2 CORINTIOS 11 - Nuevo Testamento en Quichua Cañar 1996

Llullac huillaccunata Pablo rimashcamanta

¹ Cunan ñuca yuyai illac shina rimarishcata uyaichicyari. Ima shina cashpapish uyaichicyari.

² Taita Diosca paipaclla causachun munashcamantami, ñucapish chashnallatac causachun munani. Ñucaca shuc cusallahuan cazarachingapac ari nichic shinami, cancunataca Cristohuan ari nichircani. Chashna cashcamantami manarac pihuan chayarishca solterata cuc shina, Cristoman cusha nini.

³ Shina cashpapish ima shinami culebra paipac yachac tucushca cashcahuan Eva huarmita umashpa crichirca, chashnallatac cancunamantapish Cristota tucui shunguhuan c'atina yuyaicunata anchuchishpa, chingachinatami manchani.

⁴ Maijanpish ñucanchic huillashca Jesusmanta shuctac layaman huillangapac chayacpica, chasquicllami canguichic. Shinallatac cancuna chasquishca Espiritumanta shuctac laya espiritutapish, cancuna chasquishca alli huillaimanta shuctac laya huillaitapish chasquinguichicllami.

⁵ Chashna nishpaca, q'uipata huillangapac shamuc “jatun yachaccunami” nishca huillaccunamanta “yanga yangallami cani” ninataca mana ninichu.

⁶ Ñucaca rimanata mana alli yachashpapish, Diosmantaca allimi yachani. Chai shina cashcataca ima shinapish cancunamanca ricuchircanillami.

⁷ Cancunata jatunyachingaraicu cancunamanta imata mana japishpa, yangalla tucushpa, Diosmanta alli huillaita huillashpaca, ima mana allitaca mana ruhuarcanichu.

⁸ Cancunata servingapacca shuctac tandanacushca criccunamanta cullquita chasquishpaca, paicunamanta shuhuac shinami ruhuarcani.

⁹ Ñuca cancunahuan cashpaca, ima illac cashpapish imata mañashpa mana p'iñachircanichu. Chai imalla illashcataca Macedonia llactamanta shamuc criccunami curcacuna. Chashna cashpami, cancunataca imata mañashpa mana p'iñachircani. Chai shinallatacmi mana p'iñachishpa c'atinata munani.

¹⁰ Cristomanta cashcata nic shimicunataca ñucaca ricsinitacmi. Chashna cashcamantami ñuca imata mana japishpa cushicunataca, tucui Acaya llactapi causaccunapish mana jarcangachu ni pudini.

¹¹ Chashna nishpaca, ¿cancunata mana c'uyashcamantachu chashnaca nini? Taita Diosllatacmi ñuca cancunata c'uyac cashcataca yachan.

¹² Imata mana chasquishpa, ñuca huillashpa cushicuc shina, chai llullashpa puriccuna huillashpa ama cushicuchunmi, ima shina ruhuacuc shinallatac ruhuashpa c'atisha.

¹³ Chaicunaca llullashpa huillashpa pandachiccunami, shinallatac “Cristo acllashca huillaccunami canchic” nic tucuccunami.

¹⁴ Caicunata ricushpaca, mana mancharinachu. Satanasllatacmi*f** achic nicuc ángel shina tucunlla.

¹⁵ Chaimanta Satanaspacta ruhuaccunapish “cashcata ruhuanami alli” nic tucucpica, ima mancharina mana canchu. Shina cacpipish paicuna imata ruhuacushca shinallatacmi chingaringacuna.

Jesús acllashca huillac Pablo llaquita apashcamanta

¹⁶ Ñucataca ama “yuyai illacmi” nishpa yuyachunmi, cutinllatac nini. Chai shina yuyacushpapish, ñuca ashata jatun tucushpa yuyai illac shina rimashcata uyaichic.

¹⁷ Cashna rimashpaca, mana Apunchic Jesús munashca shinachu nini, ashtahuanpish jatun tucuna yuyaihuanmi yuyai illac shina rimarini.

¹⁸ Taucacunami “ñucallami alli cani” nishpa, jatun tucushun nincuna. Chaimantami ñucapish chashnallatac jatun tucusha nini.

¹⁹ Cancunaca “yalli yachacmi canchic” nishpa yuyashpapish, ¡yuyai illaccuna rimashcataca alli munaihuanmi chasquinguichic!

²⁰ Shinallatac servichiccunatapish, shuhuashpa quichuccunatapish, umaccunatapish, mana ricunachiccunatapish, p'iñashpa ñahuipi huactaccunatapish, cancunaca imata mana nishpa chasquinguichicllami.

²¹ Ñucanchictaca “manchashcamantami mana paicuna shina ruhuashca canga” ninguichicchari. ¡Chaimantaca pinganayanmi! Shina cacpipish shuctaccuna imamantapish jatun tucucpica, jatun tucuna mana alli cacpipish, jatun tucusha ninimi.

²² Paicunaca “hebreocunami*f** canchic” ninchari, ñucapish chaillatacmi cani. Paicunaca “israelcunami*f** canchic” ninchari, ñucapish chaillatacmi cani. Paicunaca “Abrahampac huahua huahuacunami canchic” ninchari, ñucapish chaillatacmi cani.

²³ Paicunaca “Cristota serviccunami canchic” ninchari, ñucapish paicunamanta yalli alli servicmi cani. Chashna nishpaca, yuyai illac shinami rimani. Paicunamanta yallimi ñucaca trabajarcani. Paicunamanta yallimi carcelpi carcani. Paicunamanta yallimi macashca carcani. Shinallatac tauca cutinmi huañunallapish carcani.

²⁴ Israelcunaca pichca cutinmi quimsa chunga iscunhuan azutircacuna.

²⁵ Quimsa cutincamanmi caspihuan macarcacuna. Shuc cutinca rumihuan shitashpami macarcacuna. Quimsa cutinmi barcopi ricushpa, barcondic yacupi ucuyarcani. Shinallatac shuc punzha, shuc tutami cucha yacupi aguarinalla carcani.

²⁶ Tauca cutinmi ñucaca ñancunapipish, yacupipish huañuna manchai, shuhuana manchai, ñuca llacta gentecunamantapish, caru llacta gentecunamantapish manchai carcani. Shinallatac pueblocunapipish, shitashca pambacunapipish, mama cuchapipish manchaimi carcani. “Criccunami canchic” nishpa, llullashpa puriccunamantapish manchaimi purircani.

²⁷ Quiquin maquihuanmi shaicucta trabajarcani. Tauca cutinmi mana suiñushpa pacarircani. Yarcaihuanpish, yacunaihuanpish carcanimi. Tauca cutinmi mana micurcani. Chirimantapish, churana illashcamantapish llaquita aparcanimi.

²⁸ Cai llaquicunahuan cashpapish, shuctac llaquicunahuan cashpapish, tucui punzhacunami tucui tandanacushca criccunata yuyarishpa, llaquita apacunilla.

²⁹ Maijan cric irquiyacpica, paihuan pactami ñucapish irquiyani. Shinallatac maijanta pandachishpa urmachicpica, p'iñarishpami llaquirini.

³⁰ Imamanta jatun tucuna cacpica, ñuca llaquita apashpa, imata mana ruhuaipac cashcamantami jatun tucusha.

³¹ Huiñaita “allimari cangui” nina, Apunchic Jesuspac Taita Diosllami, ñuca cashcatatac nicuctaca yachan.

³² Damasco pueblopi ñuca cacpica, jatun mandac Aretas churashca mandacmi ñucata japingapac, chai llucshina pungucunapi soldadocunata churarca.

³³ Shina cacpipish maijancuna shuc jatun tazapi ñucata churashpami, pueblota jarcacuc pirca ventanamanta urai cacharircacuna. Chashnami chai mandacpac maquimantaca cacharirishpa atircani.