc Taita Diosca cancunahuan canga.

¹² Chuya shunguhuan muchashpa, caishuc chaishuc “allilla cashca cachun” ninacuichic.

¹³ Tucui criccunami “allilla cashca cachun” nishpa cachancuna.

¹⁴ Apunchic Jesucristo sumac c'uyaita cucpi, Taita Dios c'uyacpi, shinallatac Diospac Espíritu shuc shinallatac ruhuacpi, cushilla causachunmi munani.