2 CORINTIOS 1 - Nuevo Testamento en Quichua Cañar 1996

Corinto pueblopi causac criccunaman Pablo quillcashcamanta

¹ Taita Dios munashcamanta Jesucristo acllashca huillac Pablomi cani. Jesusmanta ñucanchic huauqui Timoteohuan ishcai tucushpa, Corinto pueblopi Diospaclla tandanacushca criccunaman, shinallatac Acaya llactapi cac tucui criccunamanpish “allillachu canguichic” nishpami quillcanchic.

² Ñucanchic Taita Diospish, Apunchic Jesucristopish cancunata mai c'uyashpa, sumac causaita cushca cachun ninchicmi.

Pablo llaquihuan cashpapish cushicushcamanta

³ ¡Ñucanchic Apunchic Jesucristopac Taita Diosca alli nishca cachun! Paimi llaquilla cacpipish, llaquishpa cushichicunlla.

⁴ Taita Diosca ñucanchicta ima shinami llaquihuan cacpi cushichin, chai shinallatac shuccuna ima llaquihuan cacpi cushichichunmi, ñucanchictapish cushichin.

⁵ Cristo llaquita apashca shinami, ñucanchicpish paihuan jatun llaquita apanchic. Chai shinallatacmi Cristomanta ñucanchicpish yallita cushicuita japinchic.

⁶ Ñucanchic llaquita apashpaca, cancuna quishpirishpa, cushicuita japichunmi llaquita apanchic. Taita Dios ñucanchicta cushichishpaca, ñucanchic llaquita apacushca shinallatac, cancunapish mana manchashpa, c'uyac shunguhuan llaquita apachunmi, cushicuita cun.

⁷ Cancuna ima shinami ñucanchic shina llaquita apacunguichic, chai shinallatacmi cushicuita japinguichic. Chai shina cancuna causacuctaca tucui shunguhuanmi crinchic.

⁸ C'uyashca criccuna, ñucanchic Asia llactapi ima shina jatun llaquita apashcata yachachunmi munanchic. Chaipica mana apaipac yalli llaquita apashpami, “ña mana ashtahuan causashunchu” nishpa yuyarcanchic.

⁹ Chaipica ña huañunalla shinami carcanchic. Shina cacpipish ñucanchicmanca chai llaquita apashcaca allimi carca. Chashna llaquita apashpami, mana ñucanchicllapi yuyaita churashpa, ashtahuanpish huañushcacunata causachic Dios yuyailla canata yachacurcanchic.

¹⁰ Taita Diosmi chai huañuna llaquimanta huacaichirca. Shinallatac paillatacmi tucui huañuna llaquimantapish huacaichinga. Chai shinallatac “ima llaquimantapish huacaichishpa c'atingami” nishpa yuyanchicmi.

¹¹ Cancuna Taita Diosman mañashpa ayudacpimi, ñucanchictaca huacaichishpa c'atinga. Achcacuna ñucanchicmanta mañacpica, achcacunami Taita Dios allicunata ñucanchicman cushcamantaca paita alli ningacuna.

Pablo imamanta mana Corintoman rishcamanta

¹² Ñucanchic cai pachapi causacushpaca, ima mana allita mana ruhuashpa, imatapish cashcata ruhuashpa causacushcatami yachanchic. Ashtahuancarin cancunahuanmi chashna causarcanchic. Chaimantami cushicunchic. Chashnaca mana ñucanchic yuyaillamantachu causanchic, ashtahuanpish Taita Dios mai c'uyashcallamanta yuyaita cucpimi, chashna causacunchic.

^13-14 Ñucanchic cancunaman quillcashpaca, mana uyaipac, mana entendipactaca mana quillcarcanchicchu. Chashna cashcamantami cai quillcata rizashpaca, ima shinami ñucanchic cashcataca ashallatapish entendircanguichic, chai shinallatac tucui entendichunmi munanchic. Shina entendishpami, ñucanchic Apunchic Jesús cutimucpica, ñucanchicmanta cushicunguichic, shinallatac ñucanchicpish cancunamanta cushicushun.

¹⁵ Caicunata allita yuyashpami, cancunatarac ricungapac rinata yuyarcani. Chashna yuyashpami, ishcai cutin cancunataca ricugrishpa cushichinata yuyarcani.

¹⁶ Macedonia llactaman rishpami, cancunataca punta ricugrinata munarcani. Shinallatac cutishpapish, cutin ricunatami yuyarcani. Chashna ruhuacpimi, ñuca Judea llactaman rinapipish ayudanguichicman carcanguichic.

¹⁷ Chashna ruhuanata yuyarishpaca, ¿manachu alli yuyarishpa chashna ruhuarcani? Ñuca imata ruhuasha nishpapish, ¿chai ratollatac “ari” nishpa, “mana” nishpa ishcai yuyaihuan ruhuac cashcatachu yuyanguichic?

¹⁸ Ñucanchicca cancunaman chai ratollatac “mana”, chai ratollatac “ari” mana nicchu canchic. Chaitaca cashcata nic Taita Diospish yachanmi.

¹⁹ Silvanopish, Timoteopish shinallatac ñucapish cancunaman huillacushca, Diospac Churi Jesucristoca mana chai ratollatac “ari”, chai ratollatac “mana” nicchu carca. Jesucristoca Taita Dios ari nishcata pactachictacmi.

²⁰ Taita Dios tucui imatapish cushami nishcataca, Jesucristomi pactachirca. Chaimantami Taita Diosta alli nishpaca, Jesucristomanta “chashna cachun” ninchic.

²¹ Taita Diosmi ñucanchictapish, cancunatapish Cristohuan shuc shinallatac ruhuashpa, alli c'aticta shinallatac paipacllata ruhuashca.

²² Paimi ñucanchicta paipaclla cachun sellohuan unanchishca shinata ruhuashca. Shinallatac ñucanchic shungupi paipac Espirituta churashpami, q'uipa punzhapi ñucanchic japina cashcata ricuchishca.

²³ Ñucaca Corintoman risha nicushpapish, cancunata mana llaquichingaraicumi mana rircani. Chaitaca ñuca almata ricuc Diosllatacmi yachan.

²⁴ Cancunaca ña alli criccunami canguichic. Chaimantami crishpa caita chaita ruhuachun nishpa, ña mana mandanchic, ashtahuanpish cancuna cushicuihuan crishpa c'atichunmi, ñucanchicca ayudanata munanchic.